AMOS 1 - SAOPOBÜ LAI (BSI)

¹ Amos, ao Tekoa kabü sanlombü shuong yoa kikei, haoei Jihudabü Choba Uzzia haanga hoba Israelbü Choba Jehoasheibü shou Jeroboam haanga, selo anyijinei po nyi kian, Israelbü shanga haoei hapbü ngüh shuong.

² Hobaje Amosei laukei, “Bunyubouei Zion Shongh ka ngühda; hoba Jerusalem ka haoeibü ngüh longda. Sanlombü shuongeibü nyemlaakei mang haapda; hoba Karmel Shongh kabü sang yuida.”

Siria

³ Bunyubouei hai lauda, “Damaskaei ngühkhüm lulimbü sem shanga, khei lei shanga, ngei ngeibü kayang asungngailabü; aieilausi haoenei Gilead to shemshibü muei ngümbei.

⁴ Hibü ngei Hazael Choba chem to wan hautilabü, hoba khoei Benhadad Choba chem lonlabü.

⁵ Ngei Damaska sangnyu bakou netla yeitilabü, hoba Aven Yo kabü mütshuong si Beth Eden songdakbou wapan apbulabü. Hobaje Siriabü mütshuong Kir thüngshang to langsenlabü.”

Filistia

⁶ Bunyubouei ho tegü lauda, “Gazaei ngühkhüm lulimbü sem shanga, khei lei shanga, ngei ngeibü kayang asungngailabü; aieilausi haoenei Edom la yaakshaula phang khümbo langsenkei.

⁷ Hibü ngei Gaza kümthang to wan hautilabü, hoba khoei saoeibü lapheishon lonshemlabü.

⁸ Hobaje Ashdod si Ashkelon kabü songdakbü shuong ngei wapan apbulabü. Ngei Ekron sangnyu shieikoelabü, hoba jouan kibü Filistiabü pendou hailabü.”

Tair

⁹ Bunyubouei hai lauda, “Tairei ngühkhüm lulimbü sem shanga, khei lei shanga, ngei ngeibü kayang asungngailabü; aieilausi haoenei Edom kaoa phang khümbo langsenkei, hoba jaisina sangmai theyolanyobü haoenei adamen.

¹⁰ Hibü ngei Tair kümthang to wan hautilabü, hoba khoei saoeibü lapheishon lonshemlabü.”

Edom

¹¹ Bunyubouei hai lauda, “Edomeibü ngühkhüm lulimbü sem shanga, khei lei shanga, ngei ngeibü kayang asungngailabü; aieilausi in jungan haoei jembü jaisina Israel shieikei, hoba onou alen. Haoeibü khauang maang- pok thonsithak akitei, hoba pon- pen thüngtikei.

¹² Hibü ngei Teman sangnyu thükto wan hautilabü, hoba khoei Bozraeibü lapheishon lonshemlabü.”

Ammon

¹³ Bunyubouei hai lauda, “Ammon shousi shuongei ngühkhüm lulimbü sem shanga, khei lei shanga, ngei ngeibü kayang asungngailabü; aieilausi haoeneibü leikhu leidang yaangtila shanga Gileada shia künbü yaksa shuong ninkei.

¹⁴ Hibü ngei Rabba kümthang to wan hautilabü, hoba khoei saoeibü lapheishon lonshemlabü. Khünyet lasona ngekyobü kilabü, hoba wapyo kho yeishik maimai kilabü.

¹⁵ Hobaje haoeneibü Choba si yaangenbü shuong langsenbü to haulabü.”