Obadia 1 - Bibilia Tapu

PENE I - 1

Te pou anga o Edoma i to ratou ra ngakau parau: tona takinga-kino i tona teina ia Iakoba, e to Iakoba autu anga, e te ora anga.

¹ TE orama a Obadia. Te na ko maira te Atu ra ko Iehova ia Edoma: E rongo ta matou i akarongo akenei no ko ia Iehova ra, e kua ungaia te karere ki rotopu i te pa enua ra: Ka tu mai kotou; tatou e tu ki runga e tamaki atu iaia.

² I na, kua akaiti au ia koe i rotopu i te pa enua; kua akavaavaa roaia koe.

³ Kua vare koe i te parau o to ngakau na, e tei noo ki roto i te ngaa mato ra: tei runga i tona ra nooanga; ko tei karanga i roto i tona ngakau ra e, Naai au e tuku ki raro i te one?

⁴ Akateitei ua rai koe ia koe uaorai mei te aeto ra, e tuku ua rai koe i to koanga ki rotopu i te au etu ra, e tukuia koe e au ki raro mei runga i reira, te tuatua mairā Iehova.

⁵ Angairi e keia tei aere mai kia koe, angairi oki e vaʼi are i te po, (Aue toou pou anga e!) kare ainei ratou e keia e kai iu ra, oti ra ua. Angairi e aronga aaki vine tei aere mai kia koe ra, kare ainei ratou e akatoe i etai vine?

⁶ Aue to Esau kimi angaia e! tona au ngai ngaro i te tutaka angaia e!

⁷ Te au tangata katoa i kapiti mai kia koe ra, tei arumaki ia koe e tae rava atu ki te kotinga; te aronga i noo au ua mai ia koe ra, ko tei pikikaa ïa ia koe, e kua autu ratou ki runga ia koe: e ko tei kai i taau kai kua akamoe i te ereere ki raro ake ia koe ra: kare e kite i roto iaia ra.

⁸ Kare ainei au i taua rā ra, te tuatua mairā Iehova, e akapou i te au tangata pakari i Edoma? e te aronga kite i te maunga ra i Esau?

⁹ E rokoia to aronga toa, e Temana, e te tumatetenga, kia ope takiri ratou i te tipu keia i te maunga ra i Esau.

¹⁰ No te ta e te rave aroa kore i to taeake ia Iakoba, e tapokiiaʼi koe e te akama, e ka tipu keia koe e tuatau ua atu.

¹¹ I te rā i tu mai ei koe i tetai pae ra, i te rā i apai keiaʼi e te tangata ke ke i tona aronga maroiroi ei tuikaa, ka tomo ei te tangata ke ke i tona au ngutupa, ka tuku ei ratou i te kelero ia Ierusalema, mei tetai o ratou ra oki koe i reira.

¹² Auraka tika koe e akara mai i te rā o te taeake, i te rā i riro ei aia ei tangata ke; e auraka tika koe e rekareka ki runga i te tamariki a Iuda i te rā i pou ei ratou ra: e auraka tika koe e tuatua akaravati i te rā i pini ei ra.

¹³ Auraka tika koe e tomo ki roto i te ngutupa o toku au tangata, i te rā i tumatetengaʼi ratou ra; koia ïa, auraka tika koe e akara ki runga i to ratou ma tei te rā i tumatetengaʼi ratou ra; auraka tika oki koe e akatika i te noni i ta ratou apinga i te rā i tumatetengaʼi ratou ra.

¹⁴ Auraka tika koe e tu ua i te ara o iti, e tipu i te aronga nona i ora ra; auraka tika oki koe e pa i tona aronga i toe ra i te rā i pini ei ra.

¹⁵ Te vaitata maira oki te rā o Iehova ki runga i te au etene katoa ra: e mei taau i rave ra, ka pera katoaia koe; e oki mei taau i rave ra ki runga i toou uaorai mimiti.

¹⁶ Mei ta kotou oki i inu ki runga i toku maunga tapu ra, e inu ua rai oki te au etene ravarai, e inu ratou, e apuku oki i roto ra, e riro oki ratou mei te mea kare ra.

¹⁷ E riro ra te aronga i ora mai i runga i te maunga ra i Ziona, e tapu oki te reira; e rauka oki te ngutuare o Iakoba i to ratou au nooanga.

¹⁸ E riro te ngutuare o Iakoba ei ai, e te ngutuare o Esau ei teita, e na ratou e tutungi ia ratou ki te ai, e kia pou ratou; e kare rava e uraura toe i te ngutuare o Esau; na Iehova oki teia i tuatua mai.

¹⁹ To apatonga ra te ka noo ki te maunga o Esau, e to te ngai mataataa ra i te Philiseti; e riro katoa ia ratou te au kainga o Epheraima, e te au kainga o Samaria; e riro oki Gileada ia Beniamina.

²⁰ E te au tuikaa o te nuku ra i te tamariki a Iseraela, i rotopu i te ngati Kanaana ra, e tae rava atu ki Zarephata; e te au tuikaa o Ierusalema i Sepharada, ei ia ratou te au oire i apatonga ra.

²¹ E tae oki te aronga akaora ki runga i te maunga ra i Ziona, ei akava i te maunga o Esau; e riro oki te basileia ia Iehova.