OBADIA 1 - SAOPOBÜ LAI (BSI)

¹ Obadiaeibü mangsang Bunyubou Mühghaüei Edom shanga hai lauda. “Bunyubou ka künei ngühlang dida,” dogo lauko phangshuong yoa chobaeibü hangangbü hautiakei: “Kan meimeiashi, hoba sao khulimbo lasona loakho!”

Bunyubou ei Edom Shieinangeilabü

² Chühashi, ngei ao phangshuong yoa hanbüla yeitia no aeibou aweasünglabü.

³ Kaibü maangpon yonglam lilibüei no khüpettian, O no laanglipa kia, kui suokbüa kida, khei jembü maangpona “Aoei ngo kao to yantila” dogo lauda.

⁴ No aulu tegü kuito seengjung angasikei, hoba kaibü hap khanshoulitshou yoa kümasikei, ngei khüka no sungyanlabü, dogo Bunyubouei lauda.

⁵ Ka jungto kokbü loualonga; nangnak soshausoyungbü loualonga no latetche aleilukula! Haoen asou shongko haoenei akoklep lo? Semlüh hek thanshaibü at ka jungto loualonga haoenei semlüh hek at üpyokulep lo?

⁶ Esau shanga lai lamenkei haoeneibü huphang nyaksinam lai lapenkei.

⁷ Haoenei no leilang sühko shian apbei, kayoa sangmaia kibü mütei no khüpettikei, hoba ka thüka thük hapbei, kaibü jem sebü shuongei ka phanga sung sanan phokukei, kho shanga aikei ditenbü aki.

⁸ “Kho chaloua ngei Edom ka songsido kibü mütshuong hoba Esau shongh ka ditenbü amautikulep lo? dogo Bunyubouei lauda.

⁹ Hobaje, O Teman, kaneibü lakjaibü shuong moklabü, khei mütpem weko Esau shongh ka haitibüei kulo kuan mautiphang.

Edom shanga Shieinangeibü Aukabü shuong

¹⁰ “Kana Jakob to ikshatbü shanga himouei no küpleplabü, hoba no ponpen shanga wapan aplabü.

¹¹ Küksithang shuongei haoeibü peisilei laangbü hoba haoeibü bakhün to adan, Jerusalem thüka phaang pakjinei no heebüa limchühko lobü chaloua khei no haoen yoa che kikei.

¹² Kana khonku thushed chaloua nyi olinko techüh hoba Jihudabü shousi shuong thüka haoen maubü chaloua teolinyo ayingsi maangshat chaloua yonglambo telau.

¹³ Kü mütlieibü bakhün to haoen thushed chaloua tüet; haü, haoen thushet chaloua haoeneibü khonku thüka olinko techüh, ayingsi haoen thushed chaloua kanei haoeneibü peitoleito ik tüet.

¹⁴ Satyobü shuong wapetla no lambheka telo; maangshat chaloua jouan kibü shuong kho khümbo teku.

Mühghaü Phangshuong Matjemlabü

¹⁵ “Aishanga phang pendou thüka Bunyuboueibü chalou kia, nyi kümbü tegü ka to kümlabü, nyi jungeibü kakhu thük to longeilabü.

¹⁶ Aishanga ngeibü saopobü shongha kanei yungbü tegü khünei phang pendouei athakko yunglabü, haü, haoenei yunglabü hoba ngoualoua laulabü hoba haoen akibü tegü ong yeilabü.

Israelei Thük Hapbü

¹⁷ “Lausikei Zion shongha satbü maubü shuong kilabü hoba kho saopobü kilabü, hoba Jakob chemdangei phet phanlabü.

¹⁸ Hobaje Jakob chemdang wan la yeilabü, hoba Josef chemdang wanlong la yeilabü, hoba Esau chemdang youkung tegü yeilabü hoba haoen khübü kho jiklabü hoba haoen suilabü, hoba Esau chemdang che ongkei ajoulabü, aishanga Bunyubouei kho laua.

¹⁹ Hobaje yungküka kibüei Esaueibü shongh hoba yomanga kibü shuongei Filistiabü kao kimlabü hoba haoenei Efraim si Samariabü kao lelabü, hoba Benjaminei Gilead lelabü.

²⁰ Hobaje Israel shousi langsenbü shuong ho tan laobou kabü yoa ki, khei Zarefat sühko lelabü, hoba Jerusalembü langsenbü, Safarada kibü shuong yungthang sangnyu shuong lelabü.

²¹ Hobaje Esaueibü shongh thüka songdakla Zion shongh to khümenbü shuong ngalabü, hoba sangle kho Bunyuboueibü kilabü.”