Ioane 1 - Te Koreromotu Ou - Reo Maori Kuki Airani

Kua riro mai te Tuatua 'ei tangata

¹ I vai ana te Tuatua i muatangāna, i te Atua ra 'oki te Tuatua, ē ko te Atua 'oki te Tuatua.

² I te Atua ra 'oki aia i muatangāna.

³ Nā roto mai i aia te au mea kātoatoa; kāre 'ua tēta'i mea tei 'anga'ia, tei kore i 'anga'ia e ia.

⁴ Tei roto i aia te ora, ē taua ora ra tō te tangata ia mārama;

⁵ ē i kakā mai ana te mārama ki te pōiri, kāre rā te pōiri i 'āriki atu i te reira.

⁶ Tēta'i tangata ra tei tonokia mei kō mai i te Atua ra, ko Ioane te ingoa.

⁷ I 'aere mai aia 'ei kite, 'ei 'akakite'anga i taua mārama ra kia 'akarongo te tangata kātoatoa nā roto i aia.

⁸ Kāre rā aia i taua mārama ra, inārā, i 'aere mai aia 'ei 'akakite'anga i taua mārama ra.

⁹ Ko te mārama mou ra ko tei 'akamārama mai i te tangata kātoatoa, tei 'aere mai nei ki roto i te ao nei.

¹⁰ I te ao nei te Tuatua, ē nāna i 'anga i tēianei ao; kāre rā tō te ao i nakiro i aia.

¹¹ I 'aere mai nei aia ki ōna ra, kāre rā tōna au tangata tikāi i 'āriki atu i aia.

¹² Inārā, ko te aronga katoa rā i 'āriki atu i aia, i 'ō maira aia i te tika ki a rātou kia riro rātou 'ei tamariki nā te Atua, koia 'oki te aronga i 'irinaki i tōna ingoa;

¹³ ko te aronga rā i 'ānau ra, kāre i tō te toto, kāre 'oki i tō te 'inangaro o te kōpapa, kāre 'oki i tō te 'inangaro o te tangata, i tō te Atua rā.

¹⁴ I riro mai nei te Tuatua 'ei tangata, ē kua pū'ākapa mai ki ō mātou nei; kua kite ake nei mātou i tōna kakā, koia 'oki, te kakā e tau i te Tamaiti 'ānau ta'i a te Metua ra. Kua kī aia i te aro'a 'ua ē te tuatua mou ra.

¹⁵ Nōna tā Ioane i 'akaāri mai ē i 'akakite ra, ka nā kō mai ei ra ē, “Ko tēia 'oki tāku i karanga ra, ‘Ko te 'aere mai i muringa a'o i āku nei, kua riro aia tei mua i āku; ko mua 'oki aia i āku.’ ”

¹⁶ Ē nō tōna ra kī i rauka ai i a tātou katoa te aro'a 'ua ē te aro'a 'ua.

¹⁷ Nā Mōse 'oki i tuku mai i te Ture, kāreka te aro'a 'ua ē te tuatua mou, nā Iēsū Mesia ia.

¹⁸ Kāre 'ua tēta'i tangata i kite i te Atua; ko te Tamaiti 'ānau ta'i i runga i te umauma o te Metua ra, ko ia tei 'akakite mai i aia.

Te ako'anga a Ioane Bāpetīto

¹⁹ Tēia tā Ioane 'akakite'anga i te tono'anga mai te Ngāti Iūda i tēta'i kau ta'unga ra ē tēta'i aronga Ngāti Levi nō Iērūsalēma mai, e ui ki aia ē, “Ko 'ai koe?”

²⁰ Ē kua 'a'aki atura aia, kāre rava i 'u'una. Tēia tāna i 'a'aki, “Kāre au i te Mesia.”

²¹ Ē kua ui maira rātou ki aia, “Ko 'ai 'oki? Ko Ēlia āinei koe?” Kua pa'u atura aia, “Kāre au.” “Ko taua peroveta ra āinei koe?” Kua pa'u atura aia, “Kāre.”

²² Kua tuatua maira rātou ki aia, “Ko 'ai koe? 'Akakite mai 'ei tuatua'anga nā mātou ki te aronga i tono mai i a mātou. 'E a'a 'ua tā'au tuatua i a koe 'ua'orāi?”

²³ Kua karanga atura aia, “Ko te reo au nō tēta'i e kāpiki 'aere i te mēdēbara ra ē, ‘Ka 'akatika 'ua i te mataara o te 'Atu, mei tei karanga'ia mai e Īsaia peroveta ra.’ ”

²⁴ Nō te au Phārīsea 'oki taua aronga i tonokia maira.

²⁵ Kua ui maira rātou ki aia, nā kō maira, “'E a'a 'oki koe i bāpetīto ei, mei te mea ē, kāre koe i te Mesia, kāre katoa 'oki ko Ēlia, ē kāre 'oki taua peroveta ra?”

^26-27 Kua pa'u atura a Ioane, nā kō atura, “Tē bāpetīto nei au ki te vai; tē tū nei rā i rotopū i a kōtou tēta'i tei 'aere mai i muringa a'o i āku, kāre kōtou i kite i aia, kāre ia au e tau kia tatara i te 'ītiki i tōna tāmaka.”

²⁸ Tēia au mea nei kua tupu ki Bētānia i tērā pae mai i Iōrīdāna, i reira a Ioane i te bāpetīto'anga.

Te Punua Māmoe a te Atua

²⁹ E ao akera, kite atura a Ioane i a Iēsū i te 'aere'anga mai ki aia ra, ē kua nā kō akera, “Ka 'ākara na i te Punua Māmoe a te Atua, ko tei 'apai kē atu i te 'ara a tō te ao nei!

³⁰ Ko ia 'oki tēia tāku i karanga ra ē, ‘Tē 'aere mai nei tēta'i tangata i muringa a'o i āku nei, ē kua riro aia ki mua i āku; ko mua rāi 'oki aia i āku.’

³¹ Kāreka au, kāre au i nakiro i aia. Kia 'akaāri'ia rā aia ki tō Īserā'ela, ko te tumu ia i 'aere mai ei au e bāpetīto ki te vai nei.”

³² Kua 'akakite atura 'oki a Ioane, nā kō atura, “'Ākara atura au i te Vaerua i te 'eke'anga mai mei te rangi mai, mei te kūkupa ra te tū, ē kua no'o i'ora ki runga a'o i aia.

³³ Kāre rā au i nakiro i aia, inārā, ko tei tono mai i āku e bāpetīto ki te vai nei, ko ia tei karanga mai ki āku nei ē, ‘Ko tā'au e 'ākara i te Vaerua i te 'eke'anga mai ki runga a'o ē te no'o'anga katoa ki runga a'o i aia, koia ia, te ka bāpetīto ki te Vaerua Tapu.’

³⁴ Kite atura 'oki au, ē 'akakite atura 'oki au ē, ko te Tamaiti tēia nā te Atua.”

Te au pipi mua a Iēsū

³⁵ Ē e ao 'aka'ou akera, tē tū 'ua ra a Ioane ē ngā pipi tokorua āna ra,

³⁶ e kite atura aia i a Iēsū i te 'aere'anga mai nā reira, kua nā kō akera, “Ka 'ākara na i te Punua Māmoe a te Atua.”

³⁷ E 'akarongo akera aua ngā pipi ra i aia i te tuatua'anga, kua āru atura rāua i a Iēsū.

³⁸ Kua anga maira a Iēsū ki muri ē kite maira i a rāua i te āru'anga mai, kua ui maira ki a rāua, “'E a'a tā kōrua e kimi nei?” Kua pa'u atura rāua ki aia, “E Rabi (tēia 'oki te 'akatau'anga, e te pū'āpi'i), e no'o koe ki 'ea?”

³⁹ Kua tuatua maira aia ki a rāua, “Ka 'aere mai, ka 'ākara.” Āru atura rāua i aia, ē kite atura i te ngā'i i no'o ei aia, ē no'o atura ki ōna i taua rā ra. Kua tae pa'a ki te ora 'ā i te a'ia'i.

⁴⁰ Ko Ānēderea, te teina o Simona Pētero ra, tēta'i o aua tangata tokorua tei 'akarongo i te tuatua a Ioane ra, e āru atura i a Iēsū.

⁴¹ Ē ko ia tei kimi mua i tōna 'ua'orāi tuakana i a Simona, ē kua karanga atura ki aia, “Kua kite i a māua te Mesia.” (Tēia 'oki te 'akatau'anga, tei 'Akatā'inu'ia.)

⁴² Ē kua arataki maira aia i a Simona ki a Iēsū. Ē kia 'ākara akera a Iēsū i aia ra, kua nā kō atura, “Ko Simona koe, ko te tamaiti a Ioane; ka tapa'ia koe ē, ko Kepha” (tei 'akatau'ia ko Pētero).

Tō Iēsū kāpiki'anga i a Philipa ē Nātanāela

⁴³ Ē e ao akera, kua manako akera a Iēsū, ka 'aere atu aia ki roto i a Galilea. Kua 'ārāvei akera aia i a Philipa, ē kua karanga atura ki aia, “Ka āru mai i āku.”

⁴⁴ Nō Betesaida a Philipa, nō te 'ōire o Ānēderea ē Pētero.

⁴⁵ E kimi akera 'oki a Philipa i a Nātanāela, kua karanga atura ki aia, “Kua kitea e mātou tā Mōse i tātā ki roto i te Puka o te Ture ē tā te au peroveta i tuatua, ko ia, ko Iēsū nō Nāzarēta, te tamaiti a Iōsēpha.”

⁴⁶ Ē kua tuatua maira a Nātanāela ki aia, “'E mea meitaki āinei tō Nāzarēta mai?” Kua pa'u atura a Philipa ki aia, “Ka 'aere mai, ka 'ākara.”

⁴⁷ Kua kite atura a Iēsū i a Nātanāela i te 'aere'anga mai ki aia, ē kua tuatua i'ora i aia, “Ka 'ākara na i te Ngāti Īserā'ela tikāi. Kāre 'ua 'e pikika'a ō roto i aia.”

⁴⁸ Kua tuatua maira a Nātanāela ki aia, “Nō 'ea tō'ou nakiro i āku?” Kua pa'u atura a Iēsū, nā kō atura, “'Ōu a Philipa i kāpiki atu ei i a koe, 'ākara atura au i a koe i raro ake i te pū suke.”

⁴⁹ Kua pa'u maira a Nātanāela ki aia, nā kō maira, “E Rabi, ko te Tamaiti koe a te Atua. Ko te Ariki koe o Īserā'ela!”

⁵⁰ Kua pa'u atura a Iēsū ki aia, nā kō atura, “Nō te mea ē i karanga atu au ki a koe na ē, ‘Tē 'ākara atura au i a koe i raro ake i te pū suke ra’, i 'irinaki ei koe? 'E meangiti tēnā i tā'au ka kite ā muri nei.”

⁵¹ Ē kua karanga atura aia, “Koia mou tāku e karanga atu ki a kōtou na, mei tēianei ka kite kōtou i te rangi i te mavete'anga, ē te au 'āngela a te Atua i te kake'anga atu ē te 'eke'anga mai ki runga a'o i te Tamaiti a te Tangata nei.”