Yilinga 18 - Mukanda Wa Zambi 1970

Ku Korintu

¹ Kulutwe lia yuma yino, Paulu yakatuka ku Atene, yaya ku limbo lia Korintu.

² Yawana ko umwe Kayuda, jina lienyi Akwila, wasemukine mu chifuchi cha Pontu. Ha matangwa waze ene hakatuka ku chifuchi cha Halia hamwe ni mukwo pwo Prisila, mumu mwanangana Klaudiu te hahana Shimbi ngwenyi, Ayuda eswe akatuke ku limbo lia Roma. Paulu yaya ni kwatala,

³ yatwama hamwe no, mumu te akwa milimo yimuwika, ya kutunga mazuwo a makubu.

⁴ Tangwa heswe lia kuhwima, Paulu yalongesa mu zuwo lia kuwayila lia Ayuda, yafupa kukununa Ayuda ni Agresia.

⁵ Muze Sila ni Timoteu haakatuka ku chifuchi cha Masedonia ni haaheta mu limbo lia Korintu, Paulu yabutuka kulongesa tangwa ha tangwa. Yashindakenya Ayuda ngwenyi: “Yesu mwe Chilamwina yoze Zambi alakenyene.”

⁶ Alioze yaalimika nenyi ni kumushililika. Paulu yakukumuna fufuta ku mahina jenyi. (Ha chino, yaalweza ngwenyi, kanalihandununa no.) Mba yaamba ngwenyi: “Nyi munukafwa mu milonga yenu, ayo yinanutale. Yami ngunasambe. Chize ku haliabwila ngunayi kuli waze hi Ayuda ko.”

⁷ Neye yakatuka, yanjila mu zuwo lia umwe lunga, jina lienyi Titu Justu, yoze te wakuwayila Zambi hamwe ni Ayuda. Zuwo lienyi te lialihata ni zuwo lia kuwayila.

⁸ Krispu, mukwa lutwe wa zuwo lia kuwayila lia Ayuda, yafuliela Mwene Yesu hamwe ni akwa zuwo lienyi eswe. Akwa Korintu akwo anji nawa, muze heevwa Paulu, yaafuliela. Mba yaapapachisa.

⁹ Ha umwe ufuku, Mwene Yesu yambila Paulu mu Usolwelo ngwenyi: “Kanda wivwa woma, hanjika lume, kanda, uhola,

¹⁰ mumu yami nguli hamwe ni yena. Niumwe makukwata ni kukulinga chibi, mumu atu anji nguli no mu limbo lino.”

¹¹ Kashika yatwama ko mwaka ni tukweji asambano nikwalongesa maliji a Zambi.

¹² Alioze, muze haapwisa Galiu mukwa kuyula wa chifuchi cha Gresia, Ayuda yaakatukila Paulu ni mbunge yimuwika, yaamutwala ku chisopelo.

¹³ Ngwo: “Yono kakukununa atu ha kuwayila Zambi ngwe chize kuchalitele ni Shimbi.”

¹⁴ Alioze, muze Paulu ambile kuhanjika, Galiu yambila Ayuda ngwenyi: “Nyi te kuwabwanga mulonga wa kuvulumuna hanji ubi unene, kachi te nalihumikiza ni yenu Ayuda.

¹⁵ Alioze, mumu yili yihula hakutwala ku maliji ni majina a Shimbi ja yenwene, yami chichi kuyisopa.”

¹⁶ Neye yaahanga ku chisopelo.

¹⁷ Mba ayo eswe yaakwata Sostene, mukwa lutwe wa zuwo lia kuwayila, yaamulamba kulutwe lia chisopelo. Alioze Galiu kalwile ko yuma yize yeswe.

Paulu yahiluka ku Antiokia

¹⁸ Paulu yatwama matangwa anji ku Korintu, mba yalishika ni akwetu akwa Kristu, yanjila mu ulungu, yaya ku chifuchi cha Siria hamwe ni Prisila ni Akwila. Muze kanda achikatuka ku limbo lia Senkria, Paulu yalakenya chilakenyo, mba yatewula kambu jenyi.

¹⁹ Yaheta ku limbo lia Efesu. Kwenako ahichikile Prisila ni Akwila. Neye yanjila mu zuwo lia kuwayila lia Ayuda, yahamika no.

²⁰ Muze amulembelele atwame hamwe no shimbu lisuku, katayijile ko,

²¹ alioze yalishika no ngwenyi: “Mungukeza nawa, nyi Zambi mapala.” Mba yakatuka ku Efesu, yanjila mu ulungu.

²² Muze haheta ku limbo lia Sesarea, yaya ku Yerusaleme, yameneka Chikungulwila, mba yaya ku Antiokia.

²³ Muze hatwama ko shimbu, yakatuka ko, yaya ndusu mu chifuchi cha Galashia ni cha Frigia nikutakamisa tumbaji eswe.

Apolo yalongesa mu Efesu

²⁴ Kayuda umuwika, jina lienyi Apolo, yeza ku limbo lia Efesu. Ku limbo lia Alexandria asemukinyine. Yalongoloka kuhanjika kanawa, yanyingika Mukanda wa Zambi.

²⁵ Haanamulongesa jila ya Mwene. Neye yalihana kuhiana kunyingikisa ni kulongesa kanawa chikuma cha Yesu, alioze yanyingika shina upapachiso wa Yoano.

²⁶ Yabutuka kuhanjika ni hamu mu zuwo lia kuwayila lia Ayuda. Muze Prisila ni Akwila haamwivwa, yaamutwala ku mahio, yaamulumbunwina jila ya Zambi kanawa.

²⁷ Muze Apolo ambile kuya ku chifuchi cha Gresia, akwetu akwa Kristu yaamukwasa nikusoneka mukanda kuli tumbaji a mu chifuchi chize ha kumutambula kanawa. Muze haheta ko, yakwasa kuhiana eswe waze afulielele ku utu wa Zambi.

²⁸ Mumu yakununa Ayuda ni tachi ku meso ja atu eswe. Yaalongesa ni ku shindakenya ku Mukanda wa Zambi ngwenyi: “Yesu mwe Chilamwina yoze Zambi alakenyene.”