Salmos 46 - Kaxinawá Bíblia (BR)

Senhor Deusrã, nukubekiaki, na nawati hãtxarã

Corá bakẽ kãta kenenikiaki

¹ Hawara bikahaira nũ teneai nukũ Deusũ nuku merabewamiski. Nuku keshekĩ nuku arua tsuã nuku metiruma Deus nukũ kushipahairaki.

² Patxa sakukĩ mai txurũwãkĩ ha mati tibi tsekebaĩ ianẽwã nuahaira merã pukui keyubiaya nũ hawẽ taea nũ hawa dateama ishanaii.

³ Ianẽwã shubi buspu tsaubirani hawẽ hui kaĩ meseai nĩkabiai nũ hawa dateama ishanaii. Mai mati matipa sinatai patxa sakui saki saki iki mesehairabiaya nũ hawa dateama ishanaii.

⁴ Hene ewapa teshesha daberã, haburã, Deusũ mae hawẽ benimakanikiki. Deus dasibi binuatũ mae meribi txakabumahaira hawẽ benimaikiki.

⁵ Ha mae merã Deus hiweshũ hatu tsuma keyuaki. Shaba betsa tashniai tibi Deusũ merabewakubainikiki.

⁶ Deusũ hawẽ hãtxa nawa tibi hatu nĩkamaitiã datei saki saki iki hatũ hui dẽke ishãkanikiki. Mai yamakainaya shanẽ ibu tibitũ hatũ kushipa benushãkanikiki.

⁷ Ha nukũ Senhor Deus dasibi kushipa binu keyua na habia nukubeki. Jacó Deusũnã, nuku keshekĩ nuku arua tsuã nuku metirumaki!

⁸ Senhor Deusũ hawẽ kushipawẽ na mai anushũ nawabu hatu dateakeakeimarã, neri beshũ uĩ bekãwẽ.

⁹ Mai kesuakea anua hatube detenamekĩ hatũ pia tekekĩ hatũ hashi teke keyukĩ hanushũ hatũ detenameti cavalo tarãmabaĩti ana tsuabe detenametirubuma wakĩ hawẽ henekĩ txiwẽ hatu menũ keyuimaki.

¹⁰ “Ea kẽwãkĩ ea unãti wakãwẽ!” Earã, ẽ Senhor Deuski! Hiwebaunabu mamaki ẽ ea hiweaki! Mai hirabi mamaki ẽ niaki!

¹¹ Ha nukũ Senhor Deus dasibi kushipa binu keyua na habia nukubeki. Jacó Deusũnã, nuku keshekĩ nuku arua tsuã nuku metirumaki!