EBRIYA 1 - ATHARKUTHROU NT (BSI)

Asanaopa Thouwa Chungthieng Rou

¹ Amatinga hei thouwa Chungthieng na ani pipu ngeita rouphupa ngei yarra ma ong adang adanga ril pi hou ha,

² chuna atreem ni rungni hana ah anita asanaopa yarra rilpi so weh. Asanaopata pot limpa hina mitpu chang pi ah, makol heithou simlei ram limpa sempi so weh.

³ Chungthieng hina mahung majai akha chu mawar ha, asanaopa makolla akha chu Chungthieng mamel mak malla rilpiah, simlei hina awat eyalim angakpi ma ae ma tronglam na pepi ae. Malmashi ngei pap kokpi ranga tullu lu su nutinga, ehekta matik mangal na shihakti Chungthieng ongna wanramma changting nakal ting amona onge.

Chungthieng Asanaopa Hina Loktek Na

⁴ Asanaopa hata wanrui ngeita lella chungtek pi ah, Chungthieng na amota pek mingha manita lella chung tekke.

⁵ Chuna Chungthieng na wanrui ngei kolla hayongpa tronglo supril rilno songe hachu, “Nangha kasanaopa ae; Awoni heithouwa napa ha kei asinge.” Hiyongpa tronglo, atu wanrui akha takom Chungthieng naril no weh, “Kei napaha chang ang inge, akha chu amona kasanaopa ha chang ange.”

⁶ Chutiweta Chungthieng na ahalpa pok asanaopa simlei hina hla ang tinga amona hita rille, “Chungthieng hina wanrui ngei limpana amota mokkanga ae.”

⁷ Chutiweta Chungthieng na wanrui ngei kolla hita rille, “Chungthieng na wanrui ngeiha thirang phaibu changa semme, akha chu asuuk ngeita meitrungna ae.”

⁸ Asanaopa kolla Chungthieng na hita rille, “Oh Chungthieng na reng ramha atreem amnowa ahoi palla am su oh. Nangna solwai chunga roukam ae itta munha ah adiek ka ngir oh.

⁹ Nangna adiek ae meeta lungshi oh akha chu aral ae meeta atir oh. Hana sarukka Chungthieng na nangta halla shuk kae; akha chu ajak ati itta munha ah, lella ariem kom pepiya, atlongpi ngeita lella ajak ati hakom pi pisowe.”

¹⁰ Amona hita kom rille, “Rengpa, nangna aleiram hi athouna heithouwa sempi ah, akha chu nakut mak hina waram kom sem pi so weh.

¹¹ Na pot lim mang happange, chuti weta nang mang nolutta amange; Na pot limpa pun dir lakka hou hekta la ah hou ange.

¹² Apai punni hekta hlappa shi ange, akha chu pun dir hlong hekta mani chu hlong shi oh weh. Chutiweta amochu maringchan hi ahlong am no lutta, atreem ti kom am no weh.”

¹³ Hiyongpa trong atu wanrui ngei kolla Chungthieng na ril no weh hachu: “Keina nata andat mee ngeita nakae hana to ahshi malim phaowa, kata changting nakal hina ongo.”

¹⁴ Hale chu, wanrui ngei chu atu meh? Mani chu Chungthieng matullu ae rang, muihla ngei ae akha chu aring kaeto pha mee ngeita sanranga mahla muihla ngei ae.