MIKA 1 - SAOPOBÜ LAI (BSI)

¹ Bunyuboueibü ngüh laobou Moreshetbü Mika jungto Jotham, Ahaz hoba Hezekia, Jihudabü Choba shuong haanga loukei kho Samaria si Jerusalem shanga haoei hapbei.

Samaria si Jerusalem shanga Mang haapbü

² Ditashi, O phangshuong, kan pendouei maangsangashi, O kaodak, hoba khünei kibü pendou, hoba Bunyubou hao jembü sao- pobü lembüchem ka kakhu limbo Bunyubou Mühghaü aukabü yingtishi.

³ Aishanga chühashi, Bunyubou haoeibü kishang ka longda, hoba hao louyenlabü hoba kaodak linbü jiphei to nakeilabü.

⁴ Hobaje hao phanga shongh shuong tühnyinlabü hoba wan thedanga naolep tegü laanglak ka dei langjung koubü tegü, pholi shuong kho janyinlabü.

⁵ Ho pendou Jakob ngühkhüm leilubü hoba Israel chemdang shabü haangjung ki. Jakobei ngühkhüm leilubü ai ki? Kho Samaria aying lo? Jihudabüeibü shabü ai? Kho Jerusalem aying lo?

⁶ Hibü ngei Samaria khongthua onshaibü ontou che semlüh bamang keshang ongshang yeitilabü, hoba saoeibü laangshang ngei yomang to khüpan koutilabü hoba khoeibü chemshang lamenlabü.

⁷ Hobaje saoeibü noksa kümbü pendou netla yeiko ngümnyinkulabü hoba saoeibü lamshaibü pendou wanei lonan aplabü, hoba saoeibü heangsho pendou ngei litham phokulabü aishanga pejapelabü shuongei lamshaibü ka saoei khübü kho yoshaikei hoba pejapelako lamshaibü jungto khübü kho sepeilabü.

⁸ Kho shanga ngo mang haaplabü hoba wilabü, ngo youkong hoba mütkong haulabü, selong tegü ngo wilabü, hoba ostrik au tegü mang haaplabü.

⁹ Aishanga saoeibü mou maila athük, aishanga kho Jihuda tokei loua, khoei kü mütli bakhün, khei Jerusalem sühlanga.

Dangbou Labou shuong Jerusalem to Loubü

¹⁰ Gada kho telen, hansho ongkei tühaap, Beth Leafraa kan lolo thamngua lekeiashi.

¹¹ O Shafirbü, kan mütkong hoba himoua danjung hauashi. Zanaubü, kan telong, Beth-Ezel haapbüei ka ka kishang sungngailabü.

¹² Aishanga Marotbü maibü shanga maangdakko haiyeida, aieilausi Jerusalem bakhün sühko Bunyubou ka amaibü louyenakei.

¹³ O Lakhishbü, koli you sobü la kailong phenkuashi. Zion nou- yangshou shuong shanga shabü khangshang kho kan kikei, aishanga Israel ngühkhüm leilubü kan to hapbei.

¹⁴ Hibü bangbü jongsak Moreshet Gat la nyi kulabü. Israelbü Choba shuong shanga Akzib chemdang kho khüpetbü ki.

¹⁵ O Mareshabü, kan thükto lason thükbü che ngei leian loulabü, Israelbü soneikangbü Adulam sühko kei loulabü.

¹⁶ No lolo khüngkheashi hoba kaibü khu shuan apashi, nyi maangshikbü shousinasi shanga hogon phatko no lolo khüng kheashi, aieilausi haoen ka jungka langsenbü to haulabü.