Māreko 9 - Te Koreromotu Ou - Reo Maori Kuki Airani

¹ Kua karanga atura 'oki a Iēsū ki te urupū tangata ma tāna au pipi, “Koia mou tāku e karanga atu ki a kōtou na, kāre tēta'i pāpāki o te aronga e tū mai i konei e roko'ia e te mate, e kite ei rātou i te bāsileia o te Atua i te tae'anga mai ma te mana.”

Tō Iēsū 'akatūkē'anga'ia

² E topa akera ngā rā e ono, kua arataki atura a Iēsū i a Pētero, i a Iākōbo ē i a Ioane ki runga i tēta'i maunga teitei, ko rātou anake 'ua. Ē kua 'akatūkē'ia aia ki mua i a rātou.

³ Kakā rava akera tōna kāka'u, ma'ata 'ua atura te teatea; kāre rava 'e tangata tāmā kāka'u i te ao nei e tau i te 'aka'āite i te reira i te teatea.

⁴ Ē kua mama maira a Ēlia rāua ko Mōse ki a rātou, ē tē tuatua 'ua ra rāua ē ko Iēsū katoa 'oki.

⁵ Kua tuatua maira a Pētero ki a Iēsū, “E Rabi, 'e mea meitaki kia no'o tātou i konei; ē e 'akatū mātou i e toru 'are pū'ākapa: nō'ou tēta'i, nō Mōse tēta'i, nō Ēlia 'oki tēta'i.”

⁶ Kāre aia i kite i tāna tuatua, 'e kō'iri'iriā ma'ata 'oki tō rātou.

⁷ Ē tēta'i tiao maira i te tāmaru'anga mai nā runga a'o i a rātou, ē tēta'i reo maira 'oki nō roto mai i taua tiao ra, nā kō maira, “Ko taku Tamaiti tēia, tei 'akaperepere'ia. E 'akarongo kōtou i aia!”

⁸ 'Ākara i'ora rātou e pini 'ua ake, ē kāre rava 'e tangata i kitea, māri rā ko Iēsū ē ko rātou katoa 'oki.

Te tuatua i a Ēlia

⁹ Ē tei tō rātou 'eke'anga mei runga i te maunga ra, kua ako atura a Iēsū i a Pētero mā ē, auraka rava rātou e 'akakite atu ki tēta'i tangata i tā rātou i kite ra ē kia tū mai te Tamaiti a te Tangata mei te mate maira.

¹⁰ Kua tāmou meitaki rātou i taua tuatua ra. Kua 'uri'uri manako rā rātou i rotopū i a rātou 'ua'orāi i te 'āite'anga o taua tū'aka'ou'anga mei te mate maira.

¹¹ Kua ui maira rātou ki a Iēsū, nā kō maira, “'E a'a i tuatua mai ei te au Pū'āpi'i Ture ē, ko Ēlia te ka nā mua mai?”

¹² Kua pa'u atura aia ki a rātou, “E nā mua tikāi 'oki a Ēlia i te 'aere'anga mai e 'akatika i te au mea kātoatoa. 'E a'a rā i tātā'ia ai te Tamaiti a te Tangata nei, 'e mānganui tōna mate ē e 'akava'ava'a'ia?

¹³ Tē karanga atu nei rā au ki a kōtou ē, kua riro mai ana a Ēlia. Ē mei tei tātā'ia ia ra, kua rave rātou i tā rātou i 'inangaro i aia.”

Tē 'akaora nei a Iēsū i tēta'i tamāroa 'e vaerua kino tōna

¹⁴ Ē kia 'oki mai a Iēsū ki te katoa'anga o tāna au pipi ra, kite maira rātou i te urupū ma'ata i te tākako'anga i tāna au pipi ra, ē te au Pū'āpi'i Ture i te tau'ētono'anga ki a rātou.

¹⁵ E 'ākara akera te au tangata i a Iēsū, pō'itirere atura rātou, 'oro atura, e aro'a atu i aia.

¹⁶ Kua ui atura aia ki taua au Pū'āpi'i Ture ra, “'E a'a tā kōtou i tau'ētono ki a rātou ra?”

¹⁷ Kua pa'u maira tēta'i i taua urupū ma'ata ra, “E te Pū'āpi'i ē, i arataki mai nei au i taku tamaiti ki a koe nei, 'e vaerua mūrare 'oki tōna.

¹⁸ Ē te ngā'i i 'opukia mai ei aia, e 'a'ae'ia i'ora aia i reira ra. 'Uka'ia i'ora te va'a, ē pākati 'oki te ni'o. Kua 'īkoke roa akera. I tuatua ana 'oki au ki tō au pipi ē, e tuaru i te dēmoni, kāre rā i rauka i a rātou.”

¹⁹ Kua karanga atura aia ki a rātou, nā kō atura, “Auē ia uki 'akarongokore ē! Mei te a'a te roa o tōku no'o'anga ki ō kōtou nei? Mei te a'a te roa o tōku 'akakoromaki'anga atu i a kōtou? E 'apai mai i te tamaiti ki āku nei.”

²⁰ Kua arataki maira rātou i aia. Ē tei te kite'anga aia i a Iēsū ra, 'a'ae'ia maira aia e taua vaerua ra, topa i'ora ki raro i te one, takaviri 'ua atura, 'uka'ia i'ora te va'a.

²¹ Kua ui atura a Iēsū ki te metua tāne, “Mei nā'ea mai tōna roko'ia'anga i tēianei maki?” Kua pa'u maira aia, “Mei tōna meangiti'anga mai.

²² Kua mānganui ake nei te 'uri'anga'ia ki roto i te a'i ē ki raro i te vai kia tāmate atu i aia. Mē ka tika i a koe, e tangi mai koe i a mātou ē e tauturu mai.”

²³ Kua karanga atura a Iēsū ki aia, “Mē kua tika i a koe! 'E tika te au mea kātoatoa i te tangata 'irinaki ra.”

²⁴ Kua kāpiki 'ua maira te metua tāne o taua tamaiti ra, nā kō maira ma te roimata katoa ra, “E te 'Atu, kua 'irinaki au; e tauturu mai i āku i tōku 'irinaki'anga meangiti nei.”

²⁵ Ē kia 'ākara atura a Iēsū i te tangata i te 'oro 'ua'anga mai, kua kauvae atura aia i taua vaerua vi'ivi'i ra, nā kō atura, “E tērā ra vaerua mūrare ē te turi, e 'aere koe ki va'o, tē 'akaue atu nei au ki a koe. Auraka e tomo 'aka'ou ki roto i aia.”

²⁶ Kua kāpiki 'ua maira taua dēmoni ra, kua 'a'ae nui maira i aia, ē kua 'aere maira ki va'o. Tū tangata mate atura tō taua tamaiti ra. Ē nō reira, 'e mānganui tei karanga ē, “Kua mate rava.”

²⁷ Kua rave i'ora a Iēsū i tōna rima, 'akaara akera i aia. Kua tū 'ua maira aia ki runga.

²⁸ E tae maira a Iēsū ki roto i te 'are, kua ui pōiri maira tāna au pipi ki aia, “'E a'a i kore ei i rauka i a mātou nei kia tuaru atu i taua dēmoni ra ki va'o?”

²⁹ Kua pa'u atura aia, “Kāre tēianei tū e tae 'ua ki va'o, māri rā i te pure.”

Tē tuatua 'aka'ou nei a Iēsū i tōna mate

³⁰ 'Akaruke i'ora a Iēsū ē tāna au pipi i taua ngā'i ra, 'aere atura nā Galilea. Tē 'inangaro ra 'oki aia ē, auraka tēta'i tangata kia kite,

³¹ tē 'āpi'i ra 'oki aia i tāna au pipi. Kua nā kō atura aia ki a rātou, “E tuku'ia te Tamaiti a te Tangata nei ki te rima tangata, ē e tā tākiri rātou i aia, ē kia oti i te tā, e tū 'aka'ou aia ki runga i te pō toru.”

³² Kāre rā rātou i mārama i taua tuatua ra, ē kua mataku 'oki i te ui atu ki aia.

Ko 'ai tei ma'ata rava atu?

³³ E tae atura a Iēsū ē tāna au pipi ki Kāperenāuma, kua ui atura aia ki tāna au pipi i roto i te 'are, “I tau'ētono ana kōtou i te a'a i te arāta'a ra?”

³⁴ Mūtēkī 'ua i'ora rātou. I tau'ētono ana 'oki rātou rātou 'ua'orāi i te arāta'a, ko 'ai te ka ma'ata i a rātou.

³⁵ No'o i'ora a Iēsū ki raro, kua kāpiki maira i te tino nga'uru mā rua ra, kua karanga atura ki a rātou, “Ko te tangata i 'inangaro ē 'ei mua aia, 'ei 'aka'openga rava aia e tikāi, ē 'ei tāvini nō te kātoatoa.”

³⁶ Kua rave i'ora aia i tēta'i tamaiti iti, kua tuku atura ki rotopū i a rātou, kua 'iki'iki i'ora, nā kō atura ki a rātou,

³⁷ “Ko tei 'āriki mai i tēta'i tamaiti iti mei tēianei nō tōku nei ingoa, kua 'āriki mai ia i āku, ē ko tei 'āriki mai i āku ra, kāre ia ko au tāna i 'āriki maira, ko ia rā ko tei tono mai i āku nei.”

Ko tei kore e pāto'i mai i a tātou nō tātou aia

³⁸ Kua tuatua maira a Ioane ki a Iēsū, nā kō maira, “E te Pū'āpi'i, i 'ākara ana mātou i tēta'i tangata i te tuaru'anga i te dēmoni i tō'ou na ingoa. Kua karanga atura mātou ki aia, ‘Auraka,’ nō te mea, kāre aia i āru mai i a tātou nei.”

³⁹ Kua karanga atura a Iēsū, “Auraka e tāpū atu i aia. Kāre rava 'e tangata e rave i te 'akairo i tōku nei ingoa ē e 'akakino vave mai i āku.

⁴⁰ Ko tei kore 'oki e pāto'i maira, nō tātou ia.

⁴¹ Ko tei 'ōronga 'ua mai i tēta'i kapu vai nā kōtou e inu, nō te mea nō te Mesia kōtou, koia mou tāku e karanga atu ki a kōtou na, kāre aia e ngere i tāna tūtaki.”

Te tīmata'anga kia rave i te 'ara

⁴² “Ko tēta'i 'ua atu tei 'akatārevakē i tēta'i o tēianei au tangata rikiriki e 'irinaki mai nei i āku, 'e ngari ake aia kia rī'ia tēta'i toka tāviri'anga ki runga i tōna kakī ē kia titiri'ia ki raro i te tai.

⁴³ Tē 'apa ra koe i tō rima ra, ka tīpū kē atu; e meitaki ake koe kia tae ki te ao ra i te rima 'okota'i, i te rima rua kia tae ki te pō, ki roto i te a'i matekore.

⁴⁵ Ē tē 'apa ra koe i tō vaevae ra, e tīpū kē atu; e meitaki ake koe kia tae pirikoki ki te ao ra, i te vaevae rua kia titiri'ia ki te pō, ki roto i te a'i matekore.

⁴⁷ Ē tē 'apa ra koe i tō mata, kō'iti kē atu; e meitaki ake koe kia tae ma te mata 'okota'i ki roto i te bāsileia o te Atua, i te mata rua kia titiri'ia ki te a'i i te pō ra,

⁴⁸ i te ngā'i ‘e kore e mate tō rātou tunga, ē tō rātou a'i 'oki kāre e tāmate'ia.’

⁴⁹ “E 'ope rava 'oki te tangata i te tāmiti'ia ki te a'i.

⁵⁰ “'E mea meitaki te miti. Kia māngaro rā te miti, 'e a'a atura te mea e kavakava ai? Kia vai rāi te miti i roto i a kōtou, ē e tāmou 'oki i te 'au, kōtou kōtou 'ua'orāi.”