Māreko 3 - Bibilia Tapu

PENE III - 3

Te tangata rima marō: te tangata e manganui i te aere anga mai kia Iesu: te au aposetolo tino ngauru ma rua: te ara i te Vaerua Tapu: te metua vaine o Iesu e tona ai taeake.

¹ KUA tomo akaou atura aia ki roto i te sunago; tei reira oki tetai tangata kua marō te rima.

² Te akara matariki maira ratou iaia i te akaora anga i taua tangata ra i te sabati, kia rauka ta ratou tapepe anga mai iaia.

³ Kua karanga atura aia ki te tangata rima marō ra, Ka tu ki runga i rotopu nei.

⁴ Kua karanga atura oki aia kia ratou, Eaa tei tau i te ture kia rave i te rā sabati, ko te meitaki aina, e ko te kino? ko te akaora aina, e ko te ta? Muteki akera ratou.

⁵ Kua akarau aere atura tona mata kia ratou ravarai e pini ua ake ma te riri, te kinokino ra i te mārokiakiaanga o to ratou ngakau, kua karanga atura ki taua tangata ra, Ka akatika mai ana i to rima; E tei te akatika anga ra, ora takiri akera tona rima mei tetai katoa ra.

⁶ Kua aere atura te au Pharisea kia vao, ko ratou ma te au Herodiani, kua kimi iora i reira i ta ratou ravenga e ta iaia.

⁷ Kua unui aturā Iesu ma tana au pipi, aere atura ki te pae roto ra: kua aru maira iaia te motuanga tangata maata no Galilea, e no Iudea,

⁸ E no Ierusalema, e no Idumea, e te pae Ioridana ra; to te pae i Turia ra oki e to Sidona, kua kite oki i te rongo o te au ravenga mana nana ra, e kua aere maira iaia, e urupu maata.

⁹ Kua karanga atura aia ki tana au pipi i tetai pai mea ngiti nona, kia kore aia e akaeteeteia mai e te tangata.

¹⁰ E manganui oki tana i akaora, i akaeteete mai ei te aronga maki mamaata iaia, kia akatukia mai ratou iaia.

¹¹ E te au vaerua viivii katoa, kia akara mai kiaia ra, kua akatopa maira ki muao iaia ma te kapiki, i te na ko anga mai, Ko te Tamaiti koe a te Atua.

¹² Kua ako ua atura aia ia ratou, auraka rava ratou e aaki iaia.

¹³ E muri akera, aere atura aia ki runga i tetai maunga, kua karanga atura oki ki tana i anoano ra, kua aere maira ratou kiaia ra.

¹⁴ Kua akataka atura aia i e tino ngauru ma rua, kia aru ratou kiaia, kia unga atu oki aia ia ratou e ako aere;

¹⁵ Kua akamana atura oki ia ratou kia akaora i te au maki, kia tuaru oki i te au demoni.

¹⁶ Teia oki taua aronga ra, ko Simona tana i tapa kia Petero;

¹⁷ Ko Iakobo a Zebedaio ra, e ko Ioane te taeake o Iakobo ra; ko raua tana i tapa kia Boanere, koia oki, te tamariki a te mangungu:

¹⁸ Ko Anederea oki, e ko Philipa, e ko Baratolomea, e ko Mataio, e ko Toma, e ko Iakobo a Alephaia ra, e ko Tadaio, e ko Simona te Kanana ra,

¹⁹ Ko Iuda Ikariota oki, tei pikikaa iaia ra. Aere atura ratou ki roto i tetai are.

²⁰ E kua putuputu akaou maira te tangata e manganui ua atu, kare akera e meitaki ia ratou kia kai i te manga.

²¹ E kite akera tona uaorai, aere atura ratou ki vao e tāpu iaia, kua na ko atura, Kua auouoia aia nei.

²² Ko te au tata tuatua ra i aere mai mei Ierusalema maira, kua na ko maira ïa, Tei iaiā Belezebuba, e i te mana o taua demoni maata ra i tuaru ei aia i te au demoni ra.

²³ Kua kapiki atura aia kia ratou, e kua tuatua parabole atura kia ratou, Eaa e tikaʼi kia tuaru a Satani ia Satani uaorai?

²⁴ E kia mavete tetai basileia e rave iaia uaorai, kare te reira basileia e mou.

²⁵ Te kopu-tangata oki kia mavete e rave iaia uaorai, kare te reira kopu-tangata e mou.

²⁶ E kia tu mai a Satani e rave iaia uaorai, mavete iora, kare aia e mou, kua vaitata tona openga.

²⁷ Kare oki e tangata e tomo ua ki roto i te are o te tangata maroiroi ra, ka aō ei i tona apinga, e timata na ra i te tapeka i taua tangata maroiroi ra; ei reira e tikaʼi kia āru aia i tona kainga.

²⁸ E tuatua-mou taku e karanga atu kia kotou na, Ka tika te au ara ravarai a te tamariki a te tangata nei kia akakore, e te akakino Atua katoatoa ta ratou e akakino ra:

²⁹ Kareka ko tei akakino i te Vaerua Tapu, kare rava tana e akakoreia, e tau iaia te mate mutu kore.

³⁰ Ko ratou i tuatua e, Tei iaia te vaerua viivii.

³¹ Kua aere maira oki i reira, tona au taeake, e tona metua vaine, tu maira ki vao, e kua tona maira i te tangata e tiki iaia.

³² Kua karanga atura taua urupu maata i noo takako iaia ra kiaia, I na, tei vao to metua vaine e to ai taeake, i tiki mai nei ia koe.

³³ Kua tuatua maira aia kia ratou, na ko maira, Koai toku metua vaine e toku ai taeake?

³⁴ Kua akarau atura tona mata i te aronga i noo takako iaia, na ko akera, I na, toku metua vaine e toku ai taeake!

³⁵ Ko te akono katoa i te anoano o te Atua ra, ko toku ïa taeake, e toku ïa tuaine, e toku oki metua vaine.