1 TIMOTI 1 - SAOPOBÜ LAI (BSI)

¹ Ho le, sen khümenbou Mühghaü hoba seneibü maanglem phobou, Khrista Jisu ngühkhüm tegü, Khrista Jisu youkoikjai Paul ka,

² mailema haoeibü shoumai Timoti jungto. Bou Mühghaü hoba seneibü Bunyubou Khrista Jisu ka ka jungto onou, üeisanou hoba hakso yingshi.

Amlangbü Lenbü Khulimbo Sanglabü

³ Ngo Makedonia to haujinei ailai ngei ka la sakkubü kukei kho tegü ngei no Efesiaa thüngtimang sühda. At danshuongei amlangbü lenbü

⁴ hoba ngühli si thonshang akibü phangeibü ngühli thenla haujemyobü ka thaktila shanga ngei ka la ngühkhüm kutimang sühda. Khübüei lemen ong longtida laka Mühghaü lamthen ühaatida. Mailemei ong kho kümla thükkei.

⁵ Kho ngühkhümeibü nyekchüh kho hinseibü maangpon, tangsheibü sensimaang hoba eaaoabü mailem ka longbü sanou chingtila shanga ki.

⁶ Atje khübü ka yonga hoba jim akibü wetyolauyobü to sepeia.

⁷ Haoenei ai lauda, ayingsi ai shangabü haoenei maangkeilembo lauda, kho aditenasikei, haoen Ngühkhüm lenbou la yeimang sühda.

⁸ Hangalama jungeialonga Ngühkhüm kho aicheküman maikei dogo künei ngekei.

⁹ Ho saopobü shuong nyekchüha aying lausikei ngühkhüm lulimbü si athepetbü dan shanga, Mühghaü to ühütbü si shabü dan shanga, asaopobü si songle to nyikubü dan shanga, bou haitibü si nyu haitibü dan shanga, müt haitibü dan shanga,

¹⁰ asangalanbü dan shanga, bousuei bousu jungeibü dan shanga, amlang theletlanletbü dan shanga hoba tükdebü lenbü khulimbo ai ong ki,

¹¹ hoba kü la nongkubü, haübou Mühghaü Ngühlang Maibü soneikangbü lenbü khulimbo ai ong ki, khübü danshuong shanga ngühkhüm kho kümbei dogo senei ngejan.

Mühghaü Onou shanga Nyensangbü

¹² Ngei seneibü Bunyubou Khrista Jisu, aoei kü la ho khangenbü kümsilei shanga hau kukei, hao nyen sangda; aishanga,

¹³ shaanglaje ngo nyikubou, shieikoebou hoba sekbülakbü che yingan kiasikei, haoei ngo maanglemenbou dogo weeikei hoba ho kümsilei to ngo pienkei. Lausikei haoei kü la onou lenkei, aieilausi, maialembü thu chenei ngei kho angebüa kümbei,

¹⁴ hoba Khrista Jisua kibü mailem hoba sanouei kü la Bunyubou onou apsileko kukei.

¹⁵ Khrista Jisu shabü shuong khümenla kaodak to loukei. Kho mailemla thükkei. Hobaje ngo pendou to amaibou shabü müt ki.

¹⁶ Aoyouei ponpen thon akibü langkei shanga hao to mailemlaje haoen to tetsida yingla shanga, Jisu Khristaei jembü lounyu natenbü pendou kü to, konglebou che tegü, tang khitko lenla shanga kü la onou lenkei.

¹⁷ Tou ponpen thon akibü Choba, ühaibou, ühüpenbou, hoba Mühghaü Che to, hao to nyenhang hoba soneikangbü pon- pen thon akiko yingshi. Amen.

¹⁸ Kü shou Timoti, nyi mailem hoba sensimaang maibü phoan, lason maibü wapyola shanga, shangied ka shanga tetenbü ngüh shuong tegü ngei ka la ho ngühkhüm nongan phokuda.

¹⁹ Atje ho mailem hoba sensimaang maibü ka bangsije, haoeneibü mailem long lusaka.

²⁰ Haoen yoa Humena si Alexander, haosiei Mühghaü nyikubü alaula songlenla shanga, haosi ngei Satan la khümbo kuan apa.