ÜGÜTÜ 1 - SAOPOBÜ LAI (BSI)

Jerusalembüeibü Maangmau Onat

¹ Ügütü, jih chenei mütei shenetnyu kibü sangnyu, kho laibü jembünyu ong setan ki! Phangshuong yoa sao yaangenan kibü kho ailaibü latnyu che la yeian ki! Sangnyu shuong yoa chobasao che kibü kho tou sambüyaübü che la yeiakei.

² Nangnak sao khaukei kauko haapda; saoeibü omlanga nyeksi kouda. Sao to sanoubü shuong yoa sao maangsulaje ao aki. Saoeibü thangbou shuong pendouei sao khüpettiko jungeida; haoen saoeibü dangbou shuong yeia.

³ Khonkutibü haangjung hoba aaola leko kümtileitibü haangjung, Jihudabü laplanga. Sao songalebü shuong yoa kida, hoba saoei hakso ühüpda; sao shieikoebü pendouei sao kailepan sao satla amaiko kipan kibü thua laphetakei.

⁴ Zion lamnyu shuongei mang haapda; aieilausi saopobü lem to aokei alouda. Saoeibü bakhün litham apa, saoeibü ungshedbou shuongei ngühyoda, saoeibü medei shuong khonkuda, hoba saokei khonsakko kia.

⁵ Saoeibü yenbou shuong thükkabou la yeia, saoeibü dangbou shuong naangmaida. Aishanga saoei ngühkhüm juong leilubü shanga, Bunyubouei sao khonkutikei. Saoeibü shousi shuong yenbou shuong jungto thüngshang to haua.

⁶ Hobaje Zion Nouyangshou ka, sao hemaisaomai pendou banga. Saoeibü chobaeibü shousi shuong lamshaushang ühüpbü meishi tegü yeia; hoba meishibü thedanga sateibü tegü haoen semthetnyu apa.

⁷ Sao khonkubü hoba maangshatbü chaloua shangieda sao shangabü namsek peisilei pendou Jerusalemei damenda; hoba ladang saoeibü mütli shuong yenboueibü ik to atkei, kheijinei aoeikei sao to athui. Kheijinei yenbou shuong hapbei, hoba haoenei sao tuongbü to nyikukei.

⁸ Jerusalemei shed yaang shonkei, hibü sao shabü peisilei tegü yeikei; sao hangenbü shuong pendouei sao aweasüngda. Aieilausi haoenei sao mütkongbü thu hapbei; haü, sao sao lolo ngühda, hoba saoeibü thenyek phai yeida.

⁹ Sao asaopobü kho saoeibü ikseta kikei; saoei saoeibü loulabü thu daman achüh. Hibü sao maangkeipangko atetkei, sao maangsulabü aki. O Bunyubou, ngeibü khonsak to chühshi, aishanga dangbouei lulu lolo thük lea.

¹⁰ Namsek peisilei pendou thüka yenbouei ik tuoka; Aishanga songalebü shuong saoposhang to atbü saoei hapbei. Aoyou shanga nyi kaibü kamshang to haoen alotla ngühkhüm kuan kikei.

¹¹ Saoeibü mütli pendou ngühda, haoen lang kila shanga haoen shausiyung lamla hauda; “Chühashi, O Bunyubou, hoba chühshima, aishanga ngo aweasüngko apa.”

¹² Nyangko nongeibü kan pendou, kan theaje ho ai aying lo? “Chühashi, hao khauang lotbü chaloua Bunyubouei ngo khonkutibü, kü to sühbü ngeibü maangshat tegü, maangshat at ongkei kiasi aki chühan chühashi.

¹³ “Müh ka haoei ngeibü lomaang to wan jinkukei, hobaje khoei haoen thükda. Haoei ngeibü you shanga tin sankukei, haoei ngo sepeinyu ngaitikei; haoei ngo chaseko sangliphanga semthetnyu apyokei.

¹⁴ “Ngeibü ngühkhüm lulimbü shabü buleng pendou, haoeibü ikei khühyoakei. Khübü kho ngeibü ngüma yakkuakei; haoei ngo hau akiko aptikei. Bunyubouei ngo dangbou shuong la kuan apbei, hoba haoen khulimbo ngo aloenda.

¹⁵ “Ngeibü hau kibü müt pendou kü thea kongkong yeitikei; ngeibü heshou shuong janyinla shanga ngo khulimbo haoei tan huishaikei. Jihudabü Saosüngbü Nouyangshou kho amshanga semlüh tegü Bunyubouei nakeia.

¹⁶ “Khübü shanga ngo haapda; ngeibü nyek ka nyeksi kouda. Aieilausi ngeibü soushou haan khangetko solotibü kho kü ka lounyu bangan kia; ngeibü shousi shuong litham kia aieilausi dangbouei thüka.

¹⁷ “Zionei saoeibü ik shinga, sao solotila ao aki; Jakob shanga khei hao kaijembo kibü shuong kho hao khulimbo ong yeilabü dogo Bunyubouei ngühkhüm kua. Hobaje haoen yoa Jerusalem asaopobü peisilei che tegütham ki.

¹⁸ “Bunyubou ngühmaia kia, aishanga ngei haoeibü ngühkhüm khulimbo kümbei; ditshima, kan mütli pendou hoba ngeibü maangshat chühshi; ngeibü medei shuong hoba ngeibü heshou shuong laplanga.

¹⁹ “Ngei kü to sanoubü shuong ngakei, lausikei haoenei ngo khüpettikei. Ngei ungshedbou shuong hoba ngeibü jaishou shuong soushou haksola shausiyung lamjinei sangnyua haoen maukei.

²⁰ “Chühashi, O Bunyubou, aishanga ngo khonkua kia; ngeibü soushou lemenda, ngeibü soushou panglangda; aishanga ngei aeibou lulima; khonga in lepda chemaje haibü tegü kia.

²¹ “Haoenei ngo ngühko wibü ditkei, ngo haksotilabüje ao aki. Ngeibü dangbou pendouei ngeibü khonku khonsak ditkei; nyi ho kümbüa haoen olinda. Nyi huiletbü chalou kho nyi loutilabü, hoba haoen no phatko kilabü.

²² “Haoen amaibü pendou ka jungto loutishi, hoba ngei ngühkhüm lulimbü shanga kü to kümbü tegü, haoen to kümshima aishanga ngeibü shedti mashikbü juong hoba ngeibü maangshema.”