Iakobo 1 - Te Koreromotu Ou - Reo Maori Kuki Airani

Te aro'a'anga

¹ Ko au ko Iākōbo, 'e tāvini nō te Atua ē nō te 'Atu ra ko Iēsū Mesia, ki te au kōpū tino nga'uru mā rua i pue'urikiriki kē'ia i te ao nei. Kia orana kōtou.

Te 'irinaki'anga ē te pakari

² E aku au taeake, kia roko'ia kōtou e te au tīmata'anga tūkēkē ra, e manako 'ua ē, 'e mea rekareka 'ua te reira,

³ nō te mea, kua nakiro kōtou ē, mē tīmata'ia tō kōtou 'irinaki'anga ka tupu te 'akakoromaki.

⁴ E 'akapāpū rā kia rave te 'akakoromaki i tāna 'anga'anga katoa, kia riro kōtou 'ei aronga meitaki rava ē te 'apakore ma te kore e ngere i tēta'i 'ua atu mea.

⁵ Inārā, mē tē ngere nei tēta'i o kōtou i te pakari, ka pati aia i te reira ki te Atua ra, ē ka 'ōronga'ia ki aia. Ko te Atua 'oki e 'ōronga aro'a 'ua mai ē ma te 'akamurakore ki te tangata rava rāi.

⁶ Kia pati rā ma te 'irinaki'anga ē te 'ēkōkōkore. Ko tei 'ēkōkō ra, e 'āite aia ki te ngaru tai e pū'ia ē e tikitiki'ia e te matangi.

⁷ 'Eia'a taua tū tangata ra e manako ē, ka rauka i aia tēta'i mea nō kō mai i te 'Atu ra.

⁸ 'E tangata ngākau rua 'oki ia ē e pāpūkore aia i tōna au 'aerenga katoa ra.

Te ngere ē te 'apinga nui

⁹ Kia rekareka te taeake tūranga 'aka'aka i te mea ē kua 'akateitei'ia aia e te Atua.

¹⁰ Ko te 'apinga nui rā, kia rekareka ē kua tā'aka'aka'ia aia. Ka ngaro kē 'oki aia mei te tiare o te ngāngā'ere ra.

¹¹ Nō te mea, kua teitei te rā ma te veravera ma'ata, mae atura te ngāngā'ere, topa i'ora tōna tiare, ē ngaro atura taua tū mānea nōna ra. Pērā katoa ka ngaro rāi te tangata 'apinga nui i tōna kimi'anga pu'apinga.

Te au tīmata'anga

¹² 'E ao tō te tangata e 'akakoromaki i te tīmata'anga, nō te mea, mē oti te tīmata'anga ka rauka i aia te korōna ora tā te 'Atu i papa'u mai ki te aronga tei 'inangaro atu i aia.

¹³ 'Eia'a rava 'e tangata tei tīmata'ia mai e 'akakite ē, “Kua tīmata'ia au e te Atua.” Kāre 'oki e rauka kia tīmata'ia te Atua e te au mea kino, ē kāre katoa aia e tīmata i tēta'i 'ua atu tangata.

¹⁴ Kia tīmata'ia rā tēta'i tangata, kua 'akatātipakē'ia aia ē kua tā'ei'ia e tōna 'ua'orāi noinoi tikakore.

¹⁵ Kua tō i reira te noinoi tikakore ē kua 'ānau i'ora i te 'ara, ē te 'ara kia tupu ki te ma'ata roa ka 'ānau i te mate.

¹⁶ Auraka kōtou e vāvare, e aku au taeake 'akaperepere ē!

¹⁷ Te au 'apinga aro'a pu'apinga ē te meitaki rava kātoatoa mei runga mai ia, tē 'aere mai nei nō kō mai i te Metua o te au mārama o te rangi ra, kāre rava ōna tūkē'anga ē kāre aia e 'akatūkē'ia.

¹⁸ Nō tōna 'ua'orāi anoano i 'aka'ānau mai ei aia i a tātou nā roto i te tuatua mou kia riro tātou mei te 'ua mua o te au mea i 'anga'ia mai e ia ra.

Te 'akarongo'anga ē te 'ākono'anga

¹⁹ E 'akamanako kōtou i tēia, e aku au taeake 'akaperepere ē, kia rapurapu 'ua te tangata rava rāi i te 'akarongo mai, kia mārie rā i te tuatua atu, kia mārie katoa i te riri.

²⁰ Kāre 'oki te riri o te tangata e 'akatupu i te tuatua tika mei tā te Atua i 'akakoro.

²¹ Nō reira, e 'akaātea i te au mea vi'ivi'i ē te au tū kino rava rāi o tō kōtou ora'anga, ē e 'āriki ma te marū i tei tanumia ki roto i tō kōtou ngākau, ko te karere 'oki te ka rauka i te 'akaora i a kōtou.

²² Auraka e tāpikipiki i a kōtou 'ua'orāi nā roto i te 'akarongo 'ua i te tuatua. E 'ākono katoa i te reira.

²³ Ko tei 'akarongo 'ua 'oki i te tuatua ē kāre i 'ākono, e 'āite ia ki te tangata tei 'ākara i tōna mata i roto i te i'o ra.

²⁴ Kua 'ākara aia i aia 'ua'orāi, kua 'aere atura ē kua ngaropōina i'ora i tōna tū.

²⁵ Ko tei tāmou i te 'ākara matariki i te ture meitaki rava o te tū rangatira, ē kāre ia i te tangata tei 'akarongo 'ua ē ngaropōina i'ora, 'e tangata rā tē rave ra, ko ia te ka 'akameitaki'ia e te Atua i tāna 'anga'anga.

²⁶ Mē tē manako nei tēta'i ē, 'e tangata 'ākono Atua aia, ē kāre e rauka i aia i te 'aka'aere i tōna arero, tē tāpikipiki nei rā aia i aia 'ua'orāi, ē 'e mea pu'apingakore tāna 'ākono'anga Atua.

²⁷ Ko te 'ākono'anga pikika'akore ē te tika i mua i te aroaro o te Atua tō tātou Metua ra, ko tēia ia: ko te tākinga meitaki i te au matiroeroe ē te au va'ine taka'ua i tō rātou au tūmatetenga, ē te 'akapāpū ē kia kore te kino o tēianei ao e piri ki a tātou.