NAHUM 1 - SAOPOBÜ LAI (BSI)

¹ Ninevi shangabü mangsang. Ho Elkosh kabü Nahumei hapbü mangsang le.

Ninevi Khulimbo Bunyubou Khauang

² Bunyubou kho nyekto shatbü hoba phoklambü Mühghaü, Bunyubouei phoklamda hoba khauang maangpokei shenbüa kia; Bunyubouei haoeibü dangbou shuong to phoklamda, hoba haoeibü labou shuong shanga haoei khauang maangpok phoda.

³ Bunyubou khauangla apantei, hoba hau yaangbü hoba Bunyubouei shedbü shuong kho ai jihdangakei ashiakoeko adantilabü. Mühghaü yeia hoba yeinaka Bunyuboueibü lamnyu kia hoba sangmei shuong kho haoeibü youeibü thamngu ki.

⁴ Haoei yungnyu to hakda hoba kho haptida! Hobaje shumang pendou haoei haptida. Bashan si Garmel yuida hoba Lebanon chipen eletda.

⁵ Hao thedanga shongh shuongei nyaakeida, hoba shonghshou tühnyinda hao thedanga kaodak lühda; kaodak hoba khünei kibü pendou.

⁶ Hao khau lotbü thedanga aoei loenla? hoba hao khau kaang lotjinei aoei natenla? Haoeibü khauang wan tegü hakletda, hoba laang shuong haoei setnyinda.

⁷ Bunyubou kho maibü ki, khonsak khonku jiha hau kibü lapheishon che hoba aoyouei hao to maanglem phoda haoei ngeda.

⁸ Lausikei sopbo koubü yungsenei hao khulimbü shuong langhlangko thonan aptilabü, hoba nakthühbü hauei haoeibü labou shuong shieilabü.

⁹ Bunyubou khulimbo kanei ai huon takda, haoei langhlangko thontilabü, haoei dangbou shuong to nyinei sühko phok alamlabü.

¹⁰ Jakba tegü kaoen kiasikei youkung linbü tegü haoen lemailela leilulabü.

¹¹ Bunyubou khulimbo huon takbü kümsilei amaibü che kan yoka longa aying lo?

¹² Bunyubouei hai lauda, Hao hauki yaangkibü hoba juong yingasikei haoen wapan aplabü, hoba danjung haulabü. Ngei no khonkutiasikei ngei touje no khon akutilabü.

¹³ Hobaje tou ngei ka ka buleng leilutikulabü, hoba kaibü khühbü thettikulabü.

¹⁴ Bunyubouei ka shanga sakkubü kua, “Touje kaibü nyen nyenlanglabü lele shisishousi alongtilabü, kaibü mühghaü shuong chem ka noksa hoba tühnyinbüei kümbü heangsho ngei wapan apbulabü, ngei kaibü he yaülabü, aishanga no amaibü ki.”

¹⁵ Aoei shongha ngühlang maibü sungbada hoba sangmai ngekletkuda, haoeibü you khüto chühashi! Kaibü lemsilang liashi, O Jihuda, kaibü theletbü kümashi; aishanga no khulimbo amaibü adamlabü haoei lepde wapan apa!