Philipi 1 - Bibilia Tapu

PENE I - 1

To Paulo ma aroa ki to Philipi: te meitaki i tupu iaia i tapekaia: no te ekalesia i inangaro ei aia kia roa tona aʼo: tana ako ia ratou.

¹ PAULO e ko Timoteo, e puke tavini no Iesu Mesia, i te aronga tapu ravarai i roto i te Mesia ia Iesu, e nga episekopo e te au diakono, i Philipi na:

² E ia kotou te aroa ua, e te au, no ko mai i te Atua i to tatou Metua, e te Atu oki ia Iesu Mesia.

³ Te akameitaki nei au i taku Atua kia maara ua atu au ia kotou kare e tivata,

⁴ I te au pure katoa naku nei ia kotou ravarai, e pure atu rai au ma te rekareka kare e tivata,

⁵ I to kotou tau meitaki anga i te evangelia nei mei muatangana mairai e tae rava akenei i teianei;

⁶ Kua kite tikai oki au i taua tuatua nei e, ko tei akamata i te angaanga meitaki i roto ia kotou na, nana rai e rave e tae ua atu ki te rā o Iesu Mesia:

⁷ E mea tika oki kia akapera au i te manako ia kotou ravarai, te vai nei oki kotou i roto i toku nei ngakau; i toku nei tapeka angaia, e taku nei akatika anga, e te akamou anga i te evangelia nei, tei ia kotou katoa na ïa te meitaki i orongaia mai iaku ra.

⁸ Ko te Atua oki te kite iaku, e anoano maata rava toku ia kotou ravarai ma te aroa ngakau o Iesu Mesia.

⁹ E te pure nei au, kia tupu marie rai to kotou inangaro e kia maata atu rai i te kite, e te utoa o te ngakau;

¹⁰ Kia timata oki kotou i te au mea e maata ua atu te meitaki; kia riro kotou ei aronga tuatua-mou, e te apa kore, e tae ua atu ki te rā o te Mesia ra;

¹¹ E kia akakiia oki i ta te tuatua-tika i tei tupu ia Iesu Mesia ra, kia akakakāia te Atua e kia akameitakiia.

¹² Te inangaro nei ra au, e te au taeake, kia kite kotou e, kua riro te au mea i rokoia mai ei au nei ei akatupu i te evangelia nei;

¹³ E kua kitea oki toku nei tapeka angaia i te Mesia nei e kako rava ake te are ariki, e te au ngai katoa nei;

¹⁴ E manganui to te au taeake i te Atu nei, tupu akenei to ratou kite, ko au i tapekaia nei, kua maata atura to ratou maroiroi kia apii i te tuatua ma te mataku kore.

¹⁵ E vareae to tetai pae e te māro, i tuatuaʼi i ta te Mesia nei; e tetai pae oki, no te anoano mou ïa:

¹⁶ Ta tetai pae, te tuatua nei i te Mesia ra ei tauetonoanga, kare ma te manako tika, i anoano ratou i te akamaata i toku mate i toku tapeka angaia nei;

¹⁷ Ta tetai pae ra, no te aroa ïa, kua kite oki e, i akonoia au ei akatika i te evangelia nei.

¹⁸ Eaa oki to reira? i taua au mea katoa nei, te mea mou, e te pikikaa, ko te Mesia te tuatuaia nei, te rekareka nei au i te reira, e e rekareka rai oki au.

¹⁹ Kua kite oki au e, ka riro te reira ei ora noku i ta kotou pure, e te tauturu a te Vaerua o Iesu Mesia ra,

²⁰ Ko taku ïa e anoano maata nei e taku oki e tiaki, ma te manako e auraka rava au e akama, kia tuatua atu ra au ma te mataku kore, mei tei muatangana ra, koia katoa i teianei, kia akameitakiia te Mesia i toku nei kopapa, i te ora e te mate.

²¹ Taku uaorai nei, kia ora au ra, no te Mesia ïa, e kia mate ra ei meitaki noku.

²² E kia ora au i roto i te kopapa nei, ko te openga ra ïa o taku angaanga: kare ra au i kite i tei tika kia anoano au.

²³ Te ekoko rua nei au: anoano toku kia aere atu i te Mesia ra noo ei; ko te meitaki maata ua atu oki te reira:

²⁴ Ko te mea tika ra ia kotou, kia noo rai au i roto i te kopapa nei.

²⁵ E no te mea kua kite au i te reira, kua kite oki au e, ka ora rai au e e noo ia kotou katoa na, kia tupu to kotou akarongo e te rekareka.

²⁶ Kia maata atu rai to kotou rekareka ia Iesu Mesia, ko au i aere akaou atu kia kotou na.

²⁷ Kia tau ua ra ta kotou akonoanga i te evangelia a te Mesia ra: e kia aere atu au e akara ia kotou na, e kare ïa, kia akarongo ra au i te tuatua ia kotou e, te tāpu meitaki ra kotou ma te vaerua okotai, e te ngakau okotai, i te uapou anga kotou ravarai i te akarongo i te evangelia nei:

²⁸ E auraka rava e vi i to kotou au enemi: e akairo vai ua ïa te reira no to ratou mate, kareka ia kotou, e akairo ora ïa, te ora no ko mai i te Atua ra.

²⁹ E mea orongaia mai oki ia kotou ia Iesu Mesia nei, to kotou mate iaia ra, auraka te akarongo anake ua ra:

³⁰ E tei ia kotou oki taua mate ta kotou i kite iaku ra, ta kotou i akarongo ra e te vai nei oki iaku nei.