Māreko 11 - Te Koreromotu Ou - Reo Maori Kuki Airani

Tō Iēsū tomo'anga pāpānui ki roto i a Iērūsalēma

¹ Ē kia vaitata maira a Iēsū ē tāna au pipi ki Iērūsalēma, i Betephage ē Bētānia rātou i te Maunga o te Ōlive ra, kua tono atura a Iēsū i e tokorua pipi āna,

² ē kua nā kō akera ki a rāua, “E 'aere ki te 'ōire i mua i a kōrua. Kia tomo atu kōrua ki roto, ka kite kōrua i tēta'i punua 'āsini kua 'erekia, kāre 'oki i no'o'ia e te tangata. Ka tatara, e taki mai.

³ Ē kia ui mai tēta'i tangata ki a kōrua, ‘'E a'a kōrua i rave ei?’ e pa'u atu kōrua, ‘'E anoano tō te 'Atu nō te reira, ē nāna e 'aka'oki viviki mai ki konei.’ ”

⁴ 'Aere atura rāua ē kite atura i taua punua ra tei 'erekia i te pae ngūtupa i va'o ra i runga i te mataara, ē kua tatara i'ora.

⁵ Kua nā kō maira tēta'i pae o te aronga i tū 'ua i reira, “'E a'a kōrua i tatara ai i tēnā punua?”

⁶ Kua pa'u atura rāua ki a rātou i tā Iēsū i 'akaue maira; 'akatika maira rātou i a rāua kia rave 'ua na.

⁷ Kua taki maira rāua i taua punua ra ki a Iēsū, kua tuku atura i tō rāua pereue ki runga a'o, no'o i'ora aia ki runga a'o.

⁸ 'E mānganui 'oki tei to'ato'a i tō rātou pereue i te arāta'a, tēta'i pae rā to'ato'a i te au rārā rākau tā rātou i tīpū i te au kāinga.

⁹ Kua kāpikipiki 'ua maira te aronga i 'aere nā mua ra ē tei āru mai nā muri, nā kō maira, “Hōsāna! Kia 'akameitaki'ia aia ko tei 'aere mai ma te ingoa o te 'Atu!

¹⁰ Kia 'akameitaki'ia te bāsileia o tō tātou metua ra ko Dāvida ko tei tae mai! Hōsāna i te rangi teitei!”

¹¹ Kua tomo atura a Iēsū ki roto i a Iērūsalēma ē ki roto i te 'iero. Ē kia 'ope te au mea rava rāi i te 'ākara'ia e ia, 'aere kē atura aia ki Bētānia ma te tino nga'uru mā rua ra, nō te mea, kua a'ia'i ra.

Tauma'a i'ora a Iēsū i te pū suke

¹² E ao akera, tē 'oki maira a Iēsū ma te tino nga'uru mā rua mei Bētānia maira, pongi i'ora aia.

¹³ Kite atura aia i tēta'i pū suke i te ātea kē tē rau'ia ra. 'Aere atura aia e 'ākara i ō runga. E vaitata atura aia, kāre 'ua ō runga i kitea mai, māri rā ko te au rau anake 'ua. Kāre 'oki i tae ake ki te tuātau suke ra.

¹⁴ Kua karanga atura a Iēsū ki taua pū suke ra, nā kō atura, “Auraka 'e tangata e kai 'aka'ou atu i te kai nō runga a'o i a koe na e tuātau 'ua atu.” Ē kua 'akarongo mai tāna au pipi.

Te tāmā'anga i te 'iero

¹⁵ Kua tae maira a Iēsū ma te tino nga'uru mā rua ki Iērūsalēma. Kua tomo atura a Iēsū ki roto i te 'iero ra, ē kua 'akamata i te tuaru atu ki va'o i te aronga i 'oko atu ē i 'oko mai i roto i te 'iero ra, tātīpoki atura i te au kaingākai a te aronga tiēni moni ē te au no'o'anga o te aronga i 'oko i te au kūkupa ra.

¹⁶ Ē kāre rava aia i 'akatika i tēta'i 'ua atu tangata kia 'apai i tēta'i 'āriki 'apinga nā roto i te 'iero ra.

¹⁷ Kua 'āpi'i atura aia i a rātou, nā kō atura, “Kāre āina i tātā'ia ē, ‘E karanga'ia tōku 'are ē, 'e 'are pure'anga nō te au 'iti tangata rava rāi’? Kua 'akariro'ia i'o nei rā e kōtou 'ei ana nō te aronga keikeiā ra.”

¹⁸ E rongo akera te au Pū'āpi'i Ture ē te kau ta'unga nunui ra, kua kimi i'ora i tā rātou rāvenga e tā i aia, nō te mea, kua mataku rātou i aia. Tē vā anake 'oki te tangata tini i tāna 'āpi'i'anga.

¹⁹ E a'ia'i i'ora, 'aere atura a Iēsū ki va'o i taua 'ōire ra.

Te 'āpi'i'anga tei rauka mai nō runga i te pū suke

²⁰ E pōpongi akera, kia 'oki mai a Iēsū ma te tino nga'uru mā rua ra, 'ākara atura rātou i taua pū suke ra, kua mae rava atura mei te tumu mai rāi.

²¹ Kua ma'ara akera i a Pētero, ē kua nā kō atura ki a Iēsū, “E te Pū'āpi'i, inā, te pū suke tā'au i 'akakino ra, kua mae rava!”

²² Kua tuatua maira a Iēsū, nā kō maira ki a rātou, “'Ei 'irinaki'anga tō kōtou i te Atua!

²³ Koia mou tāku e karanga atu ki a kōtou nei, ko te tangata e karanga 'ua atu ki tēianei maunga, ‘Kia kiriti'ia koe ē kia titiri'ia atu ki roto i te tai’, ma te 'ēkōkōkore i tōna ngākau ē te manako tika ra ē, ko tāna e tuatua ra e tupu ia, e rauka i aia tāna e tuatua ra.

²⁴ Ē tēianei, e 'akakite atu au ki a kōtou ē, te au mea kātoatoa tā kōtou e pati kia pure ra, kia 'irinaki pāpū ē e rauka mai, e rauka mai'ia tā kōtou e pati ra.

²⁵ Ē kia pure kōtou, ē mē 'e manamanatā tō kōtou ki tēta'i kē ra, ka 'akakore i te reira, kia 'akakore katoa'ia tā kōtou au 'ara e tō kōtou Metua i te ao ra.”

Tē ui'ia nei te mana o Iēsū

²⁷ E tae 'aka'ou atura a Iēsū ma te tino nga'uru mā rua ra ki Iērūsalēma. Ē tē 'ā'āere 'ua ra aia i roto i te 'iero ra, kua 'aere maira te kau ta'unga nunui, te au Pū'āpi'i Ture ē te aronga pakari,

²⁸ kua nā kō maira ki aia, “Nō 'ai te mana kia rave koe i tēianei au mea? Mē kāre ra, nā 'ai i 'ōronga mai i te mana ki a koe 'ei rave i taua au mea nei?”

²⁹ Kua karanga atura a Iēsū, nā kō atura ki a rātou, “'E ui'anga katoa tāku ki a kōtou; ē kia pa'u mai kōtou ki āku, ka pa'u atu katoa au ki a kōtou i te tumu i rave ei au i taua au mea nei.

³⁰ I te bāpetīto a Ioane nei, nō te rangi mai āina, mē nā te tangata mai āina? Ka 'akakite mai.”

³¹ Kua 'uri'uri manako i'ora rātou i rotopū i a rātou 'ua'orāi, nā kō akera, “Mē tuatua tātou ē, ‘Nō te rangi mai’, e riro aia i te tuatua mai ē, ‘'E a'a i'ora kōtou i kore ei i 'āriki atu i aia?’

³² Mē tuatua rā tātou ē, ‘Nā te tangata...’ ” Kua mataku 'oki rātou i te urupū tangata, nō te mea, kua 'āriki te tangata kātoatoa ē, 'e peroveta tikāi a Ioane.

³³ Kua pa'u maira rātou ki a Iēsū, nā kō maira, “Kāre mātou i kite.” Kua karanga atura a Iēsū ki a rātou, nā kō atura, “Kāre katoa au e 'akakite atu ki a kōtou ē, nō 'ai te mana kia rave au i ēia mea nei.”