Luka 1 - Te Koreromotu Ou - Reo Maori Kuki Airani

Tomo tuatua

¹ 'E ma'ata rāi ake nei tei tīmata i te 'akapapa i te au mea tei tupu i rotopū i a tātou nei,

² mei tā rātou i tuku mai ki a tātou nei, ko tei kite tikāi tō rātou mata mei muatangāna mai, ē ko tei riro 'ei au tāvini nō taua tuatua ra.

³ Kua manako au, nō te mea kua kimikimi pū'ia e au te au mea kātoatoa mei muatangāna mai, 'e mea meitaki kia tātā katoa au i tēta'i 'akapapa'anga nā'au, e Teōphilo ngāteitei ē,

⁴ kia kite meitaki koe i te tika'anga tikāi o te au tuatua i 'āpi'i'ia atu ki a koe na.

Tē toto'u'ia nei te 'ānau'anga o Ioane Bāpetīto

⁵ I te tuātau o Heroda, te ariki nō Iūdea ra, tē no'o ra tēta'i ta'unga, ko Zākāria te ingoa, nō te pupu nō Ābia, ē 'e va'ine tāna nō te au tamā'ine a Āārona, ko Ēlīsābeta te ingoa.

⁶ 'E ngā tangata tuatua tika rāua i mua i te aroaro o te Atua, i te 'ākono mārie'anga i te au 'akaue'anga ē te au ture kātoatoa o te 'Atu ma te 'apakore.

⁷ Kāre ā rāua tamaiti, nō te mea, e pā a Ēlīsābeta, ē kua ma'ata rava tō rāua mata'iti.

⁸ Ē tē rave ra a Zākāria i te tao'onga ta'unga i mua i te aroaro o te Atua, i tei tau i tōna ra pupu.

⁹ Kua 'iki'ia 'oki aia nā roto i te au peu o te pupu ta'unga i te 'aere ki roto i te nao o te 'Atu kia tutungi i te rākau kakara.

¹⁰ Ē tē pure ra te tangata tini rava rāi i va'o i te tuātau i kā ei taua rākau kakara ra.

¹¹ Kua mama maira tēta'i 'āngela a te 'Atu ki aia, tē tū 'ua ra i te pae katau o te 'atarau o te rākau kakara.

¹² E kite akera a Zākāria, kō'iri'iriā akera ē kua roko'ia i'ora aia e te mataku.

¹³ Kua tuatua maira rā te 'āngela ki aia, “'Eia'a e mataku, e Zākāria ē, kua 'akarongo'ia 'oki tā'au pure. Ka 'ānau tā'au va'ine ko Ēlīsābeta i tēta'i tamaiti nā'au, ē nā'au e tapa i tōna ingoa ko Ioane.

¹⁴ Ka riro aia 'ei mataora ē 'ei rekareka ma'ata nō'ou, ē 'e mānganui te ka rekareka i tōna 'ānau'anga.

¹⁵ 'E ma'ata 'oki aia i mua i te aroaro o te 'Atu. Kāre aia e inu i te uaina ē te kava kona, ka 'akakī'ia rā aia e te Vaerua Tapu mei te kōpū mai o tōna metua va'ine.

¹⁶ Ē 'e mānganui te tamariki a Īserā'ela tāna ka 'aka'āriu ki te 'Atu ki tō rātou Atua.

¹⁷ Ē nā mua aia i te 'Atu i te 'aere ma te vaerua ē te mana o Ēlia, 'ei 'aka'āriu mai i te ngākau o te aronga metua ki te tamariki, ē te aronga 'akarongokore ki te pakari o te aronga tiratiratū ra, 'ei 'ākonokono i tēta'i 'iti tangata 'akate'ate'amamao'ia nō te 'Atu.”

¹⁸ Kua karanga atura a Zākāria ki te 'āngela ra, “'E a'a au e kite ei i te reira? 'E tangata rua'ine 'oki au ē kua ma'ata rava te mata'iti o tāku va'ine.”

¹⁹ Kua pa'u maira te 'āngela ki aia, nā kō maira, “Ko Gāberiela au, e tū ana au ki mua i te aroaro o te Atua; ē i tonokia mai nei au e tuatua ki a koe, ē e 'akakite ki a koe i taua tuatua meitaki nei.

²⁰ Ē inā, kāre koe e rauka i te tuatua 'aka'ou ē ka 'akamūrare'ia koe e tae 'ua atu ki te rā e tupu ei taua au mea nei, nō te mea, kāre koe i 'irinaki i tāku tuatua nei, te ka tupu i tōna tuātau tikāi.”

²¹ Ē tē tāpapa 'ua ra te tangata i a Zākāria ē tē ūmeremere 'ua ra i tōna tāvare'anga i roto i te nao ra.

²² Ē kia tae maira aia ki va'o, kāre e rauka i aia i te tuatua atu ki a rātou. Kua mārama rātou i reira ē, kua kite aia i tēta'i 'ōrama i roto i te nao ra. Nāna 'ua'orāi 'oki i tūngou mai ki a rātou, i te mea ē, tē mūrare ra rāi aia.

²³ E 'ope akera ōna puke rā rave 'anga'anga, 'aere atura aia ki tōna 'ua'orāi 'are.

²⁴ I muri ake i aua rā ra, kua tō i'ora tāna va'ine ko Ēlīsābeta. Kua no'o ngarongaro i'ora aia e rima marama, nā kō akera,

²⁵ “Ko tā te 'Atu tēia rāvenga i te au rā i 'ākara aro'a mai ei aia i āku, 'ei 'apai kē atu i tōku 'akamā i rotopū i te tangata nei.”

Tē toto'u'ia nei te 'ānau'anga o Iēsū

²⁶ Ē i te ono o te marama ra, kua tonokia maira te 'āngela ko Gāberiela mei te Atua maira ki tēta'i 'ōire i Galilea, ko Nāzarēta te ingoa,

²⁷ ki tēta'i pāretēnia ra i momoko'ia nā tēta'i tangata nō te kōpū tangata o Dāvida, ko Iōsēpha te ingoa. Ko Māria te ingoa o taua pāretēnia ra.

²⁸ Kia tomo mai te 'āngela ki roto ra, kua nā kō maira aia ki aia, “Kia orana koe, e tei 'akaperepere ma'ata rava'ia ē, tei a koe te 'Atu.”

²⁹ Kua kō'iri'iriā ma'ata i'ora aia i taua tuatua ra, ē kua 'ēumiumi i'ora aia 'e a'a te 'āite'anga o taua aro'a ra.

³⁰ Kua tuatua maira rā te 'āngela ki aia, “'Eia'a e mataku, e Māria ē, nō te mea, kua kitea aro'a'ia mai koe e te Atua.

³¹ Inā, ka tō 'oki koe ē ka 'ānau i tēta'i tamaiti, ē nā'au e tapa i te ingoa ko Iēsū.

³² Ka ma'ata aia ē ka tuatua'ia aia ē, ko te Tamaiti nā tei Teitei Rava. Ē nā te 'Atu ra, nā te Atua e 'ōronga mai i te terōno o tōna metua ko Dāvida nōna;

³³ 'ei aia te 'au i te kōpū tangata o Iākōba e tuātau 'ua atu, ē kāre rava ia e kore tōna bāsileia.”

³⁴ Kua karanga atura a Māria ki te 'āngela ra, “'Akapē'ea e tupu ei? Kāre 'oki au i kite i te tāne.”

³⁵ Kua pa'u maira te 'āngela i te nā kō'anga mai ki aia, “Ka 'eke mai te Vaerua Tapu ki runga a'o i a koe, ē nā te mana o tei Teitei Rava e tāmarū i runga a'o i a koe. Ē nō reira, ka tuatua'ia ai tēnā na tamaiti tapu i te Tamaiti nā te Atua.

³⁶ Ē inā, tō'ou taeake ko Ēlīsābeta, kua tō katoa aia i te tamaiti i tōna rua'ine'anga nei; ē ko te ono 'oki tēia o tōna marama, ko tei tuatua'ia ra ē, 'e pā.

³⁷ Kāre rava 'oki 'e mea e kore 'e rauka i te Atua.”

³⁸ Kua karanga atura a Māria, “Inā, 'ei tāvini au nō te 'Atu. Kia tupu ki āku mei tā'au e tuatua mai ana.” E kua riro kē atura te 'āngela.

Tō Māria 'ātoro'anga i a Ēlīsābeta

³⁹ Kua tū akera a Māria i aua rā ra, ē 'aere viviki atura ki tēta'i 'ōire nō Iūdea, i te pae 'enua maunga ra.

⁴⁰ Ē kua tomo atura ki roto i te 'are o Zākāria, aro'a atura i a Ēlīsābeta.

⁴¹ Tei te 'akarongo'anga atu a Ēlīsābeta i tō Māria aro'a'anga mai, kua keu i'ora te tamaiti i roto i tōna kōpū. Kua kī akera a Ēlīsābeta i te Vaerua Tapu,

⁴² ē kua kāpiki 'ua maira ma te reo ma'ata, nā kō maira, “Ko koe tei meitaki i te au va'ine nei, ē 'e meitaki 'oki te 'uānga o tō'ou kōpū.

⁴³ 'E a'a rā i tupu mai ei ki āku i 'aere mai ei te metua va'ine o taku 'Atu ki āku nei?

⁴⁴ Inā 'oki, tei te ō'anga mai tō'ou reo aro'a ki roto i ōku taringa, kua keu i'o nei te tamaiti i roto i tōku kōpū i te rekareka.

⁴⁵ 'E ao 'oki tōna tō tei 'irinaki ē e 'akatupu'ia 'oki te au mea tā te 'Atu i 'akakite mai ki aia ra.”

Tō Māria 'īmene 'akapa'apa'a'anga

⁴⁶ Kua karanga atura a Māria, “Tē 'akapa'apa'a nei tōku ngākau i te 'Atu,

⁴⁷ ē tē rekareka nei tōku vaerua i te Atua tōku 'Akaora,

⁴⁸ nō te mea, kua 'ākara aro'a mai aia i te 'aka'aka'anga o tōna tāvini. Inā 'oki, mei tēianei atu, e tuatua te au uki rava rāi i āku ē, 'e ao tōku.

⁴⁹ 'E rāvenga ma'ata 'oki tā tei mana i āku nei; e tapu 'oki tōna ingoa.

⁵⁰ Ē e vai rāi tōna aro'a ki te aronga i mataku i aia ra i tērā uki, i tērā uki.

⁵¹ Kua 'akakite aia i te mārōrō o tōna rima, kua 'akanga'oro aia i te aronga nengonengo i te manako o tō rātou ngākau.

⁵² Kua 'uri aia i te aronga mana ki raro i tō rātou no'o'anga, ē kua 'akateitei aia i te aronga 'aka'aka.

⁵³ Kua 'akakī aia i te aronga tei pongi i te meitaki, ē kua 'aka'oki aia i te aronga 'apinga nui ma te kore.

⁵⁴ Kua tauturu aia i tōna tāvini i a Īserā'ela i te 'akama'ara'anga i tōna aro'a,

⁵⁵ mei tāna i tuatua mai ki tō tātou 'ai tupuna ra, ki a Āberahāma ē tōna 'uānga e tuātau 'ua atu.”

⁵⁶ Kua no'o atura a Māria ki ō Ēlīsābeta ra e toru marama, e 'oki maira ki tōna ngutu'are.

Tō Ioane Bāpetīto 'ānau'anga mai

⁵⁷ E tae akera ki tō Ēlīsābeta ra tuātau e 'ānau ei tāna, kua 'ānau akera i tēta'i tamāroa.

⁵⁸ E rongo akera te au tangata tupu ē te kōpū tangata ē, 'e tākinga meitaki ma'ata tō te 'Atu ki aia, rekareka akera rātou ma ia katoa.

⁵⁹ Ē i te rā varu, kua tae mai rātou kia peritome i taua tamaiti ra, ē kua 'inangaro rātou i te tapa i aia ko Zākāria, i te ingoa o tōna metua.

⁶⁰ Kua 'akakite maira rā tōna metua va'ine, nā kō maira, “'Eia'a, e tapa rā i aia ko Ioane.”

⁶¹ Kua karanga atura rātou ki aia, “Kāre rava 'e tangata i tō'ou kōpū tangata i tapa'ia i te reira ingoa.”

⁶² Kua 'akatūtū atura rātou i tēta'i 'akairo ki te metua tāne ē, ko 'ai te ingoa tāna i anoano i te tapa i aia.

⁶³ Kua pati maira a Zākāria i tēta'i 'apinga 'ei tātā'anga tuatua, ē tātā i'ora ki runga a'o, nā kō akera, “Ko Ioane tōna ingoa.” Ē kua ūmere i'ora rātou rava rāi.

⁶⁴ I taua 'ati'anga rāi kua 'āmama akera tōna va'a ē kua matara akera tōna arero, ē kua tuatua i'ora aia ma te 'akameitaki i te Atua.

⁶⁵ Kua roko'ia i'ora aua tangata tupu rava rāi ra i te mataku, ē tuatua 'aere'ia i'ora taua au tuatua ra e pini rava ake i te pae 'enua maunga ra i Iūdea.

⁶⁶ Ē te aronga kātoatoa i 'akarongo i te reira, 'akaea atu mārie i'ora i roto i tō rātou ngākau, nā kō akera, “E riro 'ei a'a tēianei tamaiti?” Tei aia 'oki te rima o te 'Atu.

Te toto'u a Zākāria

⁶⁷ Ē kua kī akera tōna metua ko Zākāria i te Vaerua Tapu, kua toto'u i'ora, nā kō akera,

⁶⁸ “Kia 'akameitaki'ia te 'Atu, te Atua nō Īserā'ela, kua 'ātoro mai 'oki aia ē kua 'akaora mai i tōna 'iti tangata.

⁶⁹ Ē kua 'akatupu i tēta'i tara 'akaora nō tātou i te kōpū tangata o tōna tāvini ra ko Dāvida,

⁷⁰ mei tāna 'oki i tuatua mai nā roto i te va'a o tōna au peroveta tapu mei tupua mai,

⁷¹ 'ei 'akaora i a tātou mei roto mai i tō tātou au 'enemi, ē mei roto mai i te rima o te aronga katoa e mākitakita mai i a tātou nei;

⁷² i te aro'a'anga mai i tō tātou 'ai tupuna ē i te 'akama'ara'anga i te kōreromotu tapu nāna ra;

⁷³ i te taputo'u tāna i taputo'u ki tō tātou metua, ki a Āberahāma ē, e 'ōronga mai aia ki a tātou

⁷⁴ i 'akaora'ia mei te rima o tō tātou au 'enemi, kia 'akamori atu i aia ma te matakukore

⁷⁵ ma te tapu ē te tuatua tika i mua i tōna aroaro i te au rā kātoatoa o tō tātou ora'anga nei.

⁷⁶ Ē ko koe na, e tēianei tamaiti, ka tuatua'ia koe 'e peroveta o tei Teitei Rava. Ka 'aere 'oki koe nā mua i te 'Atu 'ei 'akate'ate'amamao i te mataara nōna;

⁷⁷ 'ei 'ōronga atu ki tōna 'iti tangata i te kite 'akaora kia 'akakore'ia tā rātou au 'ara.

⁷⁸ Nā roto i te ngākau aro'a o tō tātou Atua i taea mai ei tātou e te mārama nō runga mai;

⁷⁹ 'ei 'akamārama i te aronga e no'o i te pōiri ē te ngā'i maru mate, 'ei arataki 'oki i tō tātou vaevae nā te mataara 'au.”

⁸⁰ Ē kua tupu atura taua tamaiti ra, māro'iro'i atura te vaerua. No'o i'ora 'oki aia i te mēdēbara e tae 'ua akera ki te rā i 'akakite 'ua ai aia 'ua'orāi ki tō Īserā'ela.