ESTHER 1 - SAOPOBÜ LAI (BSI)

Vasti Chobasaoei Ahasueras Choba Himou Bautibü

¹ Tou Ahasueras haangbü chaloua Ahasuerasei India ka Ethiopia sühko provins saongaoto saoto nyeta songdakkei.

² Khübü chaloua Ahasuerasei Persia sangle Shushan sangnyua haoeibü Choba setshanga setan songdakkei.

³ Haoei songdakbü po semboubüa haoei haoeibü khangenbü hoba leiyeibü pendou shanga lem che kümbei; Persia hoba Mediabü sepai tan leiyeibü shuong hoba provinsa yaangenbü hoba kongnyu shuong hao junga kikei.

⁴ Kheijinei haoei Choba sangle soneikangbü nyaksinam hoba hao yaangenbü soumo yaangbü hangenbü lenbüa khei chalou saongaoto saolei kikei.

⁵ Hobaje ladang khübü chalou penkei, Chobaei Shushan sangnyu to louan kibü yaangbü ka hanbü sühko müt pendou shanga Chobaeibü chem bamang khonga chalou nyet lem likei.

⁶ Thangtetnei thupaibü, nakthüngbü, hoba nakthüngan sakbü soueiko saüan kikei, phembanei inyaibü hoba nakthüngan sakbü lühei chandinam ikjikhap hoba marbel thaonyua phenan kikei, nongshang setshang kho hon si chandinam ninulaang saklangbü hoba thupaibü hoba nakhübüei yuklepan kikei.

⁷ Hobaje haoenei ih kho honeibü thung lulua yungkei, hoba Chobaei ih apsileko kibü thüng haoen la inkei.

⁸ Hobaje yungbü kho ngühkhüm tegütham tukosekko aying; aieilausi Chobaei kho tegü haoeibü Chobaeibü chema ikjaibü pendou la khei mütpem wekoei maangangbü tegü haoenei kümla sakkukei.

⁹ Tokei Chobasao Vastiei Ahasueras Chobaeibü Choba chema yaksa shuong shanga lem che lamlekei.

¹⁰ Chalou nyetbounyet Chobaeibü maangpon ihei olin angko kijinei sungphatbü müt nyet Mehuman, Miztha, Marbona, Bigtha hoba Abagtha, Zethar hoba Karka,

¹¹ haoen la imyam si leiyeibü shuong la Chobasao saomaibü lenla shanga Choba thedangto Chobasao Vasti Chobasao khun hanan leian loula sakkukei; aieilausi sao chühla saomaibü kikei.

¹² Lausikei sungphatbü müt danko Chobaei sengkubüa Chobasao Vastiei ngüha ale, khoei Choba aeibou wansak angko khauangkei.

¹³ Kheijinei Chobaei songngedonge mütshuong aoyouei jihsiphai shuong ngean kikei, haoen to laukei, aishanga kho tegü ngühkhüm hoba matjem ngebü pendou to Chobaeibü song kikei.

¹⁴ Hobaje hao to thenbou aoyouei Chobaeibü thenyek hapbei, hoba Choba sanglea setshang thükkaboua setkei, khübü kho Karshena, Shetthar, Admatha, Tarshish, Meres, Marsena, hoba Memukan, Persia hoba Mediabü leiyeibü müt nyet kikei.

¹⁵ Haoei laukei, “Ngühkhümei senei Chobasao Vasti to ai kümla? Aieilausi sung- phatbü mütshuong danko Ahasueras Chobaei sakkubü saoei aküm.”

¹⁶ Kheijinei Choba hoba leiyeibü shuong thedanga Memukanei jongaikei, “Chobasao Vastiei Choba thedanga ong aying, lausi tokei yaangbü shuong pendou to hoba Ahasueras Chobaeibü provins pendoua kibü mütli pendou to shedbü küma.

¹⁷ Aishanga Choba Ahasuerasei Chobasao Vasti Choba thedangto leian loula sakkukei, lausikei sao alou dogo ladang ngühlang kulaje Choba saoeibü thechühei yaksa pendou the to haoeneibü laosi shuong nyikuko loulabü.

¹⁸ Hobaje tat chaloua Persia hoba Mediabü Chobasao shuong aoyou Chobasaoeibü kümsilei kho ditkei; Haoenei yaangbü shuong pendou to hai laulabü hoba kho tegü awealaulabü hoba maangto shatbü aei longlabü.

¹⁹ Chobaei ho maangangko damalonga, Chobaeibü ngühkhüm hao ka sattiashi, hoba kho Persiabü hoba Mediabü ngühkhüm yoa dotiashi; khei kho ajeiyoentilabü lele, khei touje Vasti, Ahaseuras Choba thedangto aloulabü, hoba sao to maibou lubü che la Chobaei onoubü setshang kutishima.

²⁰ Hobaje ladang Chobaeibü ngühkhüm laobou haoeibü sangle pendoua haoei ngetilaje, aishanga kho yaksi shuong pendouei haoeneibü laosi shuong yaangbü yingashi, hanbü yingashi, soumo kulabü.”

²¹ Hobaje kho laubüei Choba si yaangbü shuong olintikei, hoba Chobaei Memukanei lenbü tegü kümbei;

²² Aishanga Chobaeibü provins pendouei lulueibü dolanga hoba lulueibü ngühyema provins weko jungto khei mütpem weko chemdanga bunyu lela, hoba jembü mütli ngühyem tegütham kho phinthonla haoei le hautikei.