Aanlyn Bybel

Mathay 11 - Bunong

¹ ជេសឞ្រាសយេឆូ លាសនាវអីនៃអ៝ន់មា ១២ នុយ្សមពោលកោរាញអ៝សម៝នពាង់ ជេសរីពាង់លោសឞើសនតុកនៃ គៃមាហាន់នតុមនតីឞូរ៝ៈប៝នអេងៗ។

មពោលអ៝សម៝ន យោហាន-បាប់តែម ហាន់ម៝ប់ ឞ្រាសយេឆូ
( លក ៧:១៨-៣៥ )

² នោកនៃយោហាន-បាប់តែម ឞូក្រុងតានទ្រូង។ ត៝ត់ពាង់តាង់លឺឞូមឞើសងក៝ចទឹងលែៈនទើឞ្រាសក្រីស ជាន ពាង់ដាៈមពោលអ៝សម៝នពាង់ហាន់អោបឞ្រាសយេឆូ កើតនអា៖

³ “នោកកាល់អែនើសកោរាញឞ្រាសលែៈត៝នមាឞូនុយ្សនតើយ្សនាវងើយកោរាញឞ្រាសលាស៖ គែសឞ្រាសក្រីស អីនើមរាក្លាយ្សតាៈឞើសកោរាញឞ្រាសទែញជ្វាល់ជុរវាច់តាៈឞើសកាលើត្រោកនតុកកោរាញឞ្រាសនើម។ មៃអ្យាឞ្រាសក្រីស អីនៃឞើស មោលាសអ៝ន់ហេនហោមក៝ប់ទូហ្វេអាអេងជឹត?”

⁴ ឞ្រាសយេឆូ អើសមាខាន់ពាង់៖ “ខាន់មៃមឞើសងក៝ចមាពាង់រី ទឹងលែៈនទើខាន់មៃតាង់ខាន់មៃឆៃគ៝ប់ជាន។

⁵ ឞូនុយ្សចែសមាត់អ្វាញ់ឆៃ ឞូនុយ្សក្វែតរាវែនឞ្លាវឞ្រោៈ ឞូនុយ្សផុងឆាឞាស ក្ល៝ស ឞូនុយ្សតឹកតោរអ្យាត់តាង់ ឞូនុយ្សខឹតទ៝ក់រេស នអ៝ប់មាឞូនុយ្សអ៝អាចតាង់នាវមហែមហានអ្វែស។

⁶ អ្វែសមអាកងាន់មាឞូនុយ្សមោមអារ់នាវពាង់ញឆីងមាគ៝ប់ យ៝រមានទើគ៝ប់ជានអេងងាន់ឞើសនាវមឹនពាង់អុច!”

⁷ នទុតឆឹតផូងអ៝សម៝នយោហាន-បាប់តែម ឞ្រាសយេឆូ នតើមងើយមាយោហាន-បាប់តែម អ៝ន់មាផូងប៝នលាន៖ “ម៝សឞូនុយ្សអ្វាញ់ខាន់អៃមៃហាន់តាឞ្រីរាទាស? ហាន់អ្វាញ់ឞូនុយ្សអីងើយទាសមាឞូនុយ្សអេងៗអុចតឹមឞានមាជាមពាត់រាងោញទាសឆ្យាលមាខោមឞើស? ពាង់មោទីអោស។

⁸ ម៝សឞូនុយ្សខាន់អៃមៃហាន់អ្វាញ់? អ្វាញ់ឞូនុយ្សញឆ៝សឞ៝កអ្វែសអាវអ្វែសឞើស? មោអោស។ ឞូនុយ្សញឆ៝សឞ៝កអ្វែសអាវអ្វែស មពោលនៃគុតាជៃកាដាច់គុ មោអោសគុតាឞ្រីរាទាស។

⁹ លាសនទ្រីឞូម៝សឞូនុយ្សខាន់អៃមៃហាន់អ្វាញ់? អ្វាញ់ឞូនុយ្សនតើយ្សនាវងើយកោរាញឞ្រាសឞើស? ទីងាន់។ យើនមាពាង់អីនៃរាលាវមាឞូនុយ្សនតើយ្សនាវងើយកោរាញឞ្រាសជឹត។

¹⁰ យ៝រលាសតានាវកោរាញឞ្រាសងើយលែៈគែសញចីសលាសមាពាង់៖ «កោរាញឞ្រាសលាស៖ «ល៝ង់គ៝ប់ញជ្វាល់ឞូនុយ្សហាន់ល៝រមៃ គៃមានទ្រាប់នូយ្សនហ៝ម់ឞូនុយ្សអ៝ន់មាមៃតឹមឞានមាក្វាយ្សត្រ៝ងអ៝ន់មាមៃ»» យោហាន-បាប់តែម អីនៃអីឞូនុយ្សហាន់ល៝រតានាវអីនៃ។

¹¹ ខាន់អៃមៃអ្យាត់នាវគ៝ប់នហេលនានេៈងាន់ ទឹងលែៈឞូនុយ្សអីទែសតាៈឞើសឞូអូរតានែសនតូអ្យា មោគែសអោសទូហ្វេជេងក្វ៝ង់រាលាវយោហាន-បាប់តែម យើនលាសតាមពោលឞូនុយ្សអីកោរាញឞ្រាសម៝ត់អ្វាញ់ ឞូនុយ្សអីជេៈតាន៝ម់ឞូ ឞូនុយ្សអីនៃជេងក្វ៝ង់រាលាវយោហាន-បាប់តែម ងាន់។

¹² នតើមឞើសនារយោហាន-បាប់តែម ជានបាប់តែមត៝ត់មាអាបៃអ្យា គែសឞូនុយ្សញឆ្រោយ្សមឞើសងក៝ចមានាវកោរាញឞ្រាសម៝ត់អ្វាញ់ ជេសរីឞូនុយ្សអីញឆ្រោយ្សងាន់រីមើគែសលាប់។

¹³ ទឹងលែៈឞូនុយ្សនតើយ្សនាវងើយកោរាញឞ្រាសកាល់អែនើស នហ៝មាត៝ត់យោហាន-បាប់តែម លែៈគែសងក៝ចមានាវកោរាញឞ្រាសម៝ត់អ្វាញ់ នទ្រែលមាតានាវវៃផូងឞ៝ន់លែៈគែសមឞើសងក៝ចនាវអីនៃដ៝ង់។

¹⁴ តានាវវៃឞ៝ន់លែៈគែសមឞើសងក៝ចជេសមាទូហ្វេឞូនុយ្សនតើយ្សនាវងើយកោរាញឞ្រាសអីតឹមឞានមាអេលីយា ពាង់មរាវាច់ លាសខាន់អៃមៃអុចអ្យាត់នាវគ៝ប់ យោហាន-បាប់តែម ជេងឞូនុយ្សអីនៃ។

¹⁵ ឞូម៝សតាង់នាវគ៝ប់ងើយអ្យា អ៝ន់ពាង់មឹនអេងតាឆាក់!

¹⁶ លាសនទ្រីមើមគ៝ប់តឹមរាដឹលមាឞូនុយ្សអាបៃអ្យា? ខាន់ពាង់ជេងតឹមឞានមាក៝នឆែគុព៝ល់តាជ៝ង់គូងប៝ន គែសអាបាៈតឹមនតែរនទ្រាង់ខាន់ពាង់៖

¹⁷ «ហេនលែៈអោសនហោមគ៝សគ៝រ់ តីសមាខាន់អៃមៃមោព៝ល់រាម់មអាក(រ៝ម់)‌ ជេសរីហេនលែៈនអ៝រនត៝ង់ទ៝ង់ខឹត តីសមាខាន់អៃមៃមោអុចញុមនអ៝រដ៝ង់»។

¹⁸ នទ្រីយោហាន-បាប់តែម ពាង់អ៝ត់ឆោងឆា អ៝ត់ញេតនទ្រាញ់ តីសមាឞូលាសពាង់ឞូនុយ្សឞ្រាសអ្យើសលាប់។

¹⁹ ល៝ង់គ៝ប់អ្យាអីក៝នឞូនុយ្សតាៈឞើសកោរាញឞ្រាសគែសញេតគែសឆោង មោអ៝ត់ឆោងឆា ឞូលាសគ៝ប់៖ «ឞូនុយ្សហៃញេតហៃឆោង ជានមឹតជាង់ដាសឞូនុយ្សឆ៝ៈព្រាក់ប៝នលានគៃមាអ៝ន់កោរាញម៝ត់អ្វាញ់ ជេសរីគុនទ្រែលឞូនុយ្សតីសអាអេងជឹត»។ យើនមាឞូនុយ្សអីតឹងនាវកោរាញឞ្រាស ញហើនាវកោរាញឞ្រាសអីនៃជេងទីអ្វែសងាន់តានាវរេសពាង់”។

ឞ្រាសយេឆូ នទុយ្សប៝នអីទាង់ក៝
( លក ១០:១៣-១៥ )

²⁰ ជេសរីឞ្រាសយេឆូ នទុយ្សប៝នអីពាង់លែៈជាននាវខ្លៃអ៝ក់រាលាវឞូ យ៝រមាខាន់ពាង់មោអុចរាគ៝ល់នូយ្សនហ៝ម់អ្យើស ពាង់លាសកើតនអា៖

²¹ “រេសរាញាល់ងាន់មាឞូនុយ្សគុតាប៝នខោរាឆីន នទ្រែលមាប៝នបេតឆៃដា យ៝រលាសខាន់ពាង់លែៈឆៃទឹងលែៈនទើអ្វែសនទើខ្លៃគ៝ប់ជាន តីសមាមោអោសរាគ៝ល់លើយនូយ្សនហ៝ម់អ្យើស។ ឞូនុយ្សតាប៝នតីរុស នទ្រែលមាតាប៝នឆីដោន ជេងផូងមោគឹតនាល់កោរាញឞ្រាស លាសខាន់ពាង់ឆៃនាវខ្លៃអីនៃ ខាន់ពាង់រាគ៝ល់លើយនូយ្សនហ៝ម់អ្យើសរ៝ ជេសរីគៃមាញហើនាវខាន់ពាង់លែៈរាគ៝ល់លើយនូយ្សនហ៝ម់អ្យើស ខាន់ពាង់ញឆ៝សងគូតបាវច្យាត់គុតាអុញឞុស។

²² លាសនទ្រីគ៝ប់មឞើសងក៝ចមាខាន់អៃមៃ តានារកោរាញឞ្រាសផាតទោយ្សលាមនែសនតូតៃ ឞូនុយ្សតាប៝នតីរុស នទ្រែលមាតាប៝នឆីដោន ខាន់ពាង់គែសទោយ្សថើលតាន៝ម់ឞូនុយ្សគុតាប៝នខោរាឆីន ប៝នបេតឆៃដា ។

²³ ឞូនុយ្សគុតាប៝នកាពើនិម អីប៝នគ៝ប់គុជ៝ៈខៃ នទ្រែលមាគ៝ប់លែៈនតីលែៈជាននទើនាវខ្លៃ លើយអោសមឹនលាសឆាក់ខាន់អៃមៃនើមលែៈជេងឞូនុយ្សអ្វែសហាវតាប៝នអ្វែសកាលើ។ មោអោស ខាន់អៃមៃតៃតុបតានតុករេសរាញាល់តានទ្រូងអុញរ៝។ យ៝រលាសនាវខ្លៃអីលែៈគែសជេសតាងក្លាងខាន់អៃមៃ លាសប៝នឆោដុម អីជានតីសទុតហោកាល់អែនើស នទ្រីទឹងកោរាញឞ្រាសទែលើសហេងខាន់ពាង់មាអុញឞើសកាលើត្រោក ខាន់ពាង់ឆៃកើតនៃ ឞូនុយ្សតាប៝ននៃមោអោសគែសរ៝ស ហោមត៝ត់តានារអាបៃអ្យា។

²⁴ នទ្រីទឹងគ៝ប់លាសមាខាន់អៃមៃ តានារកោរាញឞ្រាសផាតទោយ្សទឹងលែៈឞូនុយ្សតានែសនតូតៃ ឞូនុយ្សតាៈឞើសឞ្រីប៝នឆោដុម គែសទោយ្សថើលទើមតាន៝ម់ខាន់អៃមៃ”។

ឞ្រាសយេឆូ លាសអ្វែសមា ឞឹពាង់ នើម
( លក ១០:២១-២២ )

²⁵ ជេសរីឞ្រាសយេឆូ លាសកើតនអា៖ “ហើយឞឹ អីកោរាញមាត្រោក នទ្រែលមានែសនតូ គ៝ប់រានេមៃហោងាន់ យ៝រលាសមៃលែៈញហើនាវមៃនតើមម៝ត់អ្វាញ់ឞូនុយ្សអ្យាអ៝ន់មាឞូនុយ្សរាលូកម៝ល់មោវ៝ត់តឹមឞានមាក៝នឆែ ជេសរីពោននទ៝ប់លើយនទើអីនៃមាឞូនុយ្សអីកើបអេងឆាក់ខាន់ពាង់នើមជេងឞូនុយ្សគឹតឞូនុយ្សឞ្លាវ។

²⁶ ហើយឞឹ នូយ្សនហ៝ម់មៃអុចកើតនអារ៝។

²⁷ ទឹងលែៈនតីលនទើ លែៈឞឹជាវមាគ៝ប់ទាទេជេស។ មោគែសអោសឞូនុយ្សគឹតនាល់គ៝ប់អីក៝នមៃ គែសមៃអីឞឹគ៝ប់នើមទើមគឹតនាល់។ មោគែសអោសឞូនុយ្សគឹតនាល់មៃអីឞឹគ៝ប់ គែសគ៝ប់អីក៝នមៃទើមគឹតនាល់ នទ្រែលមាទឹងលែៈឞូនុយ្សអីគ៝ប់អុចអ៝ន់គឹតនាល់មៃ ទូរីទើម”។

ឞ្រាសយេឆូ ក្វាល់ឞូវាច់គុរាលូតា ពាង់

²⁸ “ឞូម៝សគែសនាវលេតរាគាញ់ នទ្រែលមាអាញជ៝ក់ វាច់ហ៝ម់អាគ៝ប់ គ៝ប់អ៝ន់ខាន់អៃមៃរាលូ។

²⁹ ឆ៝ៈហ៝ម់នទើមឞាក់គ៝ប់ ជេសរីនតីតាៈឞើសគ៝ប់ នូយ្សនហ៝ម់ខាន់អៃមៃនអីករាងេតងាន់រ៝ យ៝រលាសនូយ្សនហ៝ម់គ៝ប់មលែស នទ្រែលមាទេសរាហេត។

³⁰ នទើមឞាក់គ៝ប់ងគើច នទ្រែលមានទើគ៝ប់អ៝ន់ខាន់អៃមៃអាញងគើចដ៝ង់”។

« Vorige

Wycliffe Bible Translators, Inc.

Volg ons:

Geborgde skakels

Advertensies