Exodo 40 - Bibilia Tapu

PENE XL - 40

Te puakapa i te akatu angaia ra e te akamainu angaia.

¹ Kua tuatua mairā Iehova kia Mose, na ko maira,

² Ei te rā mua i te marama mua ra e akatu ei koe i te puakapa, te Are uipaanga nei.

³ E naau e tuku i te aruna kite ki roto, ka arai ei i te aruna ki te paruru.

⁴ E naau e apai i te kaingakai ki roto, e e akanoonoo oki i te ka akanoonooia ki rungao ra; e ka apai oki koe i te vairanga lamepa ki roto, ka tuku ei i te au lamepa ki rungao.

⁵ E tuku oki koe i te atarau auro no te atinga kakara ki mua i te aruna kite ra, e te akauta oki i te paruru no te ngutupa puakapa ra.

⁶ E ka akatu koe i te atarau atinga karakaratio ki mua atu i te ngutupa puakapa i te Are uipaanga ra.

⁷ E e tuku oki koe i te āriki-vai i te va i te Are uipaanga e te atarau ra, ka tuku ei i te vai ki roto.

⁸ E akatu oki koe i te paepae e pini ua ake, e akauta oki i te paruru no te ngutupa paepae ra.

⁹ E rave oki koe i te manongi akatainu, ka akatainu ei i te puakapa, e te au mea ravarai i roto ra; e akapera koe i te akatapu atu, e i te au mea ravarai no te reira, kia tapu ïa.

¹⁰ E akatainu koe i te atarau atinga karakaratio, e te au mea ravarai no te reira, e akapera i te akatapu i taua atarau ra, kia riro ei atarau tapu roa.

¹¹ E akatainu oki koe i te āriki-vai e tona vaevae, e akapera koe i te akatapu i te reira.

¹² Ka arataki ei koe ia Aarona e tana au tamariki ki te ngutupa o te Are uipaanga, ka orei ei ia ratou ki te vai.

¹³ Ka akakakau ei ia Aarona ki te au kakau tapu, ka akatainu ei, e akapera koe i te akatapu iaia, kia rave aia i te taoonga taunga iaku nei.

¹⁴ E arataki katoa koe i nga tamariki nana, ka akakakau ei ia ratou ki te piriaro.

¹⁵ E akatainu oki koe ia ratou, mei taau i akatainu i to ratou ra metua, kia rave ratou i te taoonga taunga iaku nei: ka riro tikai oki to ratou akatainu angaia ei akairo no te taoonga taunga, e vaoo tamouia ia ratou e ope ua ake to ratou au uki ra.

¹⁶ Akapera atura oki a Mose: te au mea ravarai ta Iehova i akaue mai kiaia ra, ko tana ïa i rave.

¹⁷ Tei te marama mua, i te rua o te mataiti, tei te rā mua o taua marama ra, i akatuiaʼi te puakapa ki runga.

¹⁸ E akatu akerā Mose i te puakapa, akamou iora i te au turanga, e akatu akera i te au tapaanga rakau, e momono akera i te au tea, e akatu akera oki i te au pou.

¹⁹ E oora akera aia i te are ki rungao i te puakapa, e kua tuku akera oki i te tapoki are ki runga roao; ta Iehova i akaue mai kia Mose ra.

²⁰ Kua rave iora aia i nga papa kite ra, kua tuku iora ki roto i te aruna; e momono akera nga amo ki roto i nga tatai o te aruna ra, e tuku atura i te tapoki ki rungao i te aruna.

²¹ Kua apai oki aia i te aruna ki roto i te puakapa, e akauta akera i te paruru ki runga, ei arai, e arai atura i te aruna kite ra; ta Iehova i akaue mai kia Mose ra.

²² Tuku iora aia i te kaingakai ki roto i te Are uipaanga ra, i te pae o te puakapa i te pae i apatokerau ra, ki vao atu nei i te paruru ra.

²³ Akanoonoo iora oki aia i te areto ki rungao, ma te akapapa marie, ki mua i te aroaro o Iehova; ta Iehova i akaue mai kia Mose ra.

²⁴ Tuku iora aia i te vairanga lamepa ki roto i te Are uipaanga, i te pae i apatonga o te puakapa ra, aite akera ki te kaingakai ra.

²⁵ Tutungi iora aia i te lamepa ki mua i te aroaro o Iehova; ta Iehova i akaue mai kia Mose ra.

²⁶ Tuku iora aia i te atarau auro ki roto i te Are uipaanga, ki mua atu i te paruru ra;

²⁷ E kua tutungi iora aia i te atinga kakara ki rungao ra; ta Iehova i akaue mai kia Mose ra.

²⁸ E kua akauta akera aia i te paruru i te ngutupa o te puakapa ra.

²⁹ Kua tuku iora aia i te atarau atinga karakaratio, ki mua atu i te ngutupa puakapa o te Are uipaanga ra; ka apai ei aia i te atinga karakaratio, e te atinga kai ki rungao; ta Iehova i akaue mai kia Mose ra.

³⁰ Kua tuku iora oki aia i te āriki vai i te va i te Are uipaanga e te atarau ra, e kua tuku iora i te vai ki roto ei orei anga;

³¹ Kia orei a Mose e ko Aarona e tana au tamariki i to ratou rima e te vaevae:

³² Kia aere ratou ki roto i te Are uipaanga ra, e kia aere oki ki te atarau ra, kua orei ïa; ta Iehova i akaue mai kia Mose ra.

³³ Kua akatu akera aia i te paepae i vao ake i te puakapa, e te atarau e pini rava akera; e kua akauta akera i te paruru i te ngutupa o taua paepae ra. Kua oti takiri akera taua angaanga ra ia Mose.

³⁴ E tapokiia iora te Are uipaanga e tetai tumurangi, e ki akera te puakapa i te kakā no Iehova.

³⁵ Kare akera i tika ia Mose kia aere ki roto i te Are uipaanga, no te mea te vai ra te tumurangi ki rungao, e kua ki oki te puakapa i te kakā no Iehova.

³⁶ E me peke taua tumurangi i runga i te puakapa ra ki runga, kua aere te tamariki a Iseraela i to ratou katoa ra au aerenga:

³⁷ Kia kore ra e peke taua tumurangi ra ki runga, kare ïa ratou i aere, kia tae ra ki te rā i peke ei ra i aere ei.

³⁸ E noo oki taua tumurangi no Iehova ra ki rungao i te puakapa i te ao, e kia po, riro atura ei ai ki mua i te mata o te ngutuare ravarai o Iseraela, i to ratou ra au aerenga.