Numero 1 - Bibilia Tapu

PENE I - 1

I te tuatua a Iehova i tatauiaʼi to Iseraela ra.

¹ Kua tuatua mairā Iehova kia Mose i te medebara ra i Sinai, i roto i te Are uipaanga ra, i te rā mua i te marama rua, i te rua o to ratou mataiti i te aerenga mai mei te enua maira mei Aiphiti, na ko maira,

² Ka tatau korua i te uipaanga tamariki a Iseraela ravarai i te maata anga, i to ratou au kopu-tangata, i te ngutuare o to ratou ai metua, i te rainga o te au ingoa, to te au tane i te maata ra, kia tataki tai;

³ Ko tei tae ki te takau o tona mataiti e tei ara atu, ko tei tika kia aere ki te tamaki, i Iseraela katoa nei: na korua ko Aarona e tatau ia ratou i to ratou au nuku.

⁴ E kapiti katoa oki te tangata kia korua, tataki tai to te kopu okotai e pini ua ake; ei mataiapo anake no te ngutuare o to ratou ai metua.

⁵ Teia oki te ingoa o te au tangata e tauturu ia korua ra; to te kopu o Reubena ra; ko Elizura te tamaiti a Sedeura.

⁶ To te kopu o Simeona ra; ko Selumiela te tamaiti a Zurisadai.

⁷ To te kopu o Iuda ra; ko Naasona te tamaiti a Aminadaba.

⁸ To te kopu o Isakara ra; ko Netaneela te tamaiti a Zuara.

⁹ To te kopu o Zebuluna ra; ko Eliaba te tamaiti a Helona.

¹⁰ To te tamariki a Iosepha; to te kopu o Epheraima; ko Elisama te tamaiti a Amiuda; to te kopu o Manase ra; ko Gamaliela te tamaiti a Pedazura.

¹¹ To te kopu o Beniamina ra; ko Abidana te tamaiti a Gideoni.

¹² To te kopu o Dana ra; ko Ahiezera te tamaiti a Amisadai.

¹³ To te kopu o Asera ra; ko Pagiela te tamaiti a Okarana.

¹⁴ To te kopu o Gada ra; ko Eliasapha te tamaiti a Deuela.

¹⁵ To te kopu o Naphatali ra; ko Ahira te tamaiti a Enana.

¹⁶ E aronga ingoa kitea anake ïa teia i te uipaanga ra, e aronga tutara anake ïa i te au kopu o to ratou ai metua, no runga anake ïa i te au pupu tausani okotai o Iseraela ra.

¹⁷ Kua rave akerā Mose raua ko Aarona i taua au tangata i taiku tikaia i te ingoa:

¹⁸ E tae akera ki te rā mua o te marama rua ra, kua akaputuputu maira ratou i te uipaanga katoa ra, e kua akakite maira ratou i to ratou anauanga i to ratou au kopu-tangata i te ngutuare o to ratou ra ai metua, i te rainga o te au ingoa, kia tatau tataki tai, i tei tae ki te mataiti okotai takau, e tei ara atu.

¹⁹ Ko ta Iehova oki i akaue mai kia Mose ra, kua pera aia i te tatau ia ratou i te medebara i Sinai ra.

²⁰ Te tamariki a Reubena te tama mua a Iseraela ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o to ratou au ingoa i tataki taiia ra, te au tane katoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

²¹ Ko tei tatauia i te kopu o Reubena ra, e a ïa ngauru ma ono i te tausani, e rima anere ara.

²² To te tamariki a Simeona, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa i tataki taiia ra, ko tei tae ki te mataiti okotai takau, e tei ara atu, te au tane katoa ko te tika anake kia aere ki te tamaki ra;

²³ Ko tei tatauia i te kopu o Simeona ra, e rima ïa ngauru ma iva i te tausani, e toru anere ara.

²⁴ To te tamariki a Gada, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

²⁵ Ko tei tatauia i te kopu o Gada ra, e a ïa ngauru ma rima i te tausani, e ono anere, e rima ngauru.

²⁶ To te tamariki a Iuda ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

²⁷ Ko tei tatauia i te kopu o Iuda ra, e itu ïa ngauru ma a i te tausani, e ono anere.

²⁸ To te tamariki a Isakara ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

²⁹ Ko tei tatauia i te kopu o Isakara ra, e rima ïa ngauru e a ara i te tausani, e a oki anere.

³⁰ To te tamariki o Zebuluna ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

³¹ Ko tei tatauia i te kopu o Zebuluna ra, e rima ïa ngaur itu ara i te tausani, e a oki anere.

³² To te tamariki a Iosepha ra, to te tamariki a Epheraima ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

³³ Ko tei tatauia i te kopu o Epheraima ra, e a ïa ngauru i te tausani, e rima oki anere.

³⁴ To te tamariki a Manase ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

³⁵ Ko tei tatauia i te kopu o Manase ra, e toru ïa ngauru e rua ara i te tausani, e rua oki anere.

³⁶ To te tamariki a Beniamina ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tai ara atu, ko te tika anake kia aere ki te tamaki ra;

³⁷ Ko tei tatauia i te kopu o Beniamina ra, e toru ïa ngauru e rima ara i te tausani, e a oki anere.

³⁸ To te tamariki a Dana ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

³⁹ Ko tei tatauia i te kopu o Dana ra, e ono ïa ngauru e rua ara i te tausani, e itu oki anere.

⁴⁰ To te tamariki a Asera ra, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

⁴¹ Ko tei tatauia i te kopu o Asera ra, e a ïa ngauru e okotai ara i te tausani, e rima oki anere.

⁴² To te tamariki a Naphatali, i to ratou anauanga, i to ratou au kopu-tangata, i te ngutuare o to ratou ai metua, i te rainga o te au ingoa, ko tei tae ki te mataiti okotai takau, e tei ara atu, ko te tika anake kia aere ki te tamaki ra;

⁴³ Ko tei tatauia i te kopu o Naphatali ra, e rima ïa ngauru e toru ara i te tausani, e a oki anere.

⁴⁴ Ko teia te aronga i tatauia ra, i ta Mose raua ko Aarona i tatau, e nga tutara katoa o Iseraela, tino ngauru ma rua; no te ngutuare o to ratou ai metua, taki tai i te kopu okotai ra.

⁴⁵ E taua aronga i tatauia i te tamariki a Iseraela, i te ngutuare o to ratou ai metua, ko tei tae ki te mataiti okotai takau, e tei ara atu, ko te tika anake kia aere ki te tamaki i Iseraela ra;

⁴⁶ Taua aronga katoa i tatauia ra, e ono ia anere e toru ara i te tausani, e rima oki anere, e rima ngauru.

⁴⁷ Kareka te ngati Levi no te kopu o to ratou ai metua, kare ia i tatau katoaia i roto i taua aronga ra.

⁴⁸ Kua tuatua mai ana oki a Iehova kia Mose, na ko maira,

⁴⁹ Auraka koe e tatau i te kopu o Levi ra, auraka ratou e tatauia i te maata anga, i te tatau anga i te tamariki a Iseraela ra:

⁵⁰ E akono ra koe i te ngati Levi no runga i te puakapa kite ra, e te au āriki katoa o te reira ra, e te au mea katoa o te puakapa ra: na ratou e apai i te puakapa, e tona katoa au peu; e rave oki ratou i te taoonga i reira, e patia oki ratou i to ratou puakapa, na vao ake i te puakapa ra e pini rava ake.

⁵¹ E kia kiritiia te puakapa ra, na te ngati Levi e rave e tuku ki raro: e kia akatuia te puakapa ra, na te ngati Levi e akatu: e te tangata ke kia akavaitata ra, ka taia ia.

⁵² E e patia te tamariki a Iseraela i to ratou puakapa, ko te tangata ko tona uaorai puakapa tikai, ko te tangata ko tona uaorai reva tikai, e pini ua ake ratou i to ratou au nuku katoa ra.

⁵³ Kareka te ngati Levi ra e patia i to ratou puakapa, na vao mai i te puakapa kite ra e pini ua ake, ko te rokoia mai aea te uipaanga tamariki a Iseraela e te riri; e na te ngati Levi e akono i tei ikuikuia i te puakapa kite ra.

⁵⁴ Kua pera oki te tamariki a Iseraela i te au mea katoa ta Iehova i akaue mai kia Mose ra, ko ta ratou ïa i rave.