Māreko 4 - Te Koreromotu Ou - Reo Maori Kuki Airani

Te parabole o te rūrū 'ua

¹ Ē kua 'āpi'i 'aka'ou atura a Iēsū i te pae roto ra. 'E urupū tangata ma'ata 'oki tei 'uipā mai ki aia ra, 'aere atura aia ki runga i tēta'i poti, no'o i'ora ki tai, tē tū mai rā te tangata tini i uta i te pae roto ra.

² Ē 'e ma'ata tāna 'āpi'i'anga i a rātou nā roto i te au tuatua parabole, i nā kō maira te 'āpi'i'anga mai:

³ “Ka 'akarongo mai ana! Inā, 'aere atura te rūrū 'ua e rūrū i te 'ua.

⁴ Ē tei te rūrū'anga ra, topa i'ora tēta'i pae ki te pae arāta'a, ē kua rere maira te au manu, kua kai i'ora.

⁵ Topa i'ora tēta'i pae ki te ngā'i paikea, kāre i ra'i te one i reira, ē tutupu vave 'ua atura, nō te mea, kua pāpaku 'ua te one.

⁶ E rā'ia i'ora, vera atura ia; ē nō te kore 'e aka, mae rava atura ia.

⁷ E topa i'ora tēta'i pae ki rotopū i te ngāngā'ere, tupu akera te ngāngā'ere, e pōkia i'ora, kāre akera i 'ua mai.

⁸ E topa i'ora tēta'i pae ki te ngā'i one meitaki, kua tupu ē kua 'u'ua i'ora, takitoru nga'uru, takiono nga'uru, takita'i 'ānere i te 'ua 'okota'i.”

⁹ Kua nā kō maira 'oki a Iēsū ki a rātou, “'E taringa tōna 'ei 'akarongo'anga ra, e 'akarongo aia.”

Te 'akakoro'anga o te au parabole

¹⁰ Ē kia riro mai a Iēsū ra, kua ui maira te aronga i vaitata a'o ma te tino nga'uru mā rua ra ki aia i taua parabole ra.

¹¹ Kua karanga atura aia ki a rātou, “Kua 'ōronga'ia mai ki a kōtou te kite i te au mea ngaro o te bāsileia o te Atua ra; kāreka tō rātou i va'o ra, i tuatua parabole'ia mai taua au mea katoa nei ki a rātou,

¹² ‘kia kore rātou e kite mai i tā rātou e 'ākara ra, ē kia kore 'oki e mārama i tā rātou e 'akarongo ra, ko te 'aka'āriu'ia mai ā'ea rātou, ē ko te 'akakore'ia tā rātou 'ara.’ ”

Tē 'akamārama nei a Iēsū i te 'āite'anga o te parabole o te rūrū 'ua

¹³ Kua nā kō maira a Iēsū ki tāna au pipi, “Kāre rāi kōtou i mārama i taua parabole nei? 'E a'a kōtou i mārama ai i te au parabole katoa nei?

¹⁴ Ko te rūrū 'ua ra, ko ia te rūrū i te tuatua.

¹⁵ Te pae arāta'a ra i topa'ia e tēta'i pae 'ua ra, ko ia te aronga i 'akarongo i te tuatua, kua 'aere maira a Sātani, ē kua rave atura i te tuatua i rūrū'ia ki roto i tō rātou ngākau ra.

¹⁶ Te ngā'i paikea ra i topa katoa'ia e tēta'i pae 'ua, ko ia te aronga i 'āriki i te tuatua ma te rekareka i te 'akarongo'anga ra.

¹⁷ Kāre rā i aka'ia i roto i a rātou, 'e tāpū'anga poto 'ua tā rātou. Kia roko'ia e te tūmatetenga ē kia tākinga kino'ia nō taua tuatua ra, maitu atura i a rātou i reira.

¹⁸ Te ngā'i ngāngā'ere i topa katoa'ia e tēta'i pae 'ua, ko ia te aronga e 'akarongo i te tuatua,

¹⁹ ē e 'ī'ī atura i te apiapi o te ora'anga nei, te pikika'a o te 'apinga nui ē te 'inangaro ma'ata i ēta'i mea kē, pōkia atura te tuatua, kāre atura i 'ua mai.

²⁰ Te ngā'i one meitaki rā i topa'ia e tēta'i pae 'ua ra, ko ia te aronga i 'akarongo i te tuatua, tāpū piri i'ora, ē 'ua akera, takitoru nga'uru, takiono nga'uru, takita'i 'ānere i te 'ua 'okota'i.”

Te mōrī i tāpoki'ia

²¹ Kua nā kō maira a Iēsū ki tāna au pipi, “E 'apaina'ia āina te lāmepa kia tāpoki'ia ki raro ake i te 'āite ē ki raro 'oki i te ro'i ra? Auraka kia tukuna'ia āina ki runga i te vairanga?

²² Kāre rava 'e mea ngaro e kore e 'akakite'ia mai, kāre katoa 'oki 'e mea muna e kore e 'akakite kātoatoa'ia.

²³ 'E taringa tōna 'ei 'akarongo'anga ra, e 'akarongo aia.”

²⁴ Ē kua nā kō maira aia, “Kia matakite i tā kōtou e 'akarongo mai nei. Ko te 'āite tā kōtou e 'āite atu, ko tā kōtou rāi ia kia 'aka'āite'ia mai ē e tāma'ata'ia mai tā kōtou ra.

²⁵ Nō te mea, ko tei pu'apinga'ia, ka 'ōronga'ia atu ki aia; ē kāre āna ra, e rave kē'ia rāi tāna.”

Te parabole o te 'ua tupu

²⁶ Kua nā kō maira 'oki a Iēsū, “E 'āite te bāsileia o te Atua ki tēta'i tangata tei rūrū i te 'ua ki roto i tōna kāinga.

²⁷ Ē tē moe 'ua ra aia i te pō, ē tē ara 'ua ra i te ao, tē kao ra ē tē tupu 'ua ra taua 'ua ra, kāre aia i kite i te tupu'anga.

²⁸ Nā te one 'ua'orāi 'oki i 'akatupu ake: ko te kao'anga tei mua, 'ei reira te kā'ui'anga, ē i muri ake ko te sītona pakari i roto i te kā'ui.

²⁹ Ē kia pakari te sītona ra, kua rave aia i te kokoti i reira ra, nō te mea kua tae ki te kokoti'anga.”

Te parabole o te 'ua sīnapi

³⁰ Kua nā kō maira 'oki a Iēsū, “Ka 'aka'āite tātou i te bāsileia o te Atua ki te a'a? 'E a'a te parabole kia 'akatau tātou?

³¹ 'E 'āite ki tēta'i 'ua sīnapi. Kia tanumia 'oki ki raro i te one, 'e meangiti te reira i te 'ua tini rava rāi i roto i te one ra.

³² Kia tanumia rā, tupu akera, 'e ma'ata atura ia i te au rākau rikiriki rava rāi, toro atura tōna au mangamanga nunui, ē tō mai 'oki te au manu o te reva ki roto i tōna maru.”

³³ I pērā 'oki a Iēsū i te 'āpi'i'anga i te tangata tini i te tuatua parabole 'e mānganui, i tei tau i a rātou kia mārama.

³⁴ Ē kāre rava e 'āpi'i i a rātou ma te kore e tuatua parabole. Ē kia riro kē rā, kua 'akakite aia ki tāna au pipi i te 'āite'anga o taua au mea katoa ra.

Tō Iēsū 'akamarino'anga i te 'uri'ia

³⁵ E a'ia'i atura i taua rā ra, kua tuatua maira a Iēsū ki tāna au pipi, “E 'akatere atu tātou ki tērā pae.”

³⁶ Ē kia tuku atura rātou i taua 'aerenga tangata ra, tei runga 'oki aia i te poti, 'ano atura rātou, ē tēta'i aronga poti rikiriki katoa ra.

³⁷ Ē kua tupu maira tēta'i 'uri'ia ma'ata. Kua 'aere te kāre ki runga i te poti, kua kī rava te poti i te tai.

³⁸ Tē moe rā a Iēsū i te kōto'e i muri ki runga i tēta'i urunga. Kua 'akaara atura rātou i aia, nā kō atura, “E te Pū'āpi'i, kāre āinei koe e 'ākono mai i tō mātou mate?”

³⁹ Tū akera a Iēsū ki runga, kauvae atura i te matangi, ē nā kō atura ki te kāre, “Kua oti ana, kia 'ākī.” Tōrue atura te matangi, marino rava atura.

⁴⁰ Kua tuatua maira aia ki tāna au pipi, “'E a'a kōtou i mataku ei? Kāre rāi ā kōtou 'irinaki'anga?”

⁴¹ Mataku ma'ata rava atura rātou, ē kua nā kō akera rātou, rātou 'ua'orāi, “Ko 'ai tēia? I kauraro mai ei te matangi ē te kāre i aia!”