JAKOB 1 - SAOPOBÜ LAI (BSI)

¹ Ho le Mühghaü hoba Bunyubou Jisu Khrista sambü Jakob ka. Kaodak khümboa aan kibü phang anthüknyi jungto salem.

Mailem hoba Songsihon

² Ngeibü jaisinasi shuong, ladang ong kanei takteibü juong hapda, kan aeibou olinyojan,

³ aishanga kaneibü mailem takteienbüei natenbü hapda.

⁴ Lausikei kanei aineikei akongko penbüsoubü hoba soubüaubü yeila shanga thonbüa sühko natenjan.

⁵ Kan at songsihonei shaleko kisije haoei Mühghaü ka hiashi hoba ho hao la kulabü; aishanga Mühghaüei pendou la maangnyu angko hoba atoknokko kuda.

⁶ Lausikei haoei mailema hijan hoba sukbütembü akijan; aishanga sukbütembü müt khoje yeiei soungaitibü yungnyu deishou phatkei.

⁷ Kheibü mütei Bunyubou ka aikei hapla achüheijan.

⁸ Hao kho nyi-bhekbü maangpon yembü müt hoba haoeibü thechüh pendoua tak ashat.

Shalejongle hobaKeisiyaang

⁹ Jaisina che Mühghaüei shalebü thük to tonena longaje hao kho shanga the lenenjan.

¹⁰ Mühghaüei keibü jaisina che phangto tonleda longaje haokei kho shanga the lenenjan. Keibou kho sangchipen tegü eletlabü.

¹¹ Aishanga chanyu aeibou juokko hauda, hoei sang yuitida, hoba chipen elettida; haoen haangmaibü kho khoyam mauda. Kho tegü keijeibü jembü kümsilei kümnguia mauan aplabü.

Takteibü

¹² Aoei takteibü natenda hao haübou, aishanga ladang haoei takteibü kho thükenlaje, langkei khun, laobou Bunyubou to sanoubü shuong la kula thekukei, kho haoei haplabü.

¹³ Ladang at takteilaje, “Mühghaüei ngo takteida,” dogo alaujan. Mühghaü kho amaibüei takteila athükkei, hoba haoeikei ao atakteida.

¹⁴ Mütpem weko kho jembü amaibü dühbüei takteida; hoei hao senlangda hoba sulangda.

¹⁵ Kheijinei haoeibü maangdüh shia künda, hoba shabü bukda; hoba ladang shabü kho chinglaje hoei haibü longtida.

¹⁶ Ngei sanoubü jaisinasi shuong, kan tehuonetti.

¹⁷ Mühghaüeibü jongsak pendou maibü ki, hoba khübü penbüsoubü ngesakbü kümbou Bou Mühghaü ka louda. Hao ladangkei ajeileida; ayingsi sen jungka asepeida hoba haoei sen ladangkei nakthüh yeme phanga üpyoda.

¹⁸ Haoei sen ngühmai tang khittiko bukkukei. Haoei sen haoei kümbü yoa shaangbou-buhek phangche yeitimang sühkei.

Ditbü si Kümbü

¹⁹ Sanoubü jaisinasi shuong, khübü pendou kanei ngeakei. Lausikei mütpem weko ditla panteibü yingshi, laula maang- yangsho yingshi, hoba khauangla maangyangsho yingshi;

²⁰ aishanga müt maangpokbüei Mühghaü saopobü akümenda.

²¹ Hibü ihinseibü pendou hoba sopbojaiko kibü amaibü apan, kaneibü maangpona yemtian kibü Mühghaü ngüh kho eaaoa sungletashi, aishanga hoei kan khümenlabü.

²² Kan jembü lolo khüpettiko ditbou ong ayeiko kümbou yeiashi.

²³ Aoei dit ong ditan kümbou la ayeida hao kho mangchüha jembü lolo chühngaibü müt che phatkei.

²⁴ Haoei hao to chühan satda hoba longche danga hao ailaibü phatkeije maan apda.

²⁵ Lausikei ao mütei, sen do ngetibou penbüsoubü ngühkhüm to chühda, hoba haoei ditbü kho ladangkei amaako kümboleiko hauda, kho müt haoei kümbüleibü pendoua haülabü.

²⁶ Müt cheei hao songlea kaangbou dogo dambo kila thükkei, lausikei haoei haoeibü lishang thepetla athüklonga haoei jembü lolo khüpettida hoba haoeibü songle khün mu aki.

²⁷ Shoujitshou hoba latnyu shuong, haoen khonsak khonku to chühbü, hoba kaodaka jembü lolo nali atheko phobü, ho seneibü Bou Mühghaü thedanga dangshatbü hoba hinseibü songle ki.