Māreko 2 - Te Koreromotu Ou - Reo Maori Kuki Airani

Tō Iēsū 'akaora'anga i tēta'i tangata maki 'akangoru

¹ E 'ope akera tēta'i au rā, 'oki 'aka'ou atura a Iēsū ki Kāperenāuma; ē kitea i'ora ē, tei te kāinga aia.

² Kua 'uipā maira te au tangata 'e mānganui ki reira, kāre 'oki e ō mai, kāre rāi 'oki i vaitata a'o i te ngūtupa. 'Āpi'i atura a Iēsū i te tuatua a te Atua.

³ Ē tē 'apaina'ia maira tēta'i 'akangoru e ngā tangata toko'ā.

⁴ Kāre ake rā rātou i ō mai nō te ra'i o te tangata, kua 'uaki akera i te tāpoki 'are i te ngā'i tei reira a Iēsū ra, e tuku maira i te 'akangoru ma te ro'i katoa ki raro, nā roto i te ngā'i i 'uaki'ia ra.

⁵ E kite atura a Iēsū i tō rātou 'irinaki'anga, kua nā kō atura ki taua 'akangoru ra, “E tama, kua 'akakore'ia tā'au 'ara.”

⁶ Tēta'i aronga 'āpi'i Ture i te no'o'anga i reira, kua nā kō akera i te 'ēumiumi'anga ki roto i a rātou 'ua'orāi,

⁷ “'E a'a tēianei tangata i 'akapērā ai i te 'akakino Atua? E matara 'oki te 'ara i a 'ai, māri rā i te Atua anake?”

⁸ Tē kite 'ua ra a Iēsū i roto i aia 'ua'orāi ē, tē 'ēumiumi 'ua ra rātou, kua nā kō atura aia ki a rātou, “'E a'a kōtou i 'ēumiumi 'ua ai i taua au mea nei i roto i tō kōtou ngākau?

⁹ Ko tē'ea te mea rave ngō'ie atu, ko te tuatua āinei ki te 'akangoru nei ē, ‘Kua matara tā'au 'ara,’ mē kāre ra, ko te tuatua ē, ‘Ka tū ki runga, ka rave i tō ro'i, ka 'aere’?

¹⁰ Ka 'akapāpū rā au ki a kōtou ē, 'e mana tō te Tamaiti a te Tangata i te ao nei kia 'akakore i te 'ara.” Kua nā kō atura aia ki taua tangata 'akangoru ra,

¹¹ “Tē karanga atu nei au ki a koe, ‘Ka tū, ka rave i tō ro'i, ka 'aere ki tō'ou ngutu'are!’ ”

¹² Tū akera aia ki runga i reira rāi, kua rave i'ora i tōna ro'i, 'aere atura ki mua i a rātou rava rāi. Ūmere anake i'ora rātou ma te 'akakakā i te Atua, nā kō akera, “I tēia 'ua nei rāi i kitea ai e tātou tēianei rāvenga.”

Te kāpiki'anga a Iēsū i a Levi

¹³ 'Aere 'aka'ou atura a Iēsū ki te pae o te roto o Galilea ra. Kua 'aere maira 'oki te tangata tini i reira ra ki aia, kua 'āpi'i atura aia i a rātou.

¹⁴ Ē tē 'aere atura aia kite atura aia i a Levi a Ālephaia ra, tē no'o ra ki roto i te 'are ko'i tero. Kua nā kō atura a Iēsū ki aia, “Ka āru mai i āku.” Tū akera a Levi ki runga, āru maira i a Iēsū.

¹⁵ Ē tē no'o ra a Iēsū i te kaingākai i roto i te 'are o Levi, kua no'o katoa maira te aronga ko'i tero ē te aronga rave 'ara 'e mānganui ma Iēsū katoa ē tāna au pipi ra. 'E mānganui 'oki o taua aronga ra i āru atu i aia.

¹⁶ E kite akera te au Pū'āpi'i Ture ē te au Phārīsea i aia i te kai'anga i te kai, ko ia ma te aronga ko'i tero ē te aronga rave 'ara, kua nā kō maira rātou ki tāna au pipi, “'E a'a aia i kai katoa ai ē i inu ei 'oki ma te aronga ko'i tero ē te aronga rave 'ara nei?”

¹⁷ E 'akarongo akera a Iēsū, kua karanga atura aia ki a rātou, “Kāre ē nō te aronga e meitaki te ora'anga te ta'unga, nō te aronga maki rā. Kāre au i 'aere mai e kāpiki i te aronga tuatua tika, i te aronga 'ara rā kia tatarā'ara.”

Te tūranga nō runga i te 'akakore'angā kai

¹⁸ Kua 'akakore te au pipi a Ioane ē tā te au Phārīsea katoa i te kai. Ē kua 'aere maira rātou ki a Iēsū, nā kō maira ki aia, “'E a'a te au pipi a Ioane ē te au pipi a te au Phārīsea i 'akakore ei i te kai, ē tā'au nei au pipi i kore ei i 'akakore i te kai?”

¹⁹ Kua nā kō atura a Iēsū ki a rātou, “Tē 'akakore nei āina te au 'oa o te tāne 'ōu ra i te kai, i te no'o katoa'anga o taua tāne 'ōu ra ki ō rātou? Tē no'o ra te tāne 'ōu i rotopū i a rātou, kāre ā rātou 'akakore'angā kai i reira.

²⁰ Tē vai atura te tuātau e 'apai kē'ia ai te tāne 'ōu ra; 'ei reira rātou e 'akakore ei i te kai.”

²¹ “Kāre 'e tangata e pānanaki i te kāka'u 'ōu ra ki runga i te kāka'u piro. Kia pērā, 'e ma'ata atu ia te nga'ae o tō te mea piro i taua pānanaki 'ōu ra.

²² Kāre 'oki 'e tangata e tuku i te uaina 'ōu ki roto i te 'āriki ta'ito. Kia pērā, e nga'ae te 'āriki i taua uaina 'ōu ra, maringi atura ia, ē kino rava atura te 'āriki. 'E 'āriki 'ōu rā tō te uaina 'ōu e tikāi.”

Te tūranga nō runga i te Sābati

²³ Ē tē 'aere atura a Iēsū i tēta'i Sābati nā roto i te koro sītona ra, 'u'uti 'aere i'ora tāna au pipi i te 'ua sītona.

²⁴ Kua tuatua maira te au Phārīsea ra ki aia, “Inā, 'e a'a rātou i rave ei i te mea taukore i te Ture i te Sābati?”

²⁵ Kua karanga atura aia ki a rātou, “Kāre āina kōtou i tatau i tā Dāvida i rave, ē tei kāpiti katoa ki aia, ka apiapi ei rātou, ka pongi ei 'oki?

²⁶ Ē i tomo aia ki roto i te 'are o te Atua ra, i te ta'unga ma'ata ra i a Ābiātara, ē kua kai i'ora i te mānga o te aroaro ra, ko tei kore i tau i te Ture kia kai, māri rā nā te kau ta'unga anake ra. Ē kua 'apai 'oki nā tei kāpiti katoa ki aia ra?”

²⁷ Kua nā kō atura 'oki aia ki a rātou, “I 'ākono'ia te Sābati nō te tangata, kāre te tangata nō te Sābati.

²⁸ Ē tēianei ko te Tamaiti a te Tangata nei, ko te 'Atu katoa ia o te Sābati.”