Ebera 1 - Bibilia Tapu

PENE I - 1

Ko te Tamaiti a te Atua tei teitei: kare te au angela e tau kia aite iaia.

¹ KO te Atua, ko tei tuatua rikiriki mai i muatangana, e manganui te tu o te tuatua anga mai, ki te ui tupuna i te au peroveta;

² Ko tei tuatua mai ïa kia tatou i teianei tuatau openga i tana Tamaiti, ko tei akariroia e ia ei Atu no te au mea ravarai, e kua anga oki i nga ao katoa nei iaia;

³ Ko te kakā oki aia o tona tapunui, e ko te tutu tikai nona uaorai, e te mou ra aia i te au mea katoa nei i tana tuatua mana, kia oti ta tatou ara i te tamāia e ia uaorai, noo iora ki raro i te rima katau o te Mana i te ngai teitei.

⁴ E meitaki maata oki tona i to te au angela ra, mei te ingoa tangata tuanga i rauka iaia, i maata ua atu i te meitaki i to ratou ra.

⁵ Koai oki to taua au angela ra ta te Atua i karanga atu mei muatangana mairai e, “Ko taku Tamaiti koe; i nakonei koe i akaanauiaʼi e au?” E tana oki i na ko ra e, “Ei metua au nona, e ei Tamaiti aia, naku?”

⁶ E iaia oki i tuku mai i te tama mua i te ao nei, na ko akera aia, “Kia akamori te au angela katoa a te Atua iaia.”

⁷ I te au angela ra, te na ko ra aia, “I te akariro anga i te au angela nana ra mei te matangi, e te au tavini nona mei te ai mura.”

⁸ Kareka i te Tamaiti ra, te na ko ra ïa, “To terono, e te Atua e, e vai rai e tuatau ua atu, e sepeta tuatua-tika ïa te sepeta o toou basileia.

⁹ I inangaro koe i te tuatua-tika, e te rikarika ra koe i te kino; i akatainu ei te Atua to Atua ra, ia koe i te manongi ra o te rekareka, e maata rava atura i toou au oa ra.”

¹⁰ E, “Naau, e Iehova, i akamou i te enua i taito roa ra; te au rangi oki, na toou ïa rima i anga;

¹¹ Ka riro ra te reira i te pou, e toe ra koe; e ka piro ratou ravarai mei te kakau ra;

¹² E ka atuatuia ratou e koe mei te kakau ra, kopae ua rai ratou; ko koe rai koe, e kare rava toou ra mataiti e ope.”

¹³ E koai to taua au angela ra tana i tuatua ua atu, mei taito mairai e, “Ka noo ki taku rima katau nei, e kia akariroia e au to au enemi ei pange vaevae noou?”

¹⁴ Kare aina ratou ravarai i te tavini vaerua anake, i tonokia ei matuapuru i te aronga tuanga i te ora ra?