Ruta 1 - Bibilia Tapu

PENE I - 1

E oro onge to Elimeleka ki Moabi, mate iora aia e ana puke tamariki katoa i reira: i to Naomi oki anga ki Betelehema, kua tuatua ki nga unonga vaine nana ra e auraka e aru: kare rā Ruta e akaruke iaia.

¹ I TE au rā i te au o te aronga akava ra, e onge tei taua enua ra. Kua aere atura tetai tangata no Betelehema-Iuda ki te enua ra ki Moabi, i reira aia i te puakapa anga, koia, e tana vaine, e ana puke tamariki tamaroa toko rua.

² Ko Elimeleka te ingoa o taua tangata ra, e ko Naomi te ingoa o tana vaine, e te ingoa o nga tamariki nana, ko Mahalona ïa, e ko Kiliona, no Epherata i Betelehema-Iuda ra: e tae atura oki ratou ki te enua ra ko Moabi, noo iora i reira.

³ E mate iora te tane a Naomi ra ko Elimeleka; toe iora aia, e nga tamariki nana toku rua.

⁴ Kua rave iora raua i nga vaine na raua no te au vaine Moabi ra; ko Orapa te ingoa o tetai, ko Ruta te ingoa o tetai: noo iora ratou i reira e okotai paa ngauru o te mataiti.

⁵ Mate iorā Mahalona raua ko Kiliona; ko taua vaine anake ra tei toe, kua mate oki nga tamariki toko rua rava e te tane katoa nana ra.

⁶ Kua tu akera aia ki runga, e nga unonga vaine katoa ana ra, e oki aia, e akaruke i taua enua ra i Moabi: i akarongo ana oki aia i taua enua ra i Moabi e, kua kite mai a Iehova i tona au tangata, kua oronga mai i te kai na ratou.

⁷ Kua aere maira aia akaruke iora i taua ngai ra, koia e nga unonga vaine katoa toko rua nana ra; kua aere ua maira ratou na te arataa, te oki maira ki te enua nei ko Iuda.

⁸ Kua karanga aturā Naomi ki nga unonga vaine toko rua nana ra, E ooki ana korua, e aere ki te ngutuare o to korua puke metua vaine ra: kia takinga-meitaki oki a Iehova ia korua, mei ta korua takinga i tei mate akenei, e iaku katoa oki.

⁹ Kia oronga mai oki a Iehova i te akaangaroianga no korua i te ngutuare o ta korua puke tane. E kua ongi atura aia ia raua; e kua pukaoa ua atura ratou i to ratou reo ma te aue.

¹⁰ Kua tuatua maira raua kiaia, E aru katoa ïa rai maua ia koe i toou na oki anga ki to au tangata na.

¹¹ Kua karanga aturā Naomi, Ka ooki, e aku puke unonga e: eaa korua ka aru mai ei iaku? e tamariki rai ainei to roto i toku kopu, kia riro ei tane na korua?

¹² Ka ooki, e aku puke unonga e, e aere oki korua: kua ruaine oki au, kare taku e taneia. Kia karanga ua atu oki au e, e manakoanga toku, e kia taneia oki taku i teianei po, e kia anau oki aku puke tamariki tamaroa;

¹³ E noo ua aina korua e kia pakari raua? E akangere oki korua ia korua uaorai i te tane ia raua? Auraka, e aku puke unonga e, e tumatetenga maata ra toku i to korua, i te rima o Iehova i rave mai iaku nei.

¹⁴ Kua pukaoa iora to ratou reo, aue akaou iora: kua ongi mairā Orapa i taua metua ongoai nona ra; karekā Ruta kua piri tikai ïa kiaia.

¹⁵ Kua karanga atura aia, I na, kua oki akenei to tuakana vaine ki tona au tangata ra, e ki tona au atua: ka aru katoa atu koe i to tuakana vaine.

¹⁶ Kua tuatua mairā Ruta, Auraka koe e tuatua raurau mai kiaku e akaruke ia koe, e kia oki au i toku nei aru anga atu ia koe: i te ngai taau e aere ra, e aere katoa ïa au; e te ngai taau e noo ra, e noo katoa ïa au ko toou iti-tangata, ko toku katoa ïa iti-tangata; e toou ra Atua, ko toku ïa Atua:

¹⁷ Te ngai e mate ei koe ra, ei reira katoa au e mate ei, e ei reira katoa au e tanumiaʼi: kia rave mai a Iehova kiaku, e kia maata atu rai, kia tataka taua i tetai mea ke mari ra i te mate.

¹⁸ E kite atura aia e, kua māro marie maira aia e aere katoa i tona tere, kare atura aia e tuatua akaou atu kiaia.

¹⁹ Aere ua maira oki raua e tae maira raua ki Betelehema. E tae maira raua ki Betelehema, keukeu ua iora taua oire katoa ra ia raua, e kua tuatua akera te vaine tini, Ko Naomi teia?

²⁰ Kua karanga atura aia kia ratou, Auraka au kia tuatuaia ia Naomi, kia tuatuaia ra au ia Mara; e tumatetenga maata oki ta te Mana katoatoa i tuku mai iaku nei.

²¹ I aere oki au ma te ki, e kua akaoki akaou mai a Iehova iaku ma te ngere: eaa oki kotou i karanga mai ei iaku ia Naomi, tei akaapa mai a Iehova iaku, e kua tuku mai te Mana katoatoa i te tumatetenga iaku nei?

²² Ko to Naomi ïa oki anga mai raua katoa ma tana unonga ngati Moabi ra, ko Ruta ra, mei taua enua maira mei Moabi; e tae maira raua ki Betelehema i te mua o te akaū kerite ra.