RUT 1 - SAOPOBÜ LAI (BSI)

Elimelek hoba Haoeibü Chemdang Moab to Kukbü

¹ Matjembü shuongei songdakbü haanga kaonyeka mühsinou che longkei, hoba Jihuda kaodak Bethlehembü müt che, haoeibü yak hoba haoeibü shousi müt nyi Moab kaodaka kila haukei.

² Hobaje müt khoeibü nyen Elimelek, yakeibü nyen Naomi, hoba haoeibü shousi müt nyieibü nyen Malon hoba Chilon kikei, haoen Jihuda kaodak Bethle- hema kibü Efratbü, hoba haoen Moab kaodak to louan khünei kikei.

³ Hobaje yak si haoeibü shou nyi apyoan Naomieibü lao Elimelek haian apbei.

⁴ Hobaje haoenei haoeneibü yak shanga Moab sao lekei, cheeibü nyen Orpa hoba lubü cheeibü nyen Rut, hoba haoen khünei po an thüng kikei.

⁵ Hobaje Malon si Chilon haosi ham haikei, hoba yaksanyu kho saoeibü shounyi hoba laoei apyokei.

Naomi si Rut Bethlehem to Ngaibü

⁶ Kheijinei Moab kaodak ka ngaila saoei saoeibü shounyieibü yaknyi yoa meimeikei, aishanga Bunyubouei jembü mütli pengaiko haoen la shausiyung kubü saoei Moab kaodaka ditkei.

⁷ Hobaje saoei shounyieibü yaknyi yoa saoei jembü kishang ka meimeikei hoba Jihuda kaodak to ngaila haoen lam to haukei.

⁸ Hobaje Naomiei shounyieibü yaknyi to laukei, “Hauashi hoba kasi ham lulueibü nyu chem to ngaiashi, hoba kanei haibü to hoba kü to onouko jungeibü tegü Bunyubouei kan to onouko jungeishima;

⁹ kasi ham lulu lao chema hakso hapenlabü lele Bunyubouei kasi haükushi.” Hibü kho phaia saoei haoen to sembung shepbei, hoba haoen ngüh longko haapbei.

¹⁰ Hobaje haoenei sao to laukei, “Kün kaibü mütli jungto ka yoa sepeijung ngailabü.”

¹¹ Hobaje Naomiei laukei, “Kü shounyi, ngaiashi, aila kan kü yoa haula? Kaneibü lao la lelabü lele ngeibü nyusema shousi kia si?

¹² Ngaia, küshounyi, kaneibü lam to hauashi, aishanga ngei lao che lela yongko nou lea. Ngei damlabü kia dogo ngei laualonga, ngei tao lao che hapan shousi bukla maanglem kia dogo ngei lausi;

¹³ kanei haoen aching shongko haiyenlep lo? Hibü kan lao lamla ohauko kilep lo? Aying, küshou nyi, ho shanga ngo ong aei maangto shatkuda, aishanga Bunyuboueibü ik ngo khulimbo tuoka.”

¹⁴ Hobaje haoen nyibou ngüh longko haapbei, hoba Orpaei nyumaonyu to sembung shepbei, lausikei Rutje sao to souyonyu khüpbei.

¹⁵ Hobaje saoei laukei, “Chühashi, kanaje jembü mütli hoba jembü mühghaü jungto sepeijung ngaida, nokei kana phai ngaiashi.”

¹⁶ Lausikei Rutei laukei, “No apyola hoba ka phai asemla kü to tethungtejangei; aieilausi no lato haulaje ngokei khünei kilabü; kaibü mütli ngeibü mütli yeilabü, hoba kaibü Mühghaü kho ngeibü Mühghaü kilabü.

¹⁷ No lan hailaje ngo khünei hailabü, hoba khünei ngo khünlabü. Bunyubouei kü to khei kümshi hoba haibüei seti lintisikei kho tegü aei kümshi.”

¹⁸ Ladang Naomiei Rut kaangkhühtham sao yoa haula maangangenbü chühenkei, saoei sao to joyobü nangkei.

¹⁹ Kho tegü Bethlehem to alou shongko haosi ham haukei. Hobaje ladang haosi Bethlehem to loukei, sangbü pendou yoshaikei hoba yaksa shuongei laukei, “Ho Naomi si?”

²⁰ Hobaje saoei haoen to laukei, “Kü to Naomi dogo angako Mara dogo ngaashi; aishanga Thükenbouei kü to aeibou khauko jungeia.

²¹ Ngo shenan haukei, lausikei Bunyubouei ngo nyibou chem to ikkong leian loukei, Bunyubouei pühthea ngo khulimbo kümbü hoba Thükenbouei ngo shieikoebü hapan aila kanei kü to Naomi dogo ngada?”

²² Kho tegü Naomi hoba saoeibü shoueibü yak Moab sao Rut, ao Moab kaodak ka sepeikei, sao yoa ngaikei hoba haoenei barli youshou latla khangjinei Bethlehem to loukei.