Philemona 1 - Bibilia Tapu

PENE I - 1

To Paulo rekareka i te kite anga i te akarongo e te aroa o Philemona; kua akoia aia kia akakore i te ara a tona tavini a Onesimo ra.

¹ KO au ko Paulo, i tapekaia nei no Iesu Mesia, e to tatou taeake nei ko Timoteo, ki to matou oa rave angaanga i akaperepereia ra, kia Philemona,

² E kia Apephia akaperepereia ra oki, e to matou taeake toa katoa oki ko Arekipo ra, e te ekalesia i roto i toou are:

³ Ei ia kotou te aroa ua, e te au, no ko mai i to tatou Metua ra i te Atua, e te Atu ra ia Iesu Mesia.

⁴ Te akameitaki nei au i taku Atua, ma te akaiki katoa ia koe i taku nei pure kare i tivata,

⁵ (Kite akenei au i toou akarongo i te Atu ra ia Iesu, e toou aroa i te aronga tapu katoa ra;)

⁶ Kia tupu rava te angaanga a toou akarongo, i te kitea anga i te au mea meitaki katoa ki roto ia tatou, ia Iesu Mesia nei.

⁷ E rekareka maata oki to matou e te pumaana i toou aroa, no te mea kua mareka te ngakau o te aronga tapu ia koe na, e to matou taeake.

⁸ E teianei, tika ua rai iaku i te Mesia nei kia akaue atu ia koe i te mea tau,

⁹ No te aroa ra i tuatua meitaki atu ei au ia koe, ko Paulo tangata metua oki au, e tangata no Iesu Mesia i tapekaia oki i teianei.

¹⁰ Te tuatua meitaki ua atu nei au kia koe i taku tamaiti ia Onesimo ra, i taku i anau i toku tapeka angaia nei:

¹¹ I te tavini puapinga kore noou i muatangana, i teianei ra, e puapinga ïa taau iaia e taku katoa nei oki:

¹² Ko taku ïa e akaoki atu kia koe na: e tenana e āriki mai koe iaia, ko taku ngakau tikai aia:

¹³ I inangaro oki au i te tāpu iaia ki ko nei iaku nei, kia tupauia koe iaia i te matuapuru anga mai iaku i toku nei tapeka angaia i te evangelia nei:

¹⁴ Kare ra au e rave ua i tei kore paa i tika ia koe ra; kia riro toou takinga-meitaki no te inangaro mou, auraka no tetai mea ke.

¹⁵ Peneiake oki i taka ke iti poto ua mai ei aia, kia āriki mai koe iaia, kia noo tamou ua atu ia koe na:

¹⁶ Auraka ra ei tavini, kia maata atura ïa i te tavini, ei taeake akaperepere ra iaku nei, ka tanga atu ei ia koe ra, i te Atu nei, e te kopapa katoa oki.

¹⁷ E tenana te karanga na koe iaku nei e e oa, e āriki mai koe iaia mei te mea ko au uaorai.

¹⁸ E i takinga-kino aia ia koe, e e kai ou aia naau, e tuku mai koe i te reira ki runga iaku nei;

¹⁹ Ko au teia ko Paulo, na toku uaorai rima i tata i teianei tuatua, Naku ïa e oko atu: auraka ua atura au e karanga atu ia koe e, e kai ou koe naku ia koe uaorai na.

²⁰ Koia ïa, e taku taeake, ei rekareka toku ia koe i te Atu nei, e akapumaana mai koe i toku ngakau i te Atu nei.

²¹ Te irinaki nei au i toou akatika anga mai i tata atu ei au i teianei tuatua ia koe, kua kite oki au e e maata atu rai taau i taku e pati nei.

²² E akateateamamao ra koe i tetai pia noku; te manako nei oki au e e riro au i te orongaia ia kotou i ta kotou pure.

²³ Te aroa atu nei a Epaphera, taku oa tapeka katoaia i te Mesia nei ia Iesu, ia koe:

²⁴ E taku au oa rave angaanga nei, ko Mareko, ko Arisetareko, ko Dema, e ko Luka oki.

²⁵ Ei to kotou na au vaerua te aroa ua o to tatou Atu ra o Iesu Mesia. Amene.