१ तीमोथी 1 - चेपाङतिमोथिकाय पावलको अभिबादन 1 इ चिथिखे ङा पावलको तर्फसय खेना। निको मुक्तिदाता परमेस्वर र निइ आसा गमो ख्रिस्त येसुइले ङाकाय ख्रिस्त येसुको खबरदुत स्याउसाको लागि आग्या जाह्ङ्सास्यावो खेना। 2 ङाइ इ चिथिखे बिस्वासहाङ ङाको लयको चोः लेखाले ताह्ङो तिमोथिको लागि लेखधय मुनाङ। परमेस्वर आपा र निको प्रभु येसु ख्रिस्तइ नाङकाय अनुग्रह, योःन्मय, र धोमायो बइतेपाना। पावलइ स्याताहा स्यानरायको बिरोतहाङ तिमोथिकाय स्यानो 3 ङा माकेदोनिया इलाकाताङ आल्तोक बेलाहाङ “नाङखे एफिसस सहरहाङले मुअ” त दाह्य्ति ङाइ नाङकाय बिन्ति जाह्ङ्नेआलाङ। ओहाङ केहि मान्तालमइ स्याताहा स्यानराय स्यानो काम जाह्ङो मुनय, र नाङइखे ओउमयकाय ओउत हाइलाम त दाह्य्ति आग्या जाह्ङ्सा परलेतेना। 4 नाङइ ओउमयकाय सत्य खेमालो स्याताहा विनरायलम ल्हाक्सा र पुर्खालमको गलमा द्युम्मालो बङ्सलमको बारेहाङ नोःसाकायमा रोकसा परलेतेना। धइतिदाह्य्सा ओउतताह्ङो कुराइ बिबाद मात्र स्याउना, र परमेस्वरहाङ बिस्वासिलो स्याउति याको मान्तालमकाय दोह सहयोगमा स्याउलेल। 5 ङाइ नाङकाय आग्या जाह्ङोको मुख्य उदेस्यखे ओउ मान्तालम लयमय बाद-बिबाद जाह्ङ्काइसा स्याउल, बरु यात-अर्काकाय राप्काइसा परना त तोओ खेना। अनि इ रापमयखे सुद्ध ल्हुङतुक, पेओ बिचार, र सत्य बिस्वाससय वाङो स्याउसा परना। 6 तर केहि मान्तालमखे इ जुदा कुराकाय फेआक्तिको बेर्थको कुराहाङ बिबाद जाह्ङ्ति समय खेरो वायो मुनय। 7 ओउमय परमेस्वरइ मोसा दुवारा बइसास्यावो नेम-कानुनको गुरु स्याउसा बोःङ्नानि, र जुदा कुरा लयमयइले चिःओलेखा हाइति चिःरेउ मःन्ति नोःनय, तर नि दोह कुराको बारेहाङ नोःधय मुनातहि त दाह्यो कुराले ओउमयइ चिःनिलि। 8 यदि मान्तालमइ इ नेम-कानुनकाय परमेस्वरको इच्छ्या अनुसार पेतोहाइति पालन जाह्ङ्नानि त खेया ओउखे पेओ कुराले खेना त दाह्य्ति निइ चिःनातह्य्नि। 9 निइ इमा चिःनातह्य्नि, नेम-कानुनखे पेतो काम जाह्ङो पेओ मान्तालमको लागि जाह्ङो खेलेल। तर इखे नेम-कानुन पालन जाह्ङ्मालो र आग्याकारि नाःमालोलम, परमेस्वरको भक्ति जाह्ङ्मालो र पाप काम जाह्ङोलम, दुस्त काम जाह्ङो र अधर्मिलम, लयको आपा-आमाकाय सातो र हत्यारालमको लागि जाह्ङो खेना। 10 ओउतले इखे बेभिचारि मान्तालम, र गोय्चो-गोय्चो अथबा मोम्चो-मोम्चोको माझहाङ बेभिचार जाह्ङोलम, नोकरको रुपहाङ विःन्साको लागि मान्ताकाय अपहरन जाह्ङोलम, स्याताहा नोःओ र स्याताहा गभाइ बयोलम, र परमेस्वरको सत्य स्यानरायको बिरोतहाङ अरु कुरालम जाह्ङो मान्तालमको लागिमा जाह्ङो खेना। 11 ओउ नेम-कानुनखे निको महान् परमेस्वरकसय वाङो महिमित पेओ खबर अनुसार पालन स्याउसापरना। अनि इ पेओ खबर मान्तालमकाय तोसाको लागि परमेस्वरइ ङाकाय छ्युह्ङ्सास्यावो मुना। परमेस्वरको योःन्मयको लागि पावलको धन्नेबाद 12 ङाकाय इ पेओ खबर प्रचार जाह्ङ्साको लागि जिःङ बइसास्यावो प्रभु येसु ख्रिस्तकाय ङा धन्नेबाद बइसा चाहनाङ। धइतिदाह्य्सा ख्रिस्त येसुइले ङाकाय बिस्वासिलो ताःति लयको सेवाको कामहाङ छ्युह्ङ्सास्यावा। 13 खेसापाय ङा ख्रिस्तको मय्ङको अपमान जाह्ङो, बिस्वासिलमकाय सतावत जाह्ङो, ङाःरेउ मान्ता खेङतो। तर ओउतताह्ङो कामलमखे ङाइ लयको अग्यानता र अबिस्वासहाङ जाह्ङोझ्यान्ते परमेस्वरइ ङाकाय योःन्सास्यावा। 14 अनि प्रभु येसु ख्रिस्तइ ङाकाय प्रसस्त मात्राहाङ अनुग्रह बइसास्यावा, र लयकहाङ मुओ बिस्वास र रापमयइ ङाकाय भरपुर जाह्ङ्सास्यावा। 15 निको ख्रिस्त येसु पापि मान्तालमकाय दल्ताक्साको लागि इ सङ्सारहाङ वाङ्सास्यावो खेना त दाह्यो कुराखे जुदाइले मानसा र बिस्वास जाह्ङ्सा परओ सत्य कुरा खेना। र पापि मान्तालम मध्येहाङ जुदासय पेमालो पापिखे ङाले खेनाङ। 16 तर ङा अरुलम भन्दा माहा पेमालो पापि खेयाकायमा परमेस्वरइ ङाकाय योःन्सास्यावा। ख्रिस्त येसुकहाङ जुदा पापि मान्तालमको लागि अजम्बरि धइरेता मुना, ओउतझ्यान्ते येसुइ ङाकाय लयको धइरेताको नमुना स्याउसाको लागि छ्युह्ङ्सास्यावो खेना। इखे अरु मान्तालमइमा येसुहाङ बिस्वास जाह्ङ्ति अजम्बरि रुवाङ दोःपनय त दाह्य्ति परमेस्वरइ जाह्ङ्सास्यावो खेना। 17 द्याह गलमा सिमालो र मिकइ च्यउसा खाइमालो यातज्यो मात्र खेओ अजम्बरि परमेस्वर राजाकाय जुदा मान-सम्मान र महिमा सधयको लागि स्याउति मुजेपा। आमेन। आराधनाको बारेहाङ अर्थि 18 तिमोथि, नाङ ङाको लयको चोः लेखाले खेतेना, ओउतझ्यान्ते केहि अगमबक्तालमइ नाङको बारेहाङ नोःओ अगमबानि अनुसार ङाइ नाङकाय इ आग्या बइनेनाङ। ओउ अगमबानिइ नाङकाय प्रभुको लागि युद्ध जाह्ङ्साको लागि साहस बइतेपाना। 19 लयको बिस्वासकाय ख्रिस्तहाङ गम्ति सुद्ध बिबेक अनुसार काम जाह्ङु। धइतिदाह्य्सा गच्युक मान्तालमइ लयको बिबेककाय इन्कार जाह्ङोझ्यान्ते ख्रिस्तहाङ लयको बिस्वासकाय दल्ताक्ति गम्सा खाइनिलि। 20 ओउमय मध्येहाङ हुमेनियस र अलेक्जेन्दर त तोओ मान्तानिसखे इ कुराको उधारन खेनाच। परमेस्वरको अपमान जाह्ङ्सास्याउल त दाह्यो कुरा ओउनिसइ चिःपाचु त दाह्य्ति ङाइ ओउनिसकाय अरु बिस्वासिलमकसय वेङाक्तिको सय्तानकहाङ सुम्पति बयालाङ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.