Filemón 1 - Manityanati Tupax

Makionkox

¹ Axɨñɨ Pablo, yaka auna amanañɨmpo tyopikiti Cristo Jesús, ichepetityo usaruki Timoteo supakionko ɨmoti subaruki Filemón, naki supachɨkoisapa,

² supakionkoityo ɨmoma axɨbama ikokoromati Jesús axɨbama oberabarama au nipoxti, ɨmointyo suikiasi Apia ɨmotityo usaruki Arquipo, naki anankati suichepe.

³ Tari axti Tupax naki Uyaɨ axtityo Yɨriabux Jesucristo aukurusɨka uimia taikiana aixhimiakama nomɨnantɨ aboi.

Machampienkakax

⁴ Filemón taikiana ñachampienkaka ɨmoti naki Tupax iñemo au nixheanka, axtɨ xhakionkañɨ akɨ,

⁵ tyopiki ipiate ta kuasɨrɨti aemo Yɨriabux Jesús onkatityo ɨmoti, kuasɨrɨmaintyo aemo namanaiña axɨbama aɨtoxti Tupax.

⁶ Axɨkɨ onkatɨ ɨmoti Tupax takana axɨsomɨ, sane naukiche xhankikia pɨnanakiti taikiana onkatɨ ɨmoti chepe axtɨ tɨtusiu aemo nanaiña axɨba omixhia uisamunio tyopiki kuasɨrɨti oemo Cristo.

⁷ Saruki Filemón, taruku nipukɨnunku arukuityo nuxia iñemo tyopiki ipiate taruku nakumananaunku ɨmo makiataka, tyopiki obi, aruku ɨmoma pukɨnuñamaintyo namanaiña axɨbama ikokoromati Tupax.

Mankikixh tyakuti Onésimo

⁸ Sane naukiche, au nɨrixhti Cristo ane nisɨriaka nauki xhakɨpu aemo axɨna achɨkoboibo,

⁹ au nixhakionko uxia axtɨ asamuka nuxia iñemo au nɨri numakumananaunku. Axɨñɨ, Pablo, chauki tiyarusɨrɨxɨñɨ, yaka auna amanañɨmpo tyopikiti Cristo Jesús,

¹⁰ asamu nuxia iñemo asusiusuti Onésimo. Axti tyonenti takanati naki isaɨ, tyopiki sobi suraboi sukarɨti axɨba omixhia manityakax auna kauta yaka amanañɨmpo.

¹¹ Tɨkañe, axti Onésimo tyonenti kumanakax champɨ nanenekicheti aemo, tapɨ kaɨma chiyaupɨ nɨmocheti obi takanaintyo iñemo.

¹² Sane naukiche ikɨpukati tanu tatityo aesakɨ: uxia iñemo axtɨ asukiukati takana axtɨ axɨñɨ iñatai au napo.

¹³ Ta ixhankapɨ sɨsioti auna chepeñɨ, nauki aserebiti iñemo aityobokɨ axɨna yakaiki auna amanañɨmpo tyopiki axɨba omixhia manityakax.

¹⁴ Axɨñɨ chixhankapɨ isamune axɨna chisiupɨ nakionko, nauki axɨna aisamute iñemo tapɨ aisamute ui nixhakɨpuku aisamuse auki noñemantoe.

¹⁵ Axti Onésimo ikiaɨburutiyɨ atupekukikɨ ñome axɨba mantukubatai naneneka yakɨna kaɨma anati tato atupekukɨ ɨmo nanaiña naskɨbeka,

¹⁶ ta kaɨma tapɨ aisamute takana ɨmoti kumanakax, aisamuse takana axtɨ arukiti naki taruku nikuasɨrɨkɨxti aemo. Axɨñɨ taruku nikuasɨrɨkɨxti iñemo, tapɨ axɨkɨ tari taruku nikuasɨrɨkɨxti aemo xhopɨnanakiñɨ. Tapɨ aisamute takana ɨmo axɨbama aruki ikuki axɨna kɨx ta takana axɨbama ikokoromati Jesús.

¹⁷ Axtɨ ñemanauntu ukanɨ ta arukiñɨ, tyopiki chepe oñonkatɨ ɨmoti Yɨriabux Jesús, sane naukiche xhankikia apɨnanakikɨ asamu nuxia asusiusuti takana axtɨ axɨñɨ.

¹⁸ Axtɨ axti Onésimo isamutenti axɨna chuxiampɨ, o axtɨ ebeoti aemo, aiña au nisɨri.

¹⁹ Axɨñɨ, Pablo, ikonomota axɨna sane ui niñee: Sobi ityoximia aemo nebekixhti. Chixhankapɨ sukanañɨ aemo aiña au nɨri, tyopiki axɨkɨ ebeka iñemo nasɨborikiatoe.

²⁰ Saruki Filemón, asamu nuxia iñemo, tapɨ aisamute chopikiñɨ aisamuse ui nakumananaunku ɨmoti Yɨriabux Jesús. Axɨkɨ isarukikɨ: ¡ache ipukɨnunkubuñɨ!

²¹ Xhakonomoka aemo tyopiki tusiu iñemo akokonaunka, tusiuityo iñemo ta aisamute ta'aiki pɨrɨkɨ axɨna xhankitio apɨnanakikɨ.

²² Sukanañɨntyo aemo, aikoñoko sɨmenuñɨ kauta besɨro sobi axtɨ iñatai tanu, tyopiki ñonkatɨ ñome nameanka ɨmoti Tupax nauki chebo uiti ichaesɨbu nauki yɨrotɨ tanu yasaraño.

Tyakɨrux makionkox

²³ Ñakionkoxti Epafras, naki anati chepeñɨ amanatipo tyopikiti Cristo Jesús,

²⁴ ñakionkoxɨmaintyo aemo axɨbama aboma chepeñɨ ɨmo niyachɨkoi axti Marcos, axti Aristarco, axti Demas axtityo Lucas.

²⁵ Tari axti Yɨriabux Jesucristo aukurusɨka uiti namanaiña.