Apocalipsis 14 - Manityanati Tupax

Masonikixh axɨna aɨbo

¹ Auki yasaratɨ, yasakatɨ ɨmo axɨmanu Nobixhax atɨrai onɨ axɨmanu yirityux Sión. Akamanu ichepe amonkoma ciento cuarenta y cuatro mil nububikixhimia axɨbama korobo ikutama nɨri axɨmanu Nobixhax nɨrixhtityo Yaɨtoti.

² Auki ñonkoi taman nikɨpurax kuatɨ auki napes. Takana nikɨpura nosɨkɨ yarusɨrɨx yotobɨratax, takanaintyo nikɨpura mapaesox. Tyoneantoe takana axtɨ masɨmununuma sɨrɨmana taboxioka.

³ Axɨmanuma ciento cuarenta y cuatro mil amonkoma atɨraimia esa axɨmanu nityɨmoxti Yɨriabux, esamaintyo axɨmanuma cuatro sɨborikoma axɨmanumaintyo veinticuatro mayɨriabuka, masonioma axɨmanu sonixh aɨbo rabotɨ. Champɨti iyebo uiti axɨmanu sonixh, kunauntañamantai axɨmanuma ciento cuarenta y cuatro mil ane maximiakatax ɨmoma axɨpekukimia axɨbama ikuki axɨna kɨx.

⁴ Chɨmanaunupɨma ɨmoma axɨbama chɨtɨpɨ matupaka taruku ñakokonaunkuxɨma ɨmoti Tupax. Namanaiña sɨromatɨ isiu axɨmanu Nobixhax axɨna kauta sɨrotɨ, ane tɨkañe maximiakatax ɨmoma nauki tyonema axɨbama kusɨrɨboma makumanatax ɨmoti Tupax ɨmointyo axɨmanu Nobixhax.

⁵ Tyopiki chɨmapañampɨma chisamutempɨmaintyo axɨna chuxiampɨ.

Axti Aɨtoxti ñoñɨnx chepe axɨmanuma ángeles

⁶ Auki yasakatɨ ɨmoti kiatax ángel basoroti auki petaisɨrɨ iku napes. Abe uiti omixhia manityakax axɨna chɨtakɨnunaumpɨ, nauki uraboiti sukarɨma namanaiña axɨbama aboma iku kɨx.

⁷ Nanti aɨbu nityosibixhti: “Apanau ɨmoti Tupax yarusɨrɨx nɨrixhti aboi, tyopiki tiñatai axɨmanu nanenes auche asaraiti nisɨboriki namanaiña. Apanau ɨmoti naki uiche aisamunenti kɨx chepe napes, narubaityu tux chepe nantaityuka.”

⁸ Axti kiatax ángel, nanti: “¡Tɨtaɨbɨko, tɨtaɨbɨko axɨmanu yarusɨrɨx Babilonia, axɨna manunekana ɨmo namanaiña axɨbama po'osoma iku axɨna kɨx aisamunema nomɨnantɨ nauki anaumaintyo ɨmo matupaka nisamuku mañoñɨnka!”

⁹ Auki axti kiatax ángel, nanti aɨbu nityosibixhti: “Axtɨ anati naki manaunuti ɨmo axɨmanu numukianx ɨmointyo nausɨpɨtux, axtɨ chebo uiti aɨro uixh nikorox ikutama okɨtɨpɨ ne'esti,

¹⁰ axti Tupax taruku ñana nityɨborixhti chiyaupɨ ñana nityakisɨrɨkɨxti uiti. Chɨmasamuñampɨ ñana nityakisɨrɨkɨxti, ta ui pes chepe azufre sukarɨma axɨbama ángeles axɨmanuintyo Nobixhax.

¹¹ Axɨmanu nausi pes uiche atakisɨrɨti ñana champɨ nityakɨru niyɨkɨx ape, tyopiki axɨbama manaunuma ɨmo axɨmanu numukianx ɨmointyo nausɨpɨtux, axtɨ anentyo nikoro nɨrixh kɨtɨpɨti, champɨ nityakɨru nityakisɨrɨkɨxti au sapes takanaintyo au tobixh.”

¹² Akamanu atusi narukux ɨmoma axɨbama ikokoromati Tupax, axɨbama ikokotama yakɨpukuxti ɨmotityo Jesús.

¹³ Auki ñonkoi taman tosibixh auki napes, nantɨ iñemo sane: “Aikonomo axɨna sane: ‘Aukina kaɨma chiyaupɨ nipukɨnunkuxɨma axɨbama koiñoma chepeti Yɨriabux Jesús.’ ” “Sane–nanti Espíritu Santo–, axtɨ tochenko nityakisɨrɨkɨxti, tyopiki axti Tupax ane toxiobo uiti ɨmoti ityobo nanaiña axɨna uxia isamutenti.”

Axɨmanu ñana tyakɨrux nanenes

¹⁴ Auki yasaratɨ, ɨmo taman kɨsaɨbox purusubi, onɨ axɨmanu kɨsaɨbox anankati tɨmonsoti axti naki takanati aɨtoxti ñoñɨnx. Ane ityati nityarusɨxti uxiante ui oro tapɨ mekuti ane taman kɨses otoro nuxia.

¹⁵ Auki kuatati kiatax ángel auki nipoxti Tupax, kɨpurabo nuxia nityosibixhti ɨmoti maniki tɨmonsoti onɨ kɨsaɨbox: “¡Akubai ui nakɨse, aityakɨmanaunku nakiyo. Tyopiki tiñatai axɨmanu nanenes, axɨmanu nakiyo ikuki axɨna kɨx tɨchauki!”

¹⁶ Axti maniki tɨmonsoti onɨ axɨmanu kɨsaɨbox sɨrotitɨ iku kɨx aɨbu nikɨsesti, auki ityakɨmanaunkutati niyakiyoxti ikuki kɨx.

¹⁷ Auki axti kiatax ángel kuatati auki nipoxti Tupax axɨna ane au napes, anentyo mekuti nikɨsesti otoro nuxia.

¹⁸ Onɨki axɨmanu altar kuati kiatax ángel, axti naki ane nɨriakaxti ɨmo pes, auki nanti ɨmoti maniki ángel ane otoro nikɨsesti: “¡Akosi aɨbu nakɨse otoro, aityɨsɨnasio uixh nɨta uva auki ñanaunx ikuki kɨx, tyopiki axɨmanio nɨtax chauki tupubu!”

¹⁹ Axti maniki ángel sɨrotitɨ aɨbu nikɨsesti iku kɨx auki botɨsɨro uiti nɨta uva auki axɨmanu ñanaunx ane iku kɨx, auki omeno uiti au axɨmanu sɨrɨmanax nausɨx kauta autaichome tyone axɨmanu machepekatax ɨmo nityɨborixhti Tupax.

²⁰ Axɨmanio uva mutaichomeno saimiantai pɨnanaki axɨmanio poka, auki axɨmanu nausɨx paikɨburu notox, iñatai napetaikixh chepe niyokiporo kabayuka, iñatai nosɨkɨx trescientos kilómetros narubaikixh.