Ufunulo 1 - Lagano Iphya

Ga mwanzo

¹ Mulungu wamungʼazira maneno Jeso Kʼirisito, kwa hata naye aangʼazire ahendikazie maneno garigo ni seti gahendeke sambi. Jeso Kʼirisito wamuhuma malaikawe kwa muhendikaziwe Johana, achendamungʼazira maneno gago.

² Johana naye waandika gosi gogaona. Maneno goonewa ni Johana ni neno ra Mulungu, na ujeri ongʼazwa ni Jeso Kʼirisito.

³ Ndo baha, mutʼu aasomeraye atʼu udzumbe uu urio u dzulu ya maneno gahendekago vivi, na gondakudzahendeka zo tsʼiku zidzazo. Na baha o atʼu ausirikisao na kuutuwa vivyo wambavyo, kwakukala, ukati u phephi na kufika, urio maneno gaga gosi gandalairira.

Johana unagaphirikira mwajo makanisa mafungahe

^4-5 Ni mimi Johana, ninamuphirikira mwajo mwimwi ajeso a makanisa mafungahe ga jimbo ra Asiya. Mulungu ariye vivi u moyo, yekala moyo hangu pʼindi na ariye undakala moyo hata zo tsʼiku zidzazo, roho afungahe ario mbere za chihi cha utawala cha Mulungu na Jeso Kʼirisito, naamuhatsʼe, na amuhende musagale na reri yao. Jeso ndiye mutʼu akuluphirikaye kwa kungʼaza maneno ga Mulungu, ndiye yeanza kufufulwa kulaa kuzimu, na ndiye mutawali wa afalume a dunia. Jeso Kʼirisito unahuhenza, na ndiye yehuusira madambi gehu kuchirira milatsoye yomwagika.

⁶ Ndo yiye wahuhenda hutawale phamwenga naye dza makuhani amuhikiraohikirao yiye Abaye Mulungu. Ndo nahumulikeni, na naakale na widimi hata kare na kare yiye Jeso! Amina.

⁷ Mwimwi manyani kukala, Jeso undakudza na maingu sambi, na undaonewa ni chila mutʼu hata aratʼu omuulaga kwa kumukotʼa misumari musalabani. Na atʼu a viryomo vyosi phapha duniani, andarira na kudzuta kwa gohenderwa yiye. Maneno gaga, bee gandahendeka jeri! Amina.

⁸ Bwana Mulungu unaamba, “Mimi ndimi wa mwanzo, na vitʼu vyosi vindakala na musindikizo hata nisale mimi. Mimi vivi ni moyo, na nákala ni moyo hangu pʼindi, na nindakala moyo hata zo tsʼiku zidzazo. Mimi ndimi Mwenyezi Mulungu.”

Johana unamona ononi Jeso Kʼirisito yefufuka

⁹ Ajeso asena, mimi Johana ni ndugu yenu wa chijeso. Na mimi dza mujeso, ninashononeswa dza vivyo mushononeswavyo mwimwi, ninatariza Ufalume wa Jeso udzao, dza vivyo mwimwi muutarizavyo, na Jeso unaniidimisa kuvumirira riki, dza vivyo amwidimisavyo mwimwi. Mimi náphirikwa chisiwa cha Pʼatimo kwakukala, nákala nidzisumurira neno ra Mulungu, na nákala nidzishuhudiya dzulu ya Jeso.

¹⁰ Jumapili mwenga, nákala nidziudzalwa ni Roho wa Mulungu, na chisha nichisikira sauti bomu dza ya gunda.

¹¹ Sauti yiyo yanamba vivi, “Andika chitabuni dzulu ya gaga ugaonago, na chitabu chicho uchiphirike kwa makanisa mafungahe garigo midzi ya Efeso, Simurina, Pʼarigamoni, Tiyatira, Saride, Filadelifiya na Laodikiya.”

¹² Phapho mimi nichigaluka kwa nimone yekala unagomba nami, na niriphogaluka, náona vidude vya dahabu vifungahe, vya kwikira mataa.

¹³ Na kati-kati ya vivyo vidude vya kwikira mataa, phákala phaimire yiye Mutʼu yelaa dzulu, na wakala uvala valo ire hata rifika nyayoni, na udzagala chibao cha dahabu phakwe chilagani.

¹⁴ Nyereze zakala ni nyeruphe tsetsetse dza pamba na barafu, na matsoge gákala ganabiririka dza moho.

¹⁵ Nyayoze zakala zinametameta dza chuma chodzitiywa mohoni na kubandwa, na lakare rakala rinavuma dza madzi manji gajerago maweni.

¹⁶ Mukonowe wa kulume wakala ugwiririra nyenyezi fungahe, na mwakwe mulomoni muchilaa upanga wa kurya muno. Usowe wakala unangʼala dza dzuwa richikala ni kali.

¹⁷ Niriphomona, nádzibitʼa mbereze na nichihurira hata nichikala dza kwamba nidzefa. Ela yiye achinikumba na mukonowe wa kulume na achiamba, “Utsʼogophe. Mimi ndimi wa mwanzo, na vitʼu vyosi vindakala na musindikizo hata nisale mimi.

¹⁸ Mimi ndimi mwenye uzima. Mimi nákala nidzefa, ela vivi ni moyo hata kare na kare! Vivi mimi nina widimi dzulu ya chifo, na dzulu ya kuzimu.

¹⁹ “Uwe vivi andika dzulu ya gaga ugaonago, gaga gahendekago vivi kare, na gondahendeka zo tsʼiku zidzazo.

²⁰ Utʼu urio kʼaumanywa, na unaimanishwa ni zizi nyenyezi fungahe uzonazo nidzizigwiririra mukono wangu wa kurya, na vivi vidude vifungahe vya dahabu vya kwikira mataa ni kwamba: Zizi nyenyezi fungahe zinaimirira malaika amanyirirao gago makanisa mafungahe, na vivyo vidude vifungahe vya kwikira mataa vinaimirira gago makanisa mafungahe genye.”