Amosa 1 - Bibilia Tapu

PENE I - 1

Te akakite nei a Amosa i to Arama, to te Philiseti, to Turia, to Edoma, e to Amona mate, no ko i te Atua ra.

¹ TE tuatua a Amosa, tei no roto i te au tiaki anana i Tekoa ra, tana i kite ia Iseraela, i te au rā o Uzia ariki no Iuda, e i te au rā o Ieroboama te tamaiti a Ioasa ariki no Iseraela, ka rua akera mataiti i mua ake i te ngaruerue anga enua ra.

² E kua tuatua maira aia, E ngunguru mai a Iehova mei Ziona, e puroro mai tona reo mei Ierusalema; e aue oki te au one kai o te au tiaki mamoe ra, e te take o Karamela, e mae ïa.

³ Te na ko mairā Iehova: No nga ara e toru a Damaseko e e a oki, e kore ei au e taruri ke i tana ra utunga; no te mea, kua pāpā ratou ia Gileada ki te pāpā auri ra;

⁴ E akaunga atura au i te ai ki roto i te are o Hazaela, e pou te au are ariki o Bene-adada i te reira.

⁵ E aati oki au i te au tea i Damaseko, e kokoti ke atu au i tei noo i te o ra i Avena, e tei mou oki i te sepeta i Bete-edene, e e riro te au tangata i Arama ei tuikaa ki Kira, te tuatua mairā Iehova.

⁶ Te na ko mairā a Iehova; No nga ara e toru a Gaza, e e a oki, e kore ei au e taruri ke i tana ra utunga; no te mea, kua apai tuikaa ratou i te tangata e kua ope rava, kia tuku atu ia ratou ki to Edoma.

⁷ E e akaunga atura au i te ai ki roto i te patu o Gaza, e pou oki tona au are ariki i te reira.

⁸ E kokoti ke atu au i tei noo i Asedoda, e tei mou i te sepeta i Asekelona; e akaoki ra au i toku rima ki runga ia Ekerona: e te toenga o te Philiseti, e pou ïa, te tuatua maira te Atu ra ko Iehova.

⁹ Te na ko mairā Iehova; No nga ara e toru a Turia ra, e e a oki, e kore ei au e taruri ke i tana ra utunga, no te mea, kua apai anake ratou i te au tuikaa ravarai ki to Edoma, e kare akera i akamaara i te koreromotu taeake.

¹⁰ E akaunga atura au i te ai ki roto i te patu o Turia ra, e pou oki tona au are ariki i te reira.

¹¹ Te na ko mairā Iehova; No nga ara e toru a Edoma, e e a oki, e kore ei au e taruri ke i tana ra utunga; no te mea kua arumaki aia i tona taeake ma te koke, e kua akaruke takiri i te aroa, e kua aeae tamou tona riri, e kua akamou aia i tona riri e tuatau ua atu.

¹² E akaunga atura au i te ai ki roto ia Temana, e pou oki tona au are ariki o Bozara i te reira.

¹³ Te na ko mairā Iehova; No nga ara e toru a te au tamariki a Amona, e e a oki, e kore ei au taruri ke i tana ra utunga; no te mea kua tuaki ratou i te au vaine nui i Gileada, kia akamaata ratou i to ratou ra kotinga.

¹⁴ E tutungi ra au i te ai ki runga i te patu i Raba, e pou oki te au are ariki i te reira; ma te maeva i te rā tamaki anga ra, e ma te uriia i te rā puaioio ra.

¹⁵ E riro tuikaa oki to ratou ariki, koia ma te ui ariki katoa i ona ra, te tuatua mairā Iehova.