३ युहना 1 - चेपाङ1 लौ नाङ् गायुस् त तोओकायः इ चेती ङा ओउः थालवःपाइ लेखती ल्होक्नेःनाङ्। नाङ्इपाय् दोङ् कुरा पेतो ङ्हाम्ती झ्यान्ते नाङ्कायः आन राप्नेःनाङ्स। 2 लौ ङाकोः राप्ओ हौय नाङ्कायः पेतो ओह्हाय्ती मुपाः त परमेस्वर्कः तेती तोनेःनाङ्। नाङ् ल्हुङ्हाङः “पेतो स्याङ्नाः” त चीःलेःनेःनाङ्स नाङ्कोः आङ्मा “ओउःतलेः सेलः मुपाः” तमा परमेस्वर्कः तेती तोनेःनाङ्। 3 यात्नीस् पुःचोङ् वाङ्तोक्हाङः नाङ्कायः “ओउःइ दोङ् कुरा पेतोलेः ङ्हाम्नौ” त ओउःमयः दाय्ह्आकाय् नाङ्कायःपाय् “दोङ्सीलेः ओउःपाय् एतलेः पेतो वाह्धै मुनाः” त चीःती ङा आन चोङाय्आलाङः। 4 ङाकोः हौलम्कायः “दोङ् कुरा ङ्हाम्ती वाह्नै” त दाय्ह्ओ सायःआक्तीको ङा जुगाङ् चोङाय्तो स्याव्नाङः। 5 लौ राप्ओ हौय नाङ्कःताङ् वाङ्ओ येसुकायः ङ्हाम्ओ पुःचोङ् हौचोङ्कायः काम् पेतोलेः जाङ्ह्ताङःतेःनौ ओउःमयःपाय् ङ्हा तय्ह्आक्मालो मान्तालम् खेःइतो ओउःमयःकायः नाङ्इ ग्यातीलेः पेतोलेः जाङ्ह्ताङःतेःनौ। 6 नाङ्इ ओउःमयःकायः राप्ती झ्यान्ते “लौ ङीकायः एत पेतो हायःआताङी” त दाय्ह्ती ओउःमयःइ नाङ्कोः कुरा सबै ङ्हाम्ओलम्कायः ल्हाक्ती छ्यानःआताङी। ओउःत खेःओ ओउः ब्याह्ती वाङ्ओमयःकायः लव्ह्ती बयःती ल्होक्उसु ओहाङःसै ओउःत हायःती नाङ्इ परमेस्वर्कायः म्रोताक्तेःनौ 7 दोह् हायःती दाय्ह्सा परमेस्वर्कायः ङ्हाम्मालो मान्तालम्कःसै दोह्मा त्याक्माःत ओउःमयः “येसु ख्रीस् सुलो” त छ्यानःसाकायः एतलेः ब्याह्ती वाह्आकाय्। 8 ओउःत खेःओ ङी ख्रीस्कायः ङ्हाम्ओलम्पाय् ओउःमयःकायः लव्ह्ती बयःसा खेःनाःतय्ही। ओहाङःसै ङी ओउःमयःकुस् परमेस्वर्कोः दोङ् कुराकोः काम् जाङ्ह्नाःतय्ह्नी। 9 यात्नीस् कुरा ङाइ सबै ङ्हाम्ओलम्कायः चेती लेखती ल्होक्ङोतो नीङ्कःहाङः मुओ दीओत्रेफस् त तोओइ सबै ङ्हाम्ओलम्कायः पुःसा झाक्ती झ्यान्ते ङाइ लेखओ कुरापाय् दोह्मा सायःउलु। 10 ओउःत झ्यान्ते ङा वाङ्तोक्हाङः ओउःकोः माःती ङीकायः गाल्तुम्ती तोओ कुरा ङाइ सबैकुस् नोःकाय्नाङः। माः रैस ओउःपाय् ओउः परमेस्वर्कोः काम् जाङ्ह्ती वाह्ओलम्कायः रोम्सा जुगाङ् ग्याल। फेरी सुसुइ ओउःमयःकायः रोम्सा ग्याचनै ओउःमयःकायः रोम्सामा ताक्उलु अरु ङ्हाम्ओलम्कुस् हुम्लाङ् वाङ्सामा ताक्थासल। ओउःतलेः इ दीओत्रेफस्इ रेव्तो हायःनौ बा। 11 लौ राप्ओ हौय रेव्ओ हायःओलम्कोः काम् तेःतेःचाःस पेओखे म्र्याःतीलेः तेःन। पेओ काम् जाङ्ह्ओलम्खे परमेस्वर्कोःलेः मुनाः रेव्ओ जाङ्ह्ओलम्खेइ परमेस्वर्कायः तय्ह्नीली। 12 देमेत्रीयस् त तोओकायः “पेओलेः हायःनौ” त सबै दोङ् कुरा दाय्ह्ती तोनानी। माः रैस “ओउःपाय् दोङ्सीलेः पेलेःनाः” ङाइमा ओउःतलेः पाःती तोनाङःसु। फेरी ङीइ तोओ कुरा “दोङ्सी लेःआः” त चीःतेःनानी। 13-15 नाङ्कायः नाःतोलेः तोसा म्हर्ङोतो द्याह् लेखसा झाक्ङल। लोने नाङ्कायः क्रुस्सा दोःनाः त खेःया नीची नोःकाय्चाःतय्ह्च। लौ ल्हुङ् धोमाय्तोलेः स्याव्तेःपाः। नाङ्कोः साथीलम् नमस्ते ल्होक्तेःनाः। फेरी ङीकोः नाङ्कुस् मुओ साथीलम्कायःमा नमस्ते बयःउ दा। |
© 1993 Wycliffe Bible Translators Inc., All Rights Reserved.
Wycliffe Bible Translators, Inc.