Salmos 40 - Kaxinawá Bíblia (BR)

Haska shinãkĩ mĩ betxipaiaiwẽ ẽ mia benimawakatsis ikaii, inikiaki, na nawati hãtxarã

Davĩ kãta kenenikiaki

¹ Ẽ bika teneairã, Senhor Deusũ shinã ẽ manamiski. Ẽ kashayabi yukai Senhor Deus parabeketã ea nĩkatã

² kini atimapa anua ea piskumakĩ iã seuku anu ẽ hikikainai ea neshemiski. Ẽ hanu paiai anu daish iki ẽ tĩ iyamanũ mishkiki paimakĩ ea mestẽwãmiski.

³ Nukũ mekenika Deus kẽwaĩ ẽ kãtaya ea ana benimahairawakĩ ẽ huiwẽ kãtati bena ea imaimaki. Ẽ haskai dasibitũ ea uĩkĩ nĩkai benimai shinã txãkãkĩ itxapabũ Deus shinaĩ haki txiti ikĩ ikũwaĩmabuki.

⁴ Tsuara nĩkaisma hãtxa binumanikabe niama inũ habũ kẽwãti betsa kẽwaĩ txanitxakaibu anu kaisma habu Senhor Deus ikũwaĩ txiti imisburã, shinã txãkaĩ benimakubaĩmisbuki.

⁵ Ẽ shanẽ ibu Senhor Deusuũ, dami betsa betsapa hawẽrua itxapa mĩ anirã, nukuwẽ nuikĩ duawakĩ mĩ nuku ashũmiski. Tsuã mia binua mia keska betsa hayamaki! Mĩ pepakiri ẽ txanikauani hãtxatirubia haska washũ ẽ hati hatu yui keyutirumaki.

⁶ Hau nukũ txakabu mĩ nuku buashũshanũ inabu menuti mĩ manamaki. Hawara inãkuĩ menuti tibi nũ mia ashũmis inũ shekiwã tibi inãkuĩkĩ mĩ hiwe anu nũ bemis haska dabewẽ mawaira mĩ hawẽ benimaismaki. Hamẽ haska binumakinã, mĩ hãtxa nĩkakubaĩkĩ haska mĩ yununi txibãkĩ ẽ mia meneshũtiru mĩ ea shabakabi nĩkamakĩ yusĩmiski.

⁷ Haskawẽ taeshũ mia hãtxa wakĩ: “Ẽ nenuki”, ẽ mia waii, haska una sebiki ekiri kenenibu keska wakinã.

⁸ Ẽ shanẽ ibu Deusuũ, eã mia benimawakinã, haska shinãkĩ mĩ betxipaiaiwẽ ẽ mia ashũkatsis ikaii. Mĩ hatu yusinirã, ẽ huĩti merã ẽ haya niaki!

⁹ Minabu mirimabu bebũshũ haska hamapai pewakĩ mĩ kaneisma shabakabi ẽ hatu unãmamiski. Mikiri hãtxai ẽ hawa pes nismaki. Ẽ haskamisrã, Senhor Deusuũ, mĩ unãhairaii.

¹⁰ Haska mĩ yunuti kushipa kanetima mĩ pe unãmiswẽ taea ẽ hawa yuiama ismaki. Mĩ ea henekĩ putaisma inũ mĩ mekenã pepa piskumanikakiri ẽ txanikũkainaii. Minabu itxapa bebunua hãtxai haska mĩ nuikipa inũ, hãtxa kayabi besti mĩ yuimis shabakabi hawa huneama ẽ hatu yuipakeaii, hawa heneamarã.

¹¹ Senhor Deusuũ, ea betxipaiama ikama ewẽ nuikũkaĩwẽ. Mĩ nuikipawẽ inũ mĩ shinã kayabi mĩ betsa waismawẽ hawa heneama ea mekekubaĩwẽ.

¹² Enabũ ea hawẽtsaĩs txakabu betsa betsapa wamisbu hati tanatã ẽ mia yui keyutirumaki. Ibubis ẽ txakabu betsa betsapatũ ea kebẽbauna haskatã ẽ ana pe uĩtirumaki. Ẽ txakabu mirimatunã, ẽ bu itxapa binuaki. Haskawẽ taea ẽ benima pae ẽ benua ẽ ana hayamaki.

¹³ Senhor Deusuũ, menã ea uĩbirã ea putamariwe. Senhor Deusuũ, hawairakirã ea uĩtã ea merabewariwe.

¹⁴ Tsuãra ẽ hiwea habũ ea yamawakatsis ikaibu hau habuĩ hatuki kasheabu hau dakekubainũbũwẽ. Habũ ea itxakawakatsis ikaibu dakeyabi hau pashakubainũbũwẽ.

¹⁵ Habu eki kasheaibu dakei hau pashariakubainũbũwẽ.

¹⁶ Hakia tsuabũra mia benakubainaiburã, hatũ benima pae hau bikubainũbũwẽ. Mĩ meketi piskuti bitã yuikinã: “Nukũ Senhor Deus kushipa binuhairaki!” iki hau mikiri hãtxai heneyamakubainũbũwẽ.

¹⁷ Hamẽ ẽ nuitapai bika betsa betsapa tenebiaya Senhor Deusuũ, ea hakimayamashãwẽ. Senhor Deusuũ, miã besti mĩ ea merabewamiski. Hatishuĩra ana ea manamama hamapai tibi ẽ tea ea hawaira tashnimariwe.