Romanos 8 - Kaxinawá Bíblia (BR)

Deusũ Yushĩ Pepa nuku merã hiweshũ nuku mekemiskiaki, na hãtxarã

¹ Haskakẽ natiã nũ habu hiweshũ Jesus Cristo ikũwaĩbu nũ ma haki dasiabũ nukũ txakabuwẽ taeshũ Deusũ nuku dasibi kupiama ishanikiki, nũ ma hawenabukenã.

² Jesus Cristo mã ikũwaĩwẽ taeshũ Deusũ yunua benawẽ hawẽ Yushĩ Pepatũ matu ma mekeikiki. Haskawẽ taeshũ matu tibitũ matũ xinã txakabu tashnimatã mã ma xinã betsabunã, haskawẽ taeshũ Satanásã hatũ mawa kayabi anu matu yunukatsis ikai Yushĩ Pepatũ nematã matu mekeshanikiki, hiwekuĩmakinã.

³ Deusũ Moisés yunukĩ hawẽ hãtxa kenemanirã, yurabu hatũ xinã babuwẽ taeshũ haska washũ txibãtirubumakẽ haska bebũkiri yubani yurabu babubu hau hatũ txakabu hatu buashuni mawayunũ, iwanã, hawẽ bake yura babu nukuna keska bimatã Deusũ yununiki. Jesus haskakiranishũ hawẽ mawa kayabimati Satanásã kuxipa mebĩkĩ Deusũ bakẽ maemaniki.

⁴ Haska Deusũ Moisés hawẽ hãtxa yununi nukubũ nũ hawa txibãkĩ menetiruma xinãkĩ Deusũ hawẽ bake hatũ hau meneyunũ yununiki. Nuku haska waniwẽ taeshũ ana haska yurabu txakabũ abuai hiwemis akama hakia haska Yushĩ Pepatũ nuku yunuai txibaĩ nũ hiwekũkaĩtiruki.

⁵ Tsuabura hiweshũ txakabu tibi ibubis xinaĩ hiwei hawẽ nuikĩ henekatsi ikama ha besti txibãmisbuki, Deuski sinatakĩ hawẽ yusĩa txibãma inũ hawẽ hamapai txibãtirubumarã. Hakia hawara Deusũ Yushĩ Pepatũ nuku amakatsis ikai tsuabura haska ikatsis ikai abukĩ haskanũ ishũ Yushĩ Pepa txibãriakubaĩmisbuki.

⁶ Haska inũ, hawara txakabũ nuku amakatsis ikai nukũ huĩti babukĩ tsuabũra ha besti txibãkubaĩmisburã, hawẽ mawatã Deusbe hiweama ishãkanikiki. Hakia tsuabũra Deusũ Yushĩ Pepatũ bai txibaĩ unãnumati hawẽ nũ hiwenũ ikai ha besti xinaĩbu nuku duawakĩ hawama unãnuma nukũ hiwea nuku inãkubainikiki.

⁷ Ha inũ, tsuabũra Deus xinãma hawara hatũmebi hatũ xinãnẽs akatsis ikaibu haska txibãmisbu Deusũ hatu xinãma inũ Deuskiri xinãbumariki, haki petxiaburã. Habunã, Deusũ yusĩa txibãma inũ hawẽ yunua ashũtirubumariki.

⁸ Haskawẽ taeshũ tsuabũra hatũ kemu pae txakabũ hatu mekemisbu habũ Deus kẽwãkĩ benimawatirubumariki.

⁹ Hakia natianã, Deusũ Yushĩ Pepa mã haya matuki dasishũ matu mekeaya txakabuki petxitã mã ana ha txibãmaki. Hamẽ tsuabura Jesusũ Yushĩ Pepa hayama haki dasiama Cristonabumaki.

¹⁰ Hakia Cristo matube dasikenã, Yushĩ Pepa matube hiweaki. Txakabũ benukĩ nuku tenãtirubiakẽ ha Cristowẽ Deus nukuwẽ nuikĩ nuku pewaniki, hawenawakinã.

¹¹ Hanua Deusũ hawẽ bake Jesus Cristo mawa bestẽwanitũ mã mawa maturi bestẽwãshanikiki, hiwea bena matu inãkinã. Deusũ Yushĩ mã hayawẽ taeshũ matũ yura mawatã txapui keyubiamiskẽ ha Yushĩ matuki dasiatũ matu ana hiwemashanikiki, nai anurã.

^12-13 Haskakẽ, ẽ betsabu inũ ẽ puibuũ, hawara Deusũ abuai tsuabũra mã xinãma hawara matũmebi mã akatsis ikai mã akubainaiwẽ taea Deus matuwẽ nuiama mã mawa kayabishanaii. Hakia Deusũ Yushĩ Pepatũ matu merabewaya haratutũra ha txakabu mã heneai matu tenãshuna mã hanũkaĩ xinã kayabiwẽ mã hiwekubaĩshãkanaii. Haskakẽ tsuabũra Jesus txibaĩ ana nukũ xinã txakabu babuwẽs ikama natiã haska Deusũ nuku hiwemakatsis ikai haska abukĩ yunuai txibãtiki.

¹⁴ Ha inũ, tsuabura Deusũ Yushĩ Pepatũ merabewakĩ pe nimamisrã, haburã, Deusũ bakebuki.

¹⁵ Maturã, ha yushĩ hatũ matu date pae inãmis ha yushĩ ana matu inãkĩ yabumama hakia Deusũ Yushĩ Pepatũ hawẽ bakebu matu wamamis matu inãniki. Ha Yushĩ Pepatũ nuku hãtxamakĩ: “Epaã, Ẽ Epa nuikipatuũ”, akĩ kenamakĩ nuku yuimamiski,

¹⁶ haska wamakĩ nukũ yushĩki dasi nanetã nũ Deusũ bakebu shabakabi nuku unãmakinã.

¹⁷ Haskakẽ Cristoki nũ ma dasiabuwẽ taea nũ ma Deusũ bakebuki. Haska inũ, yura betsabũ hawara bika nuku tenemaibu Cristõ tenekubaini keska wakĩ hawa yuiama nũ tenekubainaii. Haskawẽ taea naiuri hawa ana bika teneama nũ habe hiweshanaii.

Dasibi Deusũ damiwanitũ hawẽ benimati uĩshanũ ishũ habũri manakanikiaki, na hãtxarã

¹⁸ Haska inũ, natiã Jesus nũ ikũwaĩbu hamapai bikawẽ berubi tenei nũ nuitapayuaiburã, Deusbe nũ hiweshanai betsahaira nũ ishanaii. Na hiweshũ nũ teneai inũ, na bika nũ tenekubainai txipu hawama keska ishanikiki.

¹⁹ Mai hirabiki dasibi habu Deusũ damiwani: “Haratu hawẽ bakebu kayabimẽkaĩ?” ishũ shabakabi uĩkatsis ikĩ hĩ hĩ itxakayamakĩ manakanikiki.

²⁰ Hatiãra haskashanai unãma mai hirabi anu Deusũ damiwani bika tenei itimaskakanikiki. Haskairã, hatũ txakabuwẽ ikabumaki. Hakia haska Deusũ xinãni habu damiwanibu unãmakẽ haska Deus yubakani keska hatu ashũshanikiki. Dasibi mai hirabi Deusũ hatu damiwani

²¹ Deusũ kupikubaĩkĩ hau keyukĩ yamawashanũ manakanikiki. Deusũ hawẽ bakebu duawakĩ mai hirabiri duawashanaiwẽ taeshũ dasibi damiwani benimashãkanikiki, mibanã, yuinakarã, bixirã, yuraburã, dasibi betsa betsaparã.

²² Haska inũ, dasibi Deusũ hatu damiwani txakabuwẽ taea hamapai betsa betsapa tenekubaĩkanikiki, hawara isĩ teneai hau Deusũ merabewakĩ hatu nemashũshanũ manakayuirã, haska aĩbu bake kaĩkatsi isĩ betsabu tenei tsekerẽ imis keskairã.

²³ Habu bestima nuku dikabirã, nũ Deusũ bakebunã, hawẽ Yushĩ Pepawẽ haska Deusũ nuku duawashanai hawẽ unãti wati yubani nũ haya hawẽ bake kaya keska wakĩ yura bena nuku inãshanai bishanũ ika hawara hawẽ bakebu yubabaini Deusũ nuku inãshanai huĩti detsupe ishũ bika tenekĩ nũ manayuaii.

²⁴ Haska nũ manaiwẽ taea nũ ma mekea hayaki. Na bika nũ uĩaĩwenã, nũ hawẽ mekeamaki. Hakia nũ uĩriama nũ ha manakai hiwea haki nukui nũ hawẽ mekeshãkanaii, hawara ha Deusũ nuku yubanirã.

²⁵ Habiaskabiakẽ hawara Deusũ mae nai anu kashũ nũ uĩriama nũ hawẽ nuiama Deusũ hãtxa ikũbestiwakĩ xinã mestẽwãtã nũ manayukubainaii.

²⁶ Haska inũ, nukũ huĩti babuwẽ taeshũ Deusbe hãtxakĩ nũ hawa yuitirumabiakẽ hawẽ Yushĩ Pepatũ nuku merabewamiski. Hari Deusbe hãtxati unãma: “Harakiri ea akĩ Deus hawa yukashãpa?” ikĩ nũ xinãyã hawẽ Yushĩ Pepa Deusbe hãtxakĩ nuku yukashũmiski, haska nũ yuitirumawẽ nuku ea ashũkinã.

²⁷ Haska inũ, nũ Jesus ikũwaĩbu Deusũ nukũ huĩti unaĩkiki. Ha dikabi hawẽ Yushĩ Pepatũ unãkĩ Deus ea akĩ habias nũ xinaĩ dasi watã nuku yukashũkubaĩmiski.

Hamapai txakabu Deusũ nuku binumashanikiaki, na hãtxarã

²⁸ Haskakẽ matu yusĩkubainũ nĩkakãwẽ. Habu Deusũ abukĩ kenakĩ katuni hawẽ bake Jesus pepa keskai hau ishanũbũ Deusũ bebũkiri hatu xinãnishũ merabewakĩ hamapai txakabu hatu binumakubaĩmiski.

²⁹ Hanua Deusũ bake nukũ Hutxi Kayabi Iuwa Jesus Cristo ha dukũ iniki. Hanua hawẽ betsabu mirima ishanaibu bebũkiri Deusũ unãkĩ kaĩriabuma Jesus Cristo keskakĩ nũ ha txibãshanũbũ bebũkiri Deusũ unãniki.

³⁰ Haska inũ, tsuabura Deusũ bebũkiri hatu kabẽkĩ katuni Jesuswẽ taeshũ txakabuma wakĩ pewatã hawara Deusũ hawẽ bake Jesus Cristo yunutã ani keska wakĩ haburi duawakĩ Jesus Cristobe hatu shanẽ ibuwashanikiki.

³¹ Haskakẽ Deusũ haska xarabu nuku ashuniwẽ taeshũ haratubũra txakabuwakĩ nuku tenemaibu habu hawauma keskabuki, Deus kuxipahairatũ nuku mekekĩ binuhairawẽ taearã.

³² Haska inũ, hawẽ bake hawa yauxitaskama yunua tashnitã mawakĩ nukubu nukũ txakabu nuku buashuniwẽ taeshũ nũ habu Jesus Cristoki dasiabu hawẽ taeshũ nuku duawakĩ hamapai tibi hawẽ bakewẽ nuku ashunishũ Deusũ nuku ashũkubainikiki.

³³ Deusũ ma nuku katunishũ ma nuku pepawabianikẽ Deus bebũshũ tsuã nuku ha akĩ nuku txitetirumaki.

³⁴ Haska inũ, Jesus Cristo debutã haska bestiama ana hiwei bestẽkaĩ nai anu Deusũ yusiuri tsaunishũ Jesus Cristo habe shanẽ ibukĩ Deus nuku ea ashũbiaya tsua betsa kuxipatũ Cristõ nuku pewashuni nematirumaki.

³⁵ Haska inũ, Jesus Cristõ matu abui matuwẽ nuiaya tsuã matu pashkatirumaki. Na eska xarabunã, na dasibi nuku hatũ bika tenemamistũ inũ, nuitapaiwẽ inũ, tariumawẽ inũ, pitiumawẽ inũ, nuku bikawaibuwẽ inũ, nuku itxakawaibuwẽ inũ, nuku deraibuwẽ inũ, mesewatã nuku tenãbiaibũ Jesus Cristo nukuwẽ nuikĩ nuku duawai habũ nuku mesewakĩ dapashkamatirubumaki.

³⁶ Haskakiri Deusũ hãtxa yuishunikatũ kenekĩ: “Epaã, nũ mia txibãkubaĩmiswẽ taeshũ bari tibi nuku itxakawakĩ tenãkatsis ikubaĩkanikiki. Txashuwã samama detekatsis imisbu keska wakĩ nukuri itxakawakanikiki”, aniki, Davĩ yuikinã.

³⁷ Hakia hamapai txakabu betsa betsapa haratutũra nuku bikawabiaya Jesus Cristõ nuku abuaiwẽ taeshũ hamapai txakabu tibi nũ binuhairakubainaii.

³⁸ Haska inũ, Deus nukuwẽ nuimiswẽ taeshũ ẽ matu yuiai nĩkakãwẽ. Deus nukuwẽ nuikĩ nuku abuairã, hawa eska xarabũ nuku dapashkamatirubumaki. Eska tibiwenã, mawawẽ inũ, tsuabura hiwetxakabiabũ Deus nukuwẽ nuikũkainaya Satanásã nai tsumabu inũ yushĩ betsabũ Deus nukuwẽ nuikũkainai habũ nematirubumariki. Ha inũ, natiã inũ uatiã ishanai Deus nukuwẽ nuiai habũ nuku dapashkamatirubumahairariki.

³⁹ Haska inũ, hawara kuxipabu manaũrishũ inũ namã uke merã mai merãshũ inũ, habu Deusũ hatu damiwanibũ haska xarabũ nuku dapashkamatirubumaki. Nukũ Shanẽ Ibu Jesus Cristo Deus hawẽ nuiai hawa dapashkamama ini nuku uĩmanishũ nukuri abukĩ hawẽ nuiwẽ nuku hawa dapashkamari ishanikiki.