Esetera 1 - Bibilia Tapu

PENE I - 1

Ko Ahasueru i te akatupu anga i te kaingakai, e te ariki vaine kare i tae.

¹ I TE au rā o Ahasueru, ko Ahasueru teia tei iaia te au i te au enua okotai anere e rua ngauru ma itu, mei Inidia mai e tae ua atura ki Kusa:

² Tei taua au rā ra, to te ariki to Ahasueru noo anga ki runga i te terono o tona ra basileia, i te are ariki ra i Susana,

³ I te toru o te mataiti o tona ra au, akatupu iora aia i tetai kaingakai na te aronga mamaata katoa nona, e te au tavini nona; te mana o to Peresia e to Madai i mua i tona aroaro, te aronga nunui, e te au tutara o te au enua:

⁴ Akakite atura aia i te apinga maata o tona ra basileia kakā, e te ngateitei o tona ra tapunui, e manganui te rā, okotai anere e varu ngauru i te au rā.

⁵ E ope akera ïa au rā, kua akatupu iora te ariki i tetai kaingakai e po itu akera, na te au tangata katoa i kitea i te are o te ariki i Susana, te aronga mamaata e te tangata rikiriki, i roto i te paepae i te kainga i te are o te ariki ra;

⁶ Te paruru o taua are ra e kakau teatea, e te memeitaki, e te kerekere, i akamouia i te au taura orongā meitaki ra e te purapura, ki te au tatai ario, e nga pou toka inuinu: te au roi, e auro ïa, e te rengarenga, e te kerekere.

⁷ E kua oronga ratou kia inu ki roto i te au kapu auro, te au kapu ra tu ke tetai e tetai, e te wina ariki e manganui i tei tau ki te ariki ra.

⁸ Kua akonoia te ture i taua inu manga ra; kare i akatinaia: kua pera oki te ariki ki te aronga katoa i akataoongaia i tona are, e e akono ratou i to te tangata katoa ra anoano.

⁹ Koia katoa te ariki vaine ko Vaseti, kua akatupu katoa aia i tetai kaingakai na te au vaine, i roto i te are ariki no te ariki ra ko Ahasueru.

¹⁰ E tae akera ki te itu o te rā, kia rekareka te ngakau o te ariki ki te wina, kua akaue atura aia ia Mehumana, ia Bizeta, ia Harabona, ia Bigeta, e ia Abageta, ia Zetara, e ia Karakasa, i nga tavini ariki toko itu, ko tei tavini i mua i te aroaro o te ariki ra o Ahasueru,

¹¹ E arataki mai i te ariki vaine ra ia Vaseti ki mua i te ariki ma te korona ariki katoa, e akakite ki te tangata e te ui ariki katoa i tona meitaki: e purotu oki tona kia akara atu.

¹² Kare akerai te ariki vaine ra ko Vaseti i tae mai i te akaue a te ariki i te rima o te au tavini ariki, riri rava akera te ariki, otooto rava akera te riri i roto iaia.

¹³ Kua karanga atura te ariki ki te au tangata pakari, ko tei kite i te au tuatau ra, (i pera oki te ravenga a te ariki i te aronga katoa i kite i te ture e te tuatuatau:

¹⁴ Te noo vaitata maira iaia ko Karesena, ko Setara, ko Adamata, ko Taresisa, ko Meresa, ko Maresana, e ko Memukana, e aronga mamaata ïa toko itu no Peresia, e no Madai, ko tei kite i te mata o te ariki, e tei ia ratou oki te taoonga mana i te basileia ra;)

¹⁵ E akapeea tatou i te ariki vaine nei ia Vaseti, i tei tau ki te ture, koia kare i akono i te tuatua a te ariki ra a Ahasueru i te rima o te au tavini ariki?

¹⁶ Kua tuatua mairā Memukana ki mua i te aroaro o te ariki e te ui ariki ra, Kare ko te ariki anake ra tei takinga-kinoia e te ariki vaine e Vaseti, ko te ui ariki katoa ra, e te au tangata katoa i te au enua katoa o te ariki nei o Ahasueru.

¹⁷ Ka riro oki taua ravenga a te ariki vaine nei i te kitea puia e te au vaine katoa, e ka akavaavaa mai oki ratou i ta ratou au tane i to ratou mata, kia kitea te rongo e, kua akaue te ariki ra ko Ahasueru i te ariki vaine ia Vaseti kia aratakiia mai ki mua i tona aroaro, e kare akerai aia i tae.

¹⁸ Koia katoa te au vaine rangatira i Peresia e to Madai ko te kite i taua ravenga a te ariki vaine nei, ka riro i te tuatua i teianei rā ki te aronga mamaata katoa i o te ariki nei; tupu atura te akavaavaa e te riri maata.

¹⁹ Kia tika i te ariki, ei ture ariki tana e akatupu, e kia tataia oki ki roto i te au ture a to Peresia e to Madai, kia kore rava e akakoreia, E aurakā Vaseti e aere akaou mai ki mua i te aroaro o te ariki o Ahasueru; e tuku atu oki te ariki i tona kainga ariki ra no tetai ko tei meitaki ake iaia.

²⁰ E kia oti te ture a te ariki tana e akatupu ra i te akakiteia e pini ua ake tona basileia, (e mea maata oki,) ka riro te au vaine ravarai i te tatomo marie ki ta ratou au tane, ko tei mamaata e tei rikiriki.

²¹ Tau meitaki rai taua tuatua ra i te ariki e te ui ariki katoa ra; e kua akapera oki te ariki i ta Memukana i tuatua maira:

²² Kua akau akera oki aia i te au leta ki te au enua katoa o te ariki ra e pini rava akera taua au enua ra, i te tuatua i tataia e to reira enua, e ki te au tangata katoa i to ratou uaorai reo e, kia tutara te au tane katoa ki runga i tona uaorai ngutuare, e kia tutu aereia ïa i te reo o te au tangata katoa ra.