Esetera 3 - Bibilia Tapu

PENE III - 3.

Ko Hamana i akateiteiia e te ariki, kare ra i taurekarekaia e Moredekai: i tona makitakita iaia i kimi ei aia i te ravenga kia pou rava te ngati Iuda.

¹ E I MURI ake i teianei au mea, kua akamaata maira te ariki ra ko Ahasueru ia Hamana, te tamaiti a Hamedata e ngati Agaga, e kua akateitei akera iaia, tuku atura i tona nooanga i rungao i to te aronga mamaata ki ona ra.

² Kua tuturi iora te au tavini ravarai o te ariki, tei noo i te ngutupa o te ariki, ki raro ra, e kua akangateitei ia Hamana: kua pera oki ta te ariki i akaue iaia. Kare rā Moredekai i tuturi ki raro, kare oki i akangateitei atu.

³ Kua karanga atura te au tavini o te ariki i noo i te noo i te ngutupa o te ariki kia Moredekai, Eaa koe i akaatikau ei i te akauenga a te ariki ra?

⁴ E kia tuatua tamou mai ratou kiaia, kare e rā i tukua, e kare akerai aia i akarongo atu, kua akakite akera ratou kia Hamana, kia kite ratou i ta Moredekai au tuatua i te tupu anga: kua akakite oki aia kia ratou e ngati Iuda aia.

⁵ E kite akerā Hamana kare a Moredekai e tuturi ki raro, kare oki e akangateitei atu iaia, ki rava akerā Hamana i te riri.

⁶ E mea akavaavaaia i tona manako kia opu tona rima ia Moredekai anake ua ra, kua akakiteia oki aia e ratou i to Moredekai iti-tangata: umuumu aturā Hamana kia pou takiri iaia i te mate te ngati Iuda ravarai e pini ua ake i te basileia katoa o Ahasueru, ko te au tangata no Moredekai.

⁷ E tae akera ki te marama mua, koia oki te marama ra ia Nisana, i te mataiti okotai ngauru ma rua o te ariki ra o Ahasueru, kua tuku iora ratou i te Pura, koia te kelero nei, ki mua ia Hamana i tera rā i tera rā, i tera marama i tera marama, e tae akera ki te ngauru ma rua ra, koia te marama ra ko Adara.

⁸ Kua tuatua mairā Hamana ki te ariki ra kia Ahasueru, Te noo aere nei tetai papaki tangata, kua pueurikiriki keia ra i roto i te au tangata i te au enua katoa i toou nei basileia e tu ke oki ta ratou au ture ki ta te tangata katoa nei; kare oki e akono i te ture a te ariki nei: kare oki a te ariki puapinga kia vaooia taua au tangata nei.

⁹ Kia tika i te ariki ra, kia tataia te tuatua kia taia ratou: e naku e apai atu i te ario e okotai ngauru i te tausani i te taleni na te aronga e rave i te angaanga, ka apai mai ei ki roto i te uipa anga apinga a te ariki ra.

¹⁰ Kiriti akera te ariki i te momono-rima nona i runga i tona rima, e kua tuku atura kia Hamana, te tamaiti a Hamedata te ngati Agaga, ki te enemi o te ngati Iuda.

¹¹ Kua karanga atura te ariki kia Hamana, Ko te ario kua orongaia ïa naau, e te au tangata katoa oki, kia rave koe i taau e anoano ia ratou ra.

¹² Tikiia atura te au tata tuatua a te ariki i reira, i te rā okotai ngauru ma toru i te marama mua ra, e tataia iora te au mea katoa ta Hamana i akaue atu, ki te au tutara tauturu no te ariki ra, e te au tutara i runga i te au enua katoa, e te ui rangatira katoa o te au tangata ravarai i te au enua katoa ra, i tataia i te reo o te tangata katoa ra; i tataia ma te ingoa o te ariki ra o Ahasueru ki rungao, e i akairoia ki te momono-rima o te ariki ra.

¹³ E akauia atura te au leta ra e te aronga apai leta ki te au enua ravarai o te ariki ra, e ta, kia mate, e kia pou takiri, te au ngati Iuda ravarai, ko tei ou, e ko tei ruaine, te au tamariki mea riki, e te au vaine, i te rā okotai, i te rā okotai ngauru ma toru i te marama okotai ngauru ma rua ra, koia te marama ra ko Adara, e ei noni oki i ta ratou apinga ra.

¹⁴ Ko te tu ïa o taua tuatua i tataia ra ei ture, kia akakite aereia ki te au enua katoa, e te au tangata katoa ra, e akateateamamao ratou kia tae ki taua rā ra.

¹⁵ Riro anake atura te aronga apai leta ra, i rapurapu i te tuatua a te ariki ra, e tukuia akera taua ture ra i te are o te ariki ra i Susana. Noo iora te ariki raua ko Hamana e inu; kareka taua oire ra ko Susana, kua tumatetengaia ïa.