Apocalipsis 21 - Manityanati Tupax

¹ Auki yastai kiatax napes kiatax kɨx. Tyopiki axɨmanu kusɨrɨbo napes chepe axɨmanu kɨsɨrɨbo kɨx chauki champɨki, saneityo axɨmanu narubaityu tux.

Axɨmanu kiatax Jerusalén

² Yastai axɨmanio poka champɨ nomɨnantɨ yokɨtɨpɨ, axɨmanu iyebo Jerusalén, kuatɨ akɨ auki napes, esakiti Tupax. Ananka koñokono takana axɨna kupikixh sɨro kɨtɨpɨ naibixh nauki apo, tɨniyɨkɨx aikuñunuti naki ikianabo.

³ Ñonkoityo kɨpurabo tosibixh kuatɨ auki nityɨmoxti Yɨriabux, nantɨ sane: “Auna axɨna kauta po'osoti Tupax aɨbuma axɨbama aɨtoxti. Axti Tupax po'osoti ñana aɨbuma, axɨma tyonema ñana aɨtoxti, axti Tupax tyonenti kunauntañati Tupaxti ɨmoma.

⁴ Uiti ñana aisɨbuti nisukɨxɨma, champɨki konkox, suchekixh, noxokox, nareokox. Tyopiki nanaiña axɨmanu ane tɨkañe chauki champɨki.”

⁵ Auki axti maniki tɨmonsoti au nityɨmoxti Yɨriabux nanti: “Nanaiña aɨbo tato sobi.” Auki nantityo: “Aikonomo, tyopiki ñemanaunkuxatoe axɨna manityakax ñomeantai amonkatɨ.”

⁶ Auki nantityo iñemo: “Chauki tuxiante nanaiña. Axɨñɨ tyonenti naki kusɨrɨboti takanaintyo nityakɨrux. Axti naki tosɨoti, ichamakati tux auki axɨmanu nantaityux sɨboriko, champɨ isane ityoboche.

⁷ Axti naki chɨtapenekotipɨ toxio ñana ɨmoti nanaiña axɨna sane enaxiboti. Axɨñɨ Tupaxɨñɨ ɨmoti tapɨti isaɨti.

⁸ Tapɨ axɨbama taruku nixhukuxɨma, axɨbama chɨmakokonaumpɨma, axɨbama chuxiampɨ uimia ɨmo makiataka, axɨbama mayatabayoka, axɨbama xhanxɨma ɨmomantoe, mapichareruka, axɨbama manaunuma ɨmo matupaka nisamuku mañoñɨnka namanaiñaintyo mañapanka, tyonema ñana axɨbama sɨrobomatɨ au axɨmanu narubaityu pes, tyone axɨmanu kiatax konkox.”

⁹ Auki kuatati taman axɨpekukimia axɨmanuma siete ángeles abe nichapoxɨma ubataso oboi axɨmanio siete tyakɨrux takisɨrɨkɨka, nanti iñemo: “Ariaku tauna, ityusiankana asukarɨkɨ axɨmanu kupikixh ikɨpostobo Nobixhax.”

¹⁰ Auki axɨmanu yastai uiti Espíritu Santo, axti maniki ángel ikianatiñɨ esa axɨmanu sɨrɨmanax yirityux petaisɨrɨ, ityusiankatati sukarɨñɨ axɨmanu yarusɨrɨx kauta sɨrɨmana poka champɨ nomɨnantɨ kɨtɨpɨ Jerusalén, kuatɨ akɨ auki napes esakiti Tupax.

¹¹ Axɨmanio poka bukuara ui nanentakaxti Tupax. Nikuakax takana kanx koñoxatai, takana axɨmanu kanx taruku nikuax, anentaxtai pɨrɨkɨ.

¹² Tyupeku axɨmanio poka, ane naxipox sɨrɨmanax, petaisɨrɨ, abe doce tyuruka ɨmo, abeu nanaiña tyuruka anati taikiana tamanti ángel. Yokɨtɨpɨ axɨmanio tyuruka ane korobo taman nɨrixhimia axɨmanuma doce aɨtoxti Israel.

¹³ Trex tyuruka abe ɨmo tansɨrɨ, trex ɨmo makiɨtɨx, trex ɨmo mankax trextyo ɨmo nimɨmɨx.

¹⁴ Axɨmanu naxipox axɨmanio poka abe doce kanka nityɨmox, kauta ane korobo yokɨtɨpɨ nɨrixhimia axɨmanuma doce amonkoma isiu axɨmanu Nobixhax.

¹⁵ Axti maniki ángel manityanati saɨbuñɨ ane uiti taman soema oro, uiche atusi ɨmoti kausane nityabaikixh axɨmanio poka, axɨmanio nityurux axɨmanuintyo naxipox.

¹⁶ Axɨmanu kauta amonkio axɨmanio poka abe cuatro nityoripiakɨka. Nabaikixh isiu takana narubaikixh. Auki axti maniki ángel imeninakatati ui axɨmanu soema: chepatai nubakax nabaikixh, napetaikixh chepe narubaikixh ane dos mil doscientos kilómetros.

¹⁷ Auki aimeninakati axɨmanu naxipox: ane sesentaicinco metros napetaikixh, isiuki ñameninakakaxɨma mañoñɨnka sane uiti maniki ángel.

¹⁸ Axɨmanu naxipox uxiante oboi kanka axɨba omixhantai, tapɨ axɨmanio poka omixhante ui oro anentaxtai pɨrɨkɨ.

¹⁹ Axɨmanio kanka nityɨmo axɨmanu naxipox amonkio mokoñokono oboi aruki nanaiñantai omixhiantai kanka: axɨmanu kusɨrɨbo kanx ane koñokono ui diamante. Kiatax ui zafiro, kiatax ui ágata, kiatax ui esmeralda.

²⁰ Axɨmanu kiatax ui ónice, axɨmanu kiatax ui rubí. Axɨmanu kiatax ui crisólito, axɨmanu kiatax ui berilo. Axɨmanu kiatax ui topacio. Axɨmanu kiatax ui crisoprasa, axɨmanu kiatax ui jacinto axɨmanu tyakɨrux ui amatista.

²¹ Axɨmanio doce tyuruka, ta doce kanka omixhantai. Taikiana taman tyurux uxiante ui taman nakax kanx koñoxatai. Axɨmanu kutubiux axɨpeku axɨmanio poka uxiante ui oro, kuaratai anentax pɨrɨkɨ.

²² Chiyastaipɨ nipoxti Tupax kauta abe axɨmanio poka, tyopiki axti Tupax naki taruku nɨriakaxti, tyone nipoxti, nipoityo axɨmanu Nobixhax.

²³ Axɨmanio poka champɨ nɨmoche oboi sux chepe panx nauki anentax oboi akamanu, tyopiki anentax ui nanentakaxti Tupax, nibiasaruxti tyone axɨmanu Nobixhax.

²⁴ Namanaiña amenkoma ñana ui nanentakax auki axɨmanio poka, mayɨriabuka ikuki axɨna kɨx ityoximiatama ɨmo nenaxixhimia.

²⁵ Axɨmanio tyuruka au axɨmanio poka chumamanapɨ ñana au sapes, akamanu champɨ ñana tobixh.

²⁶ Ityoximiatama ñana ɨmo nanaiña nenaxixhimia nanaiñaintyo axɨba omixhiantai ikuki axɨna kɨx.

²⁷ Chiyebopɨ ñana akamanu ui axɨna chuxiampɨ ɨmoti Tupax. Chiyebopɨ ñana uimia axɨbama manaunuma ɨmo matupaka nisamuku mañoñɨnka. Kunauntañamantai axɨbama ane korobo nɨrixhimia iku axɨmanu kichonimiakax ui Nobixhax.