Māreko 7 - Te Koreromotu Ou - Reo Maori Kuki Airani

Te 'āpi'i'anga a te 'ui tupuna

¹ Kua 'uipā maira ki a Iēsū i reira te au Phārīsea ē ēta'i Pū'āpi'i Ture tei 'aere mai mei Iērūsalēma maira.

² Ē kua 'ākara rātou i ēta'i pipi āna i te kai'anga ma te rima vi'ivi'i, koia 'oki, te rima 'ōreikore'ia ra.

³ E 'ākono rāi 'oki te au Phārīsea ē te Ngāti Iūda katoa i te peu i tuku'ia mai e te aronga ta'ito ra, kāre e kai 'ua i te kai, e nā mua rā i te 'ōrei i te rima,

⁴ ē kāre 'ua e kaikai kia 'oki mai rātou mei te ngā'i 'oko'oko'anga ra, e nā mua rā i te 'ōrei. 'E mānganui te au peu kē atu tā rātou e 'ākono, koia 'oki, i te 'ōrei'anga i te au kapu ē te au pāni ē te au kapu veo ra ē te au ro'i 'oki.

⁵ Kua ui maira te au Phārīsea ē te au Pū'āpi'i Ture ki a Iēsū, “'E a'a tā'au au pipi nei i kore ei i 'ākono i tei tuku'ia mai e te aronga ta'ito ra? Tē kai nei rā rātou i te kai ma te rima 'ōreikore'ia ra.”

⁶ Kua pa'u atura a Iēsū ki a rātou, nā kō atura, “Tē tika 'ua ra tā Īsaia i tōna toto'u'anga i a kōtou, e te au tangata tāpikipiki ē, mei tei tātā'ia ra ē, ‘Tē 'akangāteitei mai nei tēianei aronga tangata i āku ki tō rātou ngutu, tei te ātea kē roa rā tō rātou ngākau i āku.

⁷ 'E 'akamori'anga pu'apingakore ra tā rātou i āku, ē ko tā rātou 'āpi'i'anga rā, nā te tangata 'ua 'oki te reira i tuku mai.’

⁸ “Tē 'ākono nei kōtou i tei tuku'ia mai e te tangata nei ma te 'akaruke i tā te Atua ra 'akaue'anga.”

⁹ Ē kua nā kō atura aia ki a rātou, “'E kimi'anga rāvenga meitaki tā kōtou i te 'akakore i te 'akaue'anga a te Atua kia 'ākono'ia tā kōtou 'ua'orāi 'iku'iku'anga.

¹⁰ I tuatua mai 'oki a Mōse ē, ‘E 'akangāteitei atu i tō metua tāne ē tō metua va'ine,’ ē pērā katoa atura, ‘Ko tēta'i 'ua atu tei 'akakino atu i tōna metua tāne, mē kāre ra metua va'ine, kia tāmate tākiri roa'ia ia.’

¹¹ Tē tuatua nei rā kōtou ē, Mē nā kō atu tēta'i tangata ki tōna metua tāne, mē kāre ra metua va'ine ē, ‘Ko tēta'i 'ua atu tauturu te ka rauka i a koe mei konei i āku nei, e Corban ia,’ koia 'oki, 'e 'ātinga tapu ia ki te Atua.

¹² Kāre e tika 'aka'ou i aia kia tākinga meitaki aia i tōna metua tāne, mē kāre ra metua va'ine.

¹³ Tē pērā nei 'oki kōtou i te 'akakore'anga i tā te Atua ra tuatua nā roto i te au 'iku'iku'anga tā kōtou e 'āpi'i atura. Ē mei te reira tā kōtou e rave nei 'e mānganui.”

Ko te au mea e vi'ivi'i ei tēta'i tangata

¹⁴ Kua kāpiki 'aka'ou atura a Iēsū i te urupū tangata ki aia, ē kua nā kō atura ki a rātou, “E 'akarongo mai ana i āku nei, ko kōtou rava rāi kia nakiro.

¹⁵ Kāre rava e vi'ivi'i te tangata nei kia 'aere tō va'o ra ki roto i aia; ko te au mea rā tei 'aere atu ki va'o nō roto mai i aia ra e vi'ivi'i ei te tangata.”

¹⁷ Kia vai'o atu aia i te urupū tangata ra, ē 'aere maira ki roto i te 'are, kua ui maira tāna au pipi ki aia i taua parabole ra.

¹⁸ Ē kua pa'u atura aia ki a rātou, “Kāre rāi kōtou i mārama ana? Kāre rāi kōtou i kite ē, ko te au mea katoa nō va'o kia 'aere ki roto i te tangata, kāre aia i vi'ivi'i i te reira?

¹⁹ Kāre 'oki te reira i 'aere ki roto i tōna ngākau, ki roto rā i tōna kōpū, e 'akaruke'ia ki va'o.” Nā roto i tēia tuatua i 'āpi'i a Iēsū ē, 'e mā te au kai katoa.

²⁰ Ē kua nā kō atura aia, “Ko te mea tei 'aere mai nō roto mai i te tangata, ko te mea ia e vi'ivi'i ei te tangata,

²¹ nō te mea, nō roto mai i te ngākau o te tangata te au manako kikino, te moeāana, te keiā, te tā tangata,

²² te 'akaturi, te noinoi 'apinga, te manava kino, te pikika'a, te kanga, te vare'ae, te 'akakino Atua, te nengonengo ē te 'āuouō.

²³ Nō roto mai 'oki taua au mea kikino i te tangata, ē ko te au mea ia e vi'ivi'i ei te tangata.”

Te 'akarongo ma'ata o tēta'i va'ine

²⁴ Kua tū akera a Iēsū ki runga, 'aere atura mei reira ki te tu'anga 'enua o Tūria ra. Tomo atura aia ki roto i tēta'i 'are, i 'inangaro 'oki aia auraka tēta'i tangata kia kite. Kāre rā aia i ngaro.

²⁵ Tēta'i va'ine 'oki, i uru'ia tāna tamā'ine iti e te vaerua vi'ivi'i, kua 'akarongo akera aia nō runga i a Iēsū, ē kua 'aere maira, 'akatopa maira ki tōna pae vaevae.

²⁶ 'E Eleni 'oki taua va'ine ra, nō Phēnia Sūria. Kua pati maira aia ki a Iēsū, kia tuaru aia i te dēmoni mei roto mai i tāna tamā'ine ra.

²⁷ Kua karanga rā a Iēsū ki aia, “Kia pangia nā mua te tamariki e tikāi. Kāre i te mea meitaki i te rave i te kai a te tamariki ē ka titiri atu ei nā te au punua kurī.”

²⁸ Kua pa'u maira aia ki a Iēsū, nā kō maira, “E te 'Atu, tē kai ra rāi te au punua kurī i raro i te kaingākai i te 'unga'ungā kai a te tamariki.”

²⁹ Kua karanga atura a Iēsū ki aia, “Nō tēnā tuatua nā'au, ka 'aere ki te kāinga. Kua riro te dēmoni i roto i tō tamā'ine ki va'o.”

³⁰ Ē kua 'aere atura aia ki te ngutu'are, ē kua kitea i'ora tāna tamā'ine ki runga i te ro'i, ē kua riro te dēmoni ki va'o.

Tē 'akaora nei a Iēsū i te tangata taringa turi ē te mūrare

³¹ Kua 'akaruke atura a Iēsū i te tu'anga 'enua o Tūria, 'aere atura nā roto i Sīdona ki te pae roto i Galilea i rotopū i te 'enua ra i Dēkāpoli.

³² Kua arataki maira rātou i tēta'i tangata taringa turi ē te mūrare ki aia ra, ē kua pati 'akatenga maira ki aia kia tuku atu i tōna rima ki runga a'o.

³³ Kua arataki kē atura a Iēsū i aia i taua urupū tangata ra, tuku i'ora i tōna mangamangā rima ki roto i ōna taringa, tūtu'a akera i te 'uāvare ē kua 'akatūkia atura i tōna arero ki tōna rima.

³⁴ Kua nānā akera ki runga i te rangi, ngunguru i'ora, ē kua nā kō atura ki aia, “Epheta!” koia 'oki, “Kia pu'ata!”

³⁵ Pu'ata i'ora ōna taringa, matara akera 'oki tōna arero, meitaki maira tāna tuatua i reira ra.

³⁶ Kua ako atura a Iēsū i a rātou, auraka rava rātou e 'akakite ki te tangata. Te ma'ata atu i aia i te ako atu i a rātou ē, “'Eia'a,” te ma'ata rava atu ia i tō rātou 'akakite 'aere'anga.

³⁷ Kua vā ma'ata i'ora rātou, nā kō akera, “'E mea tika rava te au mea kātoatoa tāna e rave nei; tē 'akapu'ata nei aia i te turi ē tē tuatua nei te mūrare i aia.”