Ezera 1 - Bibilia Tapu

PENE I - 1

Te tuatua a Kuro: te akonokono ra te tangata e oki: te au apinga o te iero i te akaoki angaia mai.

¹ Tae akera ki te mataiti mua o te ariki o Peresia ra ko Kuro, kia tupu te tuatua a Iehova i te vaa o Ieremia, i akaaraara atu ei a Iehova i te ngakau o te ariki o Peresia ra o Kuro, kia tutu aereia e pini ua ake i tona basileia, e kia tataia oki, i te na ko angaia e,

² Te na ko maira te ariki o Peresia ko Kuro, Kua oronga mai te Atua no te rangi ko Iehova i te au basileia katoa o te ao nei kiaku; e kua ikuiku mai aia iaku e akatu i tetai are nona i Ierusalema, i Iuda ra.

³ Koai tei toe i roto ia kotou i tona katoa au tangata na? Kia piri mai oki tona Atua iaia, e aere aia ki runga ki Ierusalema i Iuda ra, ka akatu ei i te are no te Atua o Iseraela no Iehova, ko te Atua aia, i Ierusalema.

⁴ E tei toe i ta au ngai katoa tana i noo ra, e tauturu mai to reira au tangata iaia, i te ario, e te auro, e te apinga, e te au puaka, e tetai apinga apai ua no te are o te Atua i Ierusalema.

⁵ Kua tu maira te ui mataiapo tutara i Iuda e Beniamina, e te kau taunga, e te au ngati Levi, e te aronga katoa e akataeia te ngakau e te Atua, e aere ki runga e akatu i te are o Iehova i Ierusalema.

⁶ E kua turu maira to reira ravarai ia ratou e pini ua ake, i te au āriki ario, i te auro, i te apinga, e te au puaka, e te au mea meitaki ra, te taka ra te au mea katoa i apai uaia ra.

⁷ Kua apai maira te ariki ra ko Kuro i te au āriki no roto i te are o Iehova, i apaiia mai e Nebukaneza mei Ierusalema mai, e kua tukuia e ia ki roto i te are o tona ra au atua;

⁸ Ko te au apinga ïa ta te ariki o Peresia ta Kuro i apai mai i te rima o Miteredata te tiaki apinga, e kua tatau atura ki mua ia Sesebazara, e ariki no Iuda.

⁹ Teia taua au mea i tatauia ra: e toru ngauru kapu auro, e okotai tausani kapu ario, okotai takau ma iva matipi;

¹⁰ E toru ngauru āriki auro, e a anere okotai ngauru āriki ario akino ake, e okotai tausani āriki ke ra.

¹¹ Te katoatoa anga o taua au āriki auro e te ario ra, e rima ïa tausani e a anere. Ko taua au mea katoa ïa ta Sesebazara i apai mai, ma te aronga katoa i tuikaaia ra, ko tei aere katoa mai ki Ierusalema mei Babulonia maira.