Hosea 1 - Bibilia Tapu

PENE I - 1

Te akakite nei a Hosea i te riri o te Atua i te akatitima i te akaipoipo anga ia Gomera: nga tamariki anau iaia, e te aiteanga o to ratou ingoa.

¹ TE tuatua a Iehova i tae mai ia Hosea, te tamaiti a Beeri, i te au rā o Uzia, Iotama, Ahaza, e Hezekia, e au ariki no Iuda; e i te au rā oki o Ieroboama, te tamaiti a Ioasa, ariki no Iseraela.

² Te akamataanga o te tuatua a Iehova ia Hosea ra. E kua tuatua mairā Iehova kia Hosea, Ka aere, ka rave i tetai vaine akaturi naau, ma te tamariki akaturi: kua akaturi maata oki te enua nei, i te akaruke anga ia Iehova.

³ Kua aere atura aia e kua rave atura ia Gomera, i te tamaine a Dibilaima; kua to iora aia, e anau maira e tamaroa.

⁴ Kua tuatua mairā Iehova kiaia, Kia tapaia tona ingoa ia Iezereela; kia roa itio oki, kua akaoko atu au i te toto o Iezereela ki runga i te ngutuare o Iehu, e akakore rava oki i te basileia o te ngutuare o Iseraela.

⁵ E kia tae ki taua rā ra, ka aati ei au i te ana o Iseraela i te o o Iezereela.

⁶ Kua to akaou iora oki aia e anau maira e tamaine. E kua tuatua mairā Iehova kiaia, Kia tapaia tona ingoa ia Lo-ruhama: kare oki au e aroa akaou i te ngutuare o Iseraela; e apai ke ravaia ra ratou e au.

⁷ Kareka te ngutuare o Iuda, e aroa ïa au, e e akaora au ia ratou, i to ratou Atua ra ia Iehova; kare ra au e akaora ia ratou i te ana, e te koke, e te tamaki, e te oroenua, e to reira akaoro ra.

⁸ E akatopa iora aia i te u ia Lo-ruhama, kua to iora, e anau maira e tamaroa.

⁹ Kua tuatua mairā Iehova, Kia tapaia tona ingoa ia Lo-ami: kare oki kotou i toku ra au tangata, kare oki au i te Atua no kotou.

¹⁰ I te tatau anga ra i te tamariki a Iseraela, e riro ïa mei te one taatai ra, tei kore e tika kia arite e kia tatau ra: e riro oki ei te ngai i karangaia atu ei ratou ra e, Kare kotou i te tangata noku, ka riro ïa ratou i te karangaia i reira e, E tamariki na te Atua ora ra.

¹¹ Ei reira te au tamariki a Iuda e te au tamariki a Iseraela e akaputuputu ei, ka akataka atu e i tetai upoko no ratou, ka aere mai ei ratou mei te enua maira: e maata oki ïa te rā o Iezereela.