Устаз 1 - Делан Йозанаш

¹ Ярушалайм-гӀалин паччахь волчу а, Даудан кӀант волчу а устазо дина къамел иштта ду.

Адамийн дахар хаттарех дуьзна ду

² «Ма кӀорга къайле ю! – олу устазо, – Ма кӀорга къайле ю! Ма дукха хӀума ду вайн кхетам тӀе ца кхуьуш!

³ Стигална кӀел къахьоьгуш, ша мел динчу хӀуманах буьсун болу хӀун пайда оьцу адамо?

⁴ Адамийн тӀаьхье дӀа а йолу, керла тӀаьхье тӀе а кхуьу, ткъа латта абаденналц лаьтта.

⁵ Малх схьа а кхета, малх дӀа а бузу, иза юха а ша схьакхетачу метте баха сихло.

⁶ Мох къилбехьа а хьокху, къилбаседехьа юха а боьрзу. Иза, хьийзий, хьийзий, юха а шен метта схьабоьрзу.

⁷ Дерриге а хиш хӀорда чу хьовду, амма хӀорд цкъа а тӀех ца болу. Шаьш схьадевллачу метте юхадоьрзу и хиш.

⁸ Массо а гӀуллакх саццаза дӀаоьху, Дийца долчух дерриг а цхьаьнгга а дийца лур дац. Хьежарх бӀаьрг а бузур бац хьан, ладегӀарх – лерг а дузур дац.

⁹ Хьалха хилларг юха а хуьлу, ткъа хьалха диннарг юха а дийр ду, стигална кӀел керла хӀумма а дац.

¹⁰ Цхьаццаммо олу: „Хьажахьа, хӀара керла хӀума ду!“ Амма иза а хилла ширачу заманахь, вайн заманал дуккха а хьалха.

¹¹ Хьалха хилла адамаш цхьанна а хӀинца дага а ца догӀу, ткъа хӀинца дуьйна хиндолу адамаш дагадогӀур дац царна тӀаьхьа хир долчу адамашна а».

Устазана дахарехь зеделларг

¹² Устаз волчу аса Ярушалайм-гӀаларчу Исраилан халкъана тӀехь паччахьалла дора.

¹³ Сан даго къобалдира кху стигална бухахь адамаша кхочушдо гӀуллакхаш, хьекъалдолчара ма-дарра, кхоччуш таллар. Ма хала бу-кх Дала адамашна кхочушбан белла и болх!

¹⁴ Стигална кӀел деш долу дерриге а гӀуллакхаш а гира суна. Уьш дерриш а, махана Ӏуналла дан гӀертар санна, кхетам тӀе ца кхуьу хӀуманаш ду.

¹⁵ Сеттина йолу хӀума нис а лур яц, ткъа доцург дагар а лур дац.

¹⁶ Ас сайн дагахь элира: «Хьажал, сайл хьалха Ярушалаймана тӀехь олалла деш хиллачу массарал а чӀогӀа хьалаваьлла со хьекъалаллица. Дуккха а кхетамалла а, хьекъалалла а тӀекхетта суна».

¹⁷ Сан даго къобалдира хьекъал довзар а, иштта хьекъалх тилар а, сонталла хилар довзар а. ТӀаккха со кхийтира, иза а, махана Ӏуналла дан гӀертар санна, хӀума дуйла.

¹⁸ Доккхачу хьекъалаллах боккха бала хуьлу, ткъа шена кхетам гулбечо гӀайгӀа гулйо.