Romanos 7 - Kaxinawá Bíblia (BR)

Hawẽ yunuti inũ hawẽ nemati shenĩ ana nuku tsumamakiaki, na hãtxarã

¹ Ẽ betsabu inũ ẽ puibuũ, Deusũ yunuti inũ hawẽ nemati mã unãhairaii. Haskawẽ taeshũ ha Deusũ yununiwẽ shanẽ ibubũ yunukĩ nemakĩ hatu mekekinã, habu mawabu akama hakia hiweyuabu besti yurabu yunutiru mã unãriaii.

² Haska aĩbu beneyakiri miyuiwẽ matu shabakabi yusĩnũ nĩkakãwẽ. Deusũ nuku yunukinã: “Tsuabura beneyabu hawẽ bene hiweyukẽ hau habe besti hiweyukubainũbũwẽ”, nuku waniki. Haskakẽ ma hawẽ bene mawakẽ aĩbu ana tsuã tsumamakẽ bene betsa hayakatsis iki beneyatiruki, Deusũ ana nemamarã.

³ Haska inũ, hawẽ bene mawariama ha aĩbu huni betsabe uĩnanaĩ atiyai txakabumisbuki. Hakia tsuara hawẽ bene ma mawakẽ hanu huni betsabe shabakabi ana hiwekatsi ikai hawa txakabumaki.

⁴ Mã ebetã Jesus txibaĩbu, ẽ betsabu inũ ẽ puibuũ, maturã, mã haska keskaki. Matu yuinũ nĩkakãwẽ. Deusũ bake mawa ana bestẽwani haki dasi mã habe mawani keskaburiki, ana hawẽ yunuti inũ nematiwẽ matu tsumamarã. Hakia hawenabukĩ hamapai Deusũ abuai hawẽ daya ashũkĩ mã benimawa bestikatsis ikaii.

⁵ Hanua nũ hiwei taeaitianã, hawẽ txakabu unãti Deusũ hawẽ yunuti inũ hawẽ nemati yununiki. Ha xinãkĩ nũ tapĩbiaya txakabu betsa betsapa nuku anua kemu tashniaiwẽ nũ txakabupauniki, haska hawẽ hiwetima txakabu mawa kayabiti besti birã.

⁶ Hakia ma nũ Cristo ikũwaĩbu nũ ma habe mawa keskakẽ ha dukũ Moisés Deusũ hawẽ yunuti inũ nemati kenemaniwẽ nuku ana yunuamaki. Hakia natiã ana kene sheni ana paema nũ txibãmakẽ Yushĩ Pepa kuxipatũ besti nuku yusĩkĩ nuku pe mekekubainikiki, bai bena nuku txibãmakinã.

Txakabũ yurabu parãmiskiaki, na hãtxarã

⁷ Haskakẽ nũ xinãkĩ yuiairã: “Deusũ yunuti inũ hawẽ nemati hawẽ txakabukĩ danãmatimẽ?” Haskamaki. Haska Deusũ Moisés hawẽ yunuti inũ hawẽ nemati kenemabianikẽ hawẽ yusĩa ẽ nĩkaisma txakabu hakiri ẽ tapiãma ikeaniki. Hakia Deusũ nukũ shenipabu yusĩkĩ: “Hawara yura betsana xinaĩ hawẽ kemuyamakãwẽ”, ini ha ẽ tapiãma hawẽ kemuti txakabu ẽ unãma ikeaniki, kemu Deusũ nemabianikenã.

⁸ Nukũ xinã txakabu kaĩkinã, nuku eska wamiski. Ibubis nukũ xinãnẽ xinaĩ hawara tashniai uĩ xinã txãkãkĩ kemukĩ ibubis nukũ yurã yunuaiwẽ benimakĩ nũ txakabuwamiski. Haskakẽ hawẽ yunuti inũ hawẽ nemati hayamakẽ txakabu hamẽ hawẽ kuxipa hayama mawa keska ikeanaii.

⁹ Haska inũ, Deusũ yunuti inũ hawẽ nemati ẽ tapĩriama ẽ hiwei pea keska ẽ ikũkainiki, haska wakĩ Deusũ ea kupishanai unãriamarã. Hakia hawẽ yusĩa ẽ ma tapiãyã ẽ xinã txakabũ ea hiwematxakashũ yunumis hatũ tenãkĩ ea benui kai ẽ unãniki.

¹⁰ Haskakẽ ha yununi pepatũ ea hiwea inaĩ dabanẽ ẽ ikai ẽ hawẽ tenã mea keska ẽ uĩniki.

¹¹ Hanua Deusũ bemakis hawẽ hãtxa yununiwẽ txakabũ ea beparãtã ea kanemaniki. Ha Deusũ yununi pe dabanẽ ẽ ikai hatũ ea tenã kayabi waniki.

¹² Haskakẽ Deusũ hãtxa keneniburã, harã, meribiriki. Ha inũ, hawẽ yunuti inũ hawẽ nematirã, meribi hawẽ kanetima pepa bestiki.

¹³ Ha yusĩa pepa hawẽruabiatunã, ea mawa kayabi anu iyuairã, pemẽ? Haskamahairaki. Ha ẽ txakabu amisrã, haska txanima shabakabi kayabi ẽ txakabu tashnikĩ txakabũ ea parãkĩ yabutã ea kanemakĩ hatũ ea tenã keska waniki. Ikũki. Hawara Deusũ abuama nemani aki nũ txakabumisrã, harã, pemahairaki. Txakaburã, Deusunamaki. Haskarã, danãmiski.

Hamebi Paulõ txakabu maematiruma inikiaki, na hãtxarã

¹⁴ Deus anua yunuti yusĩa pepa Moisés hatu yusĩbianikẽ Cristõ kuxipa xinãma babukĩ Deusũ hãtxa ẽ txibãmaki. Ẽ haskaya txakabũ ea atxikĩ tsumashũ ea yabumiski.

¹⁵ Haskakẽ hawara pepa besti ẽ akatsi ikai akama hawara ha danãkĩ ẽ abuamabia ha ẽ abuai akĩ itsa wakĩ babutã ẽ amiski. Ẽ haskakeakemisrã, ẽ unãmahairaki.

¹⁶ Haska inũ, txakabu ẽ akatsi ikamabia Jesusũ kuxipa hakimakĩ ẽ akaya haska Deusũ yunuti inũ hawẽ nemati hiwea pepa besti yusĩmiswẽ: “Yusĩa peki”, iwanã, ẽ xinãkubainaii, ẽ txakabuwẽ dabĩ tenekĩ xinaĩnã.

¹⁷ Haskawẽ taeshũ eã ẽ akamabia ẽ xinã txakabũ ea tsumayushũ hawara pepa hakimawatã ewẽ hiweshũ ea amamiski, txakabu amakubaĩkinã.

¹⁸ Ha inũ, Yushĩ Pepatũ kuxipa xinãma hawara pe ẽ akatsis ikai emebi ẽ xinã kuxipawẽ taeshũ ẽ akairã, babuki. Haska ẽ yuiairã, eskaki. Hawara pepa anũ ishũ emebi ẽ xinãnẽ ẽ ha abuai ẽ atirumaki.

¹⁹ Haskawẽ taeshũ hawara pe besti ẽ akatsis ikai ha akama ha txakabu ẽ danãmis ẽ pe akaitũ besumiski, natiã e iki ẽ hawẽ dakeairã.

²⁰ Haskakẽ ẽ huĩti merã txakabu hiwekẽ hawara ẽ abuama ẽ akairã, eã ẽ akama hakia ẽ huĩti txakabũ xinãmakĩ ea txakabuwamamiski.

²¹ Ẽ pe bestibiakatsis ibiaya txakabu betsa betsapa ewẽ hiwea ha tashniai uĩkĩ ẽ xinã pema ẽ uĩkubainaii.

²² Ẽ xinã uke merãwenã, Deusũ yunua besti abukĩ ẽ akatsi ikũkainaii.

²³ Haskabiakẽ ẽ akubainai uĩ txakabũ ea beshetã ea tsumawatã ẽ xinã kayabi nematã ea henekatsi ikamakẽ haska Jesus ẽ dayashunai ẽ pe besti xinãtiruma shabakabi ẽ unãkubainaii.

^24-25 Haskawẽ taeshũ ekiri matu xinãmanũ ea nĩkakãwẽ. Earã, ẽ pemahairaki. Ibubis ẽ hiweawẽ Deusũ yununi ẽ tapĩkĩ hawẽ hãtxa txibaĩ ẽ peai dabanẽ ẽ imisrã, haskamahairaki. Ẽ xinã babu txakabũ ea yunumiski. Ea ẽ pe hiweismarã, tsuã ẽ yurawẽ ha Deusũ yununi ẽ txibãbiaya txakabũ tsumatã ẽ hiwea ea benumakĩ ea tenaĩnã, tsuã ea merabewatirumabiakẽ nukũ Shanẽ Ibu Jesus Cristõ ea merabewakĩ ẽ txakabu ea buashuniwẽ taeshũ Deus besti hawẽ taeshũ ẽ kẽwãkubainaii.