Aanlyn Bybel

Mathay 3 - Bunong

នាវ យោហាន-បាប់តែម មឞើសងក៝ច
( មក ១:១-៨ ; លក ៣:១-១៨ )

¹ ជេសរីយោហាន-បាប់តែម ត៝ត់តាឞ្រីរាទាសតាឞ្រីយូដា ពាង់នតើមនតីផូងប៝នលានលាស៖

² “រាគ៝ល់ហ៝ម់នូយ្សនហ៝ម់អ្យើសខាន់អៃមៃ យ៝រលាសនាវកោរាញឞ្រាសម៝ត់អ្វាញ់លែៈឞើយត៝ត់”។

³ ពាង់អីនៃឞូនុយ្សអីគែសញចីសតាឆ៝ម់បុតអេឆាយ អីឞូនុយ្សនតើយ្សនាវងើយកោរាញឞ្រាសកាល់អែនើសញចីសកើតនអា៖ «គែសទូហ្វេឞូនុយ្សនតែរតាឞ្រីរាទាសលាស៖ «នទ្រាប់ហ៝ម់នូយ្សនហ៝ម់អ៝ន់មាកោរាញឞ្រាស តឹមឞានមាឞូនុយ្សក្វាយ្សត្រ៝ងញឆ៝ង់ត្រ៝ងអ៝ន់មាកាដាច់ហាន់»»។

⁴ ល៝ង់យោហាន-បាប់តែម ពាង់ញឆ៝សអាវជ៝ងតាញមារាឆៅឆែសឆាមោ វាន់រាឆែឞុតជានមានតោ នទើឆោងឆាពាង់ក្រាសនទ្រាច ដាសទាកឆុត។

⁵ នោកនៃអ៝ក់ឞូនុយ្សតាប៝នក្វ៝ង់យេរូឆាលឹម អ៝ក់ឞូនុយ្សតាឞ្រីយូដា នទ្រែលមាអ៝ក់ឞូនុយ្សគុរ៝ៈទាករាលាយយោរដាន់ វាច់រានតាយោហាន-បាប់តែម រី។

⁶ ខាន់ពាង់គឹតឆាក់ខាន់ពាង់នើមតីសមឞើសរ៝ ជេសរីយោហាន-បាប់តែម ជានបាប់តែមយុកខាន់ពាង់មាទាកតាទាករាលាយយោរដាន់ រី។

⁷ ត៝ត់មាឆៃវាច់ផូងផារីឆី នទ្រែលមាផូងឆាដោឆី អ៝ក់ដ៝ង់ ហាន់អុចជានបាប់តែមយុកមាទាក ពាង់លាសខាន់ពាង់កើតនអា៖ “យេ! មពោលឞូនុយ្សអ្យើសឞូនុយ្សជាញតឹមឞានមាឞេសកូ ឞូម៝សមឞើសមាខាន់មៃទឹងគែសមាញច្វាត់ក្រាបឞើសនាវតេៈទោយ្សកោរាញឞ្រាសអីឞើយមាត៝ត់អ្យា?

⁸ លាសខាន់មៃមោអុចកោរាញឞ្រាសតេៈទោយ្ស លាសនទ្រីគុឆ៝ង់ជានអ្វែសហ៝ម់ គៃមាគឹតឆៃនូយ្សនហ៝ម់ខាន់មៃលែៈរាគ៝ល់ងាន់រ៝។

⁹ លើយហោមលាសអេងតាឆាក់ខាន់មៃនើម៖ «គ៝ប់លែៈឆៅអាឞ្រាហាម់ ងាន់ នទ្រីកោរាញឞ្រាសមោហោមអោសតេៈទោយ្ស»។ គ៝ប់លាសមាខាន់មៃ៖ ជេងឆៅអាឞ្រាហាម់ ទើមមោអោសគែសនាវខ្លៃ។ លុអ្យាកោរាញឞ្រាសឆ៝ៈញជេងឆៅអាឞ្រាហាម់ ជេងដ៝ង់។

¹⁰ អាបៃអ្យាកោរាញឞ្រាសអុចតេៈទោយ្សមាលែៈឞូនុយ្សអីមោជានអ្វែស។ ពាង់តឹមឞានមាឞូនុយ្សនទ្រាប់លើយពេសថាវតេៈតារែសតើមឆី ពាង់មរាកាល់លើយតើមឆីមោគែសព្លៃអ្វែស ជេសរីឆូលើយមាអុញ។

¹¹ គ៝ប់ជានបាប់តែមអ៝ន់ខាន់មៃយុកមាទាកទើម គៃមាញហើខាន់មៃលែៈរាគ៝ល់នូយ្សនហ៝ម់អ្យើសជេស។ យើនមាគែសទូហ្វេកោរាញឞើយត៝ត់ជេស ពាង់គែសនាវទើយរាលាវគ៝ប់ងាន់។ តានាប់ពាង់គ៝ប់ជេងឞូនុយ្សជេៈលេៈទើម ឞ៝លលាសគ៝ប់ឆើមទ្រ៝សនតោជ៝តពាង់ ហោមអែមោហ៝ៈទីដ៝ង់ដាសនាវជានការអ៝ន់មាពាង់។ ពាង់បាប់តែមអ៝ន់ខាន់មៃមាឞ្រាសហ្វេងអ្វែសអីក្ល៝សអ្វែស នទ្រែលមាអុញ។

¹² ពាង់តឹមឞានមាឞូនុយ្សញអោតទោង គៃមារាឆែងគុមមព្រោសលែៈឞាអីគែសតានតុកពាង់ព្លេននៃ។ ឞារាង្លៃពាង់ឆ៝ៈតោសព្រាប់តាជៃឞាពាង់នើម អីញឆ្យាប់ពាង់ឆូលើយមាអុញមោអោសឞ្លាវញហ៝ត់។ កើតនទ្រីពាង់តឹមងខាសលើយឞូនុយ្សឆ៝ង់ដាសឞូនុយ្សតីស ជេសរីតេៈទោយ្សមាឞូនុយ្សតីស”។

ឞ្រាសយេឆូ ទើននាវបាប់តែមយុកមាទាក
( មក ១:៩-១១ ; លក ៣:២១-២២ ; យហ ១:៣២-៣៤ )

¹³ នោកនៃឞ្រាសយេឆូ ហាន់តាៈឞើសឞ្រីកាលីលេ ហាន់ម៝ប់យោហាន-បាប់តែម តាទាករាលាយយោរដាន់ គៃមាអ៝ន់យោហាន-បាប់តែម ជានបាប់តែមយុកពាង់មាទាក។

¹⁴ យើនមាត៝ត់តានៃយោហាន រាលាច់លាសមាពាង់៖ “មើមហាន់តាគ៝ប់ ដាៈគ៝ប់ច្រាវជានបាប់តែមយុកមៃមាទាក? ទីលាសមៃឆើមជានអ៝ន់គ៝ប់”។

¹⁵ ឞ្រាសយេឆូ លាស៖ “អាបៃអ្យាអ៝ន់មៃជានប៝ត់ទោ គៃមាជានតឹមទីទាទេដាសនាវកោរាញឞ្រាសលែៈដាៈ”។ ជេសរីយោហាន-បាប់តែម អុចជាន។

¹⁶ ជេសឞ្រាសយេឆូ ទើនបាប់តែមយុកមាទាក នោកពាង់លោសឞើសទាកនៃ ទោមាឆៃត្រោកពើកឞ៝ង់លាហឺរមាពាង់ ជេសរីពាង់ឆៃឞ្រាសហ្វេងអ្វែសកោរាញឞ្រាសតឹមឞានមាព្លុកជុរទ្រ៝ម់តាពាង់រី។

¹⁷ ទោលនៃគែសតាង់នតែសឞ៝រ់តាៈឞើសកាលើត្រោកលាស៖ “អ្យាក៝នគ៝ប់រ៝ង់ គ៝ប់រាម់រាហើនមាពាង់ហោងាន់ងេន”។

« Vorige

Wycliffe Bible Translators, Inc.

Volg ons:

Geborgde skakels

Advertensies