IBRI 1 - SAOPOBÜ LAI (BSI)

Hao Shou Danko Mühghaü Ngüh

¹ Shangied Mühghaüei seneibü pisibousi shuong to thuseibü shuong danko hoba hangsilam juonga joyokei.

² Tou ho meten thonbüa haoei sen to Shou cheei joyoa. Hao danko Mühghaüei kaodak kümbei, hoba haoei hao kho kaodak khümbo phetphanla pienkei.

³ Haoei Mühghaü soneikangbü hautida, haoei sen la Mühghaü noksa tükdebü lenda, hoba haoeibü sei ngühei mühnyu kaonyu khümbo thounouda. Ladang haoei müt shabü ka sakentilabü lele thükenkei, hao khuthüka pendou thükenbou Mühghaü mae aenei setkei.

Khuthük Hangangbü shuong to Yaangbou Shou

⁴ Hobaje lai haoeneibü nyen hanbou ki kho tegü khübü hangangbü shuong to yaangbou yeiko haoei Shou nyen sungletkei.

⁵ Mühghaüei aijih dangakei khuthük hangangbü che to ongkei, “No Kü shou; tat ngo Ka bou la yeia,” ayingsi “Ngo hao bou yinglabü, hoba hao Kü shou yinglabü” dogo alaukei.

⁶ Mühghaüei kaodak to hao Shou shaangbou shou hautila kijinei haoei hai laukei, “Mühghaüeibü khuthük hangangbü shuong pendouei hao lemashi.”

⁷ Hobaje khuthük hangangbü shanga laujinei haoei hai laukei, “Haoei haoeibü khuthük hangangbü shuong yei la hoba hao khangenbü shuong wanlüh la yeitida.”

⁸ Lausikei hao shangabü laujinei haoei hai laukei, “O Mühghaü, kaibü Choba setshang ponpen thon akiko kilabü. Kaibü lanenbü sangle ngühmaia loda.

⁹ Nyi saopobü sanouda hoba shabü mangsenda. Khoei ong Mühghaü, ka Mühghaüei ka thangbou shuong aying, lausikei no ngakei, hoba ka la naangenko pienbü Choba olinbü kukei.”

¹⁰ Tokei haoei lauda, “O Bunyubou, büngla khangla nyi kaodak chemshang yaükei. Ka ikei nyi mühshuong kümbei.

¹¹ Haoen pendou maulabü lausikei no joulabü; nei tegü haoen pendou hanglabü.

¹² Mangsho tegü nyi haoen tungaian pholabü; neisimei tegü haoen jeileilabü. Lausikei no jetei kida, no ladangkei ühaida.”

¹³ Mühghaüei ladangkei khuthük hangangbü che to ongkei, “Ngei kaibü dangbou shuong ka you phanga younakshang la akümbu shongko no kü maenei setashi,” dogo alaukei.

¹⁴ Kholongaje khuthük hangangbü shuong pendou kho, khümenbü to lotlabü shuong to thuila hautibü Mühghaü khangenbü soushou shuong ong ki aying lo?