Māreko 4 - Bibilia Tapu

PENE IV - 4

Te parabole o te ua i ruruia ki te ngai tu ke ke: te lamepa, e te aite: te ruru anga i te ua, te tupu ngaro anga, e te kokoti anga: te ua sinapi: te uriia i te kauvae angaia e Iesu.

¹ E KUA apii akaou atura aia i te pae roto ra: e urupu tangata maata oki tei uipa mai kiaia ra, aere atura aia ki runga i tetai pai, noo iora i tai, te tu ua maira oki te tangata tini i uta i te pae roto ra.

² E tuatua maata tana i apii parabole mai kia ratou, i na ko maira i te apii anga mai,

³ Ka akarongo mai ana; I na, aere atura te ruru ua e ruru i te ua.

⁴ E tei te ruru anga ra, topa iora tetai pae i te pae arataa, e kua aere maira te manu o te reva, kua kai iora.

⁵ Topa iora tetai pae i te ngai paikea, kare i rai te one i reira, tutupu vave ua atura, no te mea kua papaku ua te one:

⁶ E rāia iora, vera atura; e no te kore e aka, mae rava atura ïa.

⁷ Topa iora tetai pae ki roto i te ngangaere, tupu akera te ngangaere, e pokia iora, kare akera i ua mai.

⁸ Topa iora tetai pae ki te ngai one meitaki, tupu akera, uua iora, taki toru ngauru, taki ono ngauru, taki tai anere, i te ua okotai.

⁹ Kua na ko maira oki aia kia ratou, E taringa tona ei akarongo anga ra, e akarongo aia.

¹⁰ E kia riro mai aia ra, kua ui maira te aronga i vaitatao ma te tino ngauru ma rua ra kiaia, i taua parabole ra.

¹¹ Kua karanga atura aia kia ratou, Kua orongaia mai te kite ia kotou i te tuatua ngaro o te basileia o te Atua ra, kareka to ratou i vao ra, i tuatua paraboleia mai taua au mea katoa nei kia ratou;

¹² Kia kore ratou e utoa i ta ratou e akara ra, kia kore oki e kite i ta ratou e akarongo ra, ko te akaariuia mai aea ratou, e ko te akakoreia ta ratou ara.

¹³ Kua na ko maira oki aia kia ratou, Kare rai kotou i kite i taua parabole nei? eaa kotou e kite ei i te au parabole katoa nei?

¹⁴ Te ruru ua ra, koia te ruru i te tuatua.

¹⁵ Te pae arataa ra i topaia e tetai pae ua ra; koia te aronga i te akarongo anga i te tuatua, kua aere mairā Satani, e kua rave atura i te tuatua i ruruia i roto i to ratou ngakau ra.

¹⁶ Te ngai paikea ra i topa katoaia e tetai pae ua; koia te aronga i āriki i te tuatua ma te rekareka i te akarongo anga ra;

¹⁷ Kare ra i akaia i roto ia ratou, tāpu anga poto ua ta ratou: kia rokoia e te tumatetenga, e kia takinga-kinoia, i taua tuatua ra, maitu atura ia ratou i reira.

¹⁸ Te ngai ngangaere i topa katoaia e tetai pae ua; koia te aronga e akarongo i te tuatua;

¹⁹ E ii atura i te akono anga i te peu o teia nei ao, i te pikikaa o te apinga, e te anoano maata i tetai au mea ke ra, pokia atura te tuatua, kare atura i ua mai.

²⁰ Te ngai one meitaki ra i topaia e tetai pae ua ra; koia te aronga i akarongo i te tuatua, tāpu piri iora, e ua akera, taki toru ngauru, taki ono ngauru, taki tai anere, i te ua okotai.

²¹ Kua na ko maira aia kia ratou, E apaiia mai aina te lamepa kia tapokiia ki raro ake i te aite ra, e ki raro oki i te roi ra? Auraka kia tukuia ki runga i te vairanga?

²² Kare rava e mea ngaro, e kore e akakiteia, kare oki e mea uunaia, e kore e akakite katoatoaia.

²³ E taringa tona ei akarongo anga ra, e akarongo aia.

²⁴ E kua na ko maira aia, Kia matakite i ta kotou e akarongo nei: ko te aite ta kotou e aite atu, ko ta kotou rai ïa kia akaaiteia mai; e tamaataia mai ta kotou ta te aronga i akarongo.

²⁵ Ko tei puapingaia ra, ka orongaia mai tana; kare ana ra, e apai keia tana.

²⁶ Kua na ko maira oki aia, E tau te basileia o te Atua i te ua i ruruia e tetai tangata ki roto i te kainga;

²⁷ E te moe ua ra aia i te po, e te ara ua ra i te ao, te kao ra e te tupu ua ra taua ua ra, kare aia i kite i te tupu anga.

²⁸ Na te one uaorai oki i akatupu ake; ko te kao anga tei mua, ei reira te kaui anga, e muri ake ko te sitona pakari i roto i te kaui.

²⁹ E kia pakari te sitona ra, kua rave aia i te kokoti i reira ra, no te mea, kua tae ki te kokoti anga ra.

³⁰ Kua na ko maira oki aia, Mei te aa nei ra te basileia o te Atua kia arite tatou? E eaa te akatau anga kia akatau tatou?

³¹ E tau i tetai ua sinapi, kia tanumia oki ki raro i te one, e mea ngiti te reira i te ua tini ravarai i roto i te one ra.

³² Kia tanumia ra, tupu akera, e maata atura ïa i te au rakau rikiriki ravarai, toro atura tona au mangamanga nunui, e to mai oki te manu o te reva ki reira ki roto i tona maru.

³³ I pera oki aia i te apii anga mai ia ratou i te tuatua parabole e manganui, i tei tau ia ratou kia akarongo.

³⁴ Kare rava e tuatua parabole kore kia tuatua aia kia ratou: e kia riro ke ra, kua akakite aia ki tana au pipi i te akatauanga o taua au mea katoa ra.

³⁵ E aiai atura i taua rā ra, kua tuatua maira aia kia ratou, E ano tatou ki tera pae.

³⁶ E kia tuku atu ratou i taua aerenga tangata ra, tei runga oki aia i te pai, ano atura ratou, e tetai aronga pai rikiriki ra oki.

³⁷ E kua tupu maira tetai uriia maata, ki maira te pai i te kare.

³⁸ Te moe ra aia i te kotoe i muri ki runga i tetai urunga; kua akaara atura ratou iaia, na ko atura, E te Orometua! Kare aina koe e akono mai i to matou mate?

³⁹ Tu akera aia ki runga, kauvae atura i te matangi, e na ko atura ki te kare, Kua oti ana, kia aki. Torue atura te matangi marino rava atura.

⁴⁰ Kua tuatua maira aia kia ratou, Eaa kotou i mataku ei? eaa oki kotou i kore ei i akarongo?

⁴¹ Mataku rava atura ratou, kua na ko akera ratou ratou uaorai, Eaa ua te tu o teianei tangata, i akarongo ei te matangi e te kare iaia!