JOEL 1 - SAOPOBÜ LAI (BSI)

¹ Pethueleibü shou Joel jungto loubü Bunyuboueibü ngüh.

Youlang Leilubü shanga Manghaapbü

² Kan jaishou shuong ho ditashi, hoba Jihuda kaonyeka kibü pendouei nou haangashi. Kan haanga ayingsi kaneibü pisibou haanga ho tegü haüthüklao ma?

³ Ho shanga kaneibü shousi shuong to lenshi; hoba kaneibü shousi shuongei shousi shuong la lenngaishi, hoba haoeneibü shousi shuongei loulabü meten la lentishi.

⁴ Shoongbü koksüngei shauan joubü koksüng hanbüei shaukei; koksüng hanbüei shauan joubü toman shatko paibü koksüngei shaukei; toman shatko paibü koksüngei shauan joubü souyobü koksüngei shaukei.

⁵ Kan ihei jaakbü shuong piashi hoba haapashi; ih shuong shanga kan ihyungbü pendou ngekashi, aieilausi kho ka sembung ka apbua.

⁶ Aishanga ngeibü kaonyek khulimbo hau kibü hoba aweenbü phang che longakei; haoeibü molosaonyueibü hauh ki, molosaonyu yaangbüeibü hauhmai hao to ki.

⁷ Haoei ngeibü semlüh leilukua, hoba ngeibü bhuklong leilutikua, haoei khoeibü khop lemailela khokan apa, hoba kho tekan apbei, haoeibü bhek shuong thupaitham apa.

⁸ Medeiei senou neiei shembe kaian sao medei jih danga hao shanga haapbü tegü mang haapshi.

⁹ Bunyuboueibü chem ka shausiyung lembü hoba yunglabü lembü tekan apa; Bunyubou khangenbü ungshedbou shuong mang haapda.

¹⁰ Sek apa, kaoei mang haapda; aishanga youshou leilua, ih ulangtham apa, hoba onang hapjung ngaida.

¹¹ Whet si barli youshou shanga sekmoubü shuongei maang ngangashi; semlüh sek moubü shuongei ngekashi, aishanga youlatbü maua.

¹² Semlüh long yuida, bhuklong linakei; chilang long, hekyang long hoba shongbe long khei seka bulong pendou yuia; aishanga müteibü shousi shuong ka olinbü sada.

¹³ Kan ungshedbou shuong kanei senou nei neiashi hoba mang haapashi; kan lemshanga khangenbü shuong, ngekashi kaiya; kan ngeibü Mühghaü khangenbü shuong, langyang sünga senou nei neian yepshi, aishanga shausiyung lembü hoba yunglabü lembü kaneibü Mühghaü chem ka seneda.

¹⁴ Saüenan mühei nyengshi, saopobü kambü che ngashaiashi, jaishou shuong hoba kaonyeka kibü pendou Bunyubou kaneibü Mühghaü chema kamshaiashi hoba Bunyubou to ngekashi.

¹⁵ Maangto shatlabü chalou, aishanga Bunyuboueibü chalou nyangko kia, hoba pendou Thükenbou ka maulabü tegü kho loulabü hang.

¹⁶ Sen thedang ka shausiyung, haü, Bunyuboueibü chem ka olinlabü hoba olinbü bangda aying lo?

¹⁷ Youli shuong kho kaolin maanga linan apda. Youshou thanshang litham apyoakei, bung shuong leilua, aishanga youshou ayem.

¹⁸ Haoenei lamshaushang akisije meisiau shuongei lai lemenyoda hoba masu shuong mangda haü, sanlon shuong litham apakei.

¹⁹ Bunyubou, ngei ka to ngekda, aishanga wanei yam lamshaushang suia, hoba wanlongei sek kabü bulong pendou laaka.

²⁰ Haü, yamkabü meisiau shuongei ka shanga aeibou maang laakko deilada; aishanga shumang shuong ulangtham apa.