Levitiku 1 - Bibilia Tapu

PENE I - 1

Te au ture no te atinga karakaratio, no te anana puakatoro, e no te anana mamoe, e no te manu.

¹ Kua kapiki mairā Iehova kia Mose, e kua tuatua maira kiaia i roto i te Are uipaanga, na ko maira,

² E tuatua ana koe ki te tamariki a Iseraela, e karanga atu koe kia ratou, Kia apai mai tetai tangata i o kotou i te atinga kia Iehova, no roto i te puaka ra, ei atinga no roto i te puakatoro, e te mamoe, ta kotou e apai mai.

³ E atinga karakaratio tana atinga no roto i te puakatoro ra, ei toa kino kore tana e apai mai: ei te ngutupa o te Are uipaanga e apai ei, kia marekaia mai aia ki mua i te aroaro o Iehova.

⁴ E tuku oki aia i tona rima ki runga i te mimiti o taua atinga karakaratio ra; e ka marekaia mai tana, ei tapokiangaara nana.

⁵ E nana e ta i taua puakatoro ra ki mua i te aroaro o Iehova: e na te au taunga, na te tamariki a Aarona, e apai mai i te toto,, ka pîpî ei i te toto na runga i te atarau, i vaitatao i te ngutupa o te Are uipaanga, e pini rava ake.

⁶ E nana e oore i taua atinga karakaratio ra, ka kotikoti ei i tona au kotinga tikai.

⁷ E na te au tamariki a te taunga ra, a Aarona, e tuku i te ai ki runga i te atarau, ka koroata marie ei i te vaie ki runga i te ai.

⁸ E na te au tamariki a Aarona, na te au taunga ra, e akanoo marie i taua au kotinga ra, i te mimiti, e te tongaua ra, ki rungao i te vaie, i runga i te ai, i rungao i te atarau ra:

⁹ Kareka to roto ra, e nga vaevae, e orei ïa aia ki te vai; e na te taunga e taʼu e kia pou takiri ki runga i te atarau; e atinga karakaratio, e atinga ai ïa, ei mea aunga kakara na Iehova.

¹⁰ No te anana, no te mamoe, e te puakanio, tana atinga e apai, ei atinga karakaratio; ei toa kino kore tana e apai.

¹¹ E nana e ta, i te pae o te atarau ra, i te pae i apatokerau ra, ki mua i te aroaro a Iehova: e na te au taunga, na te au tamariki a Aarona, e pîpî i te toto ki runga i te atarau e pini ua ake.

¹² E ka kotikotiia i tona kotinga tikai, te mimiti oki, e te tongaua: e na te taunga e akanoo marie i te reira ki rungao i te vaie, i runga i te ai, i rungao i te atarau ra:

¹³ Kareka to roto ra, e nga vaevae, e orei ïa aia ki te vai; ka rave ei te taunga i te au vaʼi katoa ra, ka taʼu ei ki runga i te atarau ra: e atinga karakaratio, e atinga ai ïa, ei mea aunga kakara na Iehova.

¹⁴ E manu tana atinga karakaratio e apai na Iehova, ei kukupa tana atinga kia apai, e kare ra, ei punua rupe.

¹⁵ E na te taunga e apai ki te atarau ra, ka kikini ei i te mimiti, ka taʼu ei ki runga i te atarau; e akataʼe oki aia i te toto i te pae atarau ra:

¹⁶ Ka kiriti oki i te kopu ma te mea i roto ra, ka akaruke ei i te pae atarau ra, i te vairanga reu ra, i te pae i te itinga o te rā ra.

¹⁷ E ka vaʼi aia i taua manu ra ma te peau katoa, auraka ra kia taka ke: e na te taunga e taʼu ki rungao i te vaie, i runga i te ai, i runga i te atarau ra: e atinga karakaratio, e atinga ai ia, ei mea aunga kakara na Iehova.