Romanos 6 - Kaxinawá Bíblia (BR)

Jesus ikũwaĩ nũ naxiarã, nũ habe mawa keskakiaki, na hãtxarã

¹ Hanua yurabũ txakabuwakĩ Deusũ yusĩa txibãkubainabumawenã, nukunã ha xinãma yuikĩ hatũ Deus pepabia kemaĩ hau ana shabakabi hawẽ duapahaira nuku uĩmanũ nukubunã, txakabuwakĩ heneyamakubainãkãpa?

² ikĩ haskakiri xinaĩ hãtxatimahairaki. Hakia tsuara ma mawa maiwabu ana txakabuwatirubuma keskakĩ Satanásã parãti hãtxa txibãma dasibi nũ Jesus Cristo txibaĩbũ nukũ txakabu henetã nũ ana txakabuwẽ hiwekũkaĩtirubumaki.

³ Haska inũ, Jesus Cristo nũ ikũwãkubainaya yura betsã nuku naximaburã, Jesuski nũ dasia habe mawani keska Deusũ nukukiri pe xinãmis matunã, mã unãmamẽ?

⁴ Ha inũ, nuku naximaburã, Cristobe nũ mawa keska nuku habe maiwanibu keskakẽ nukũ xinã txakabu putai nũ hiwei benashanũ hawẽ Epa kuxipatũ Jesus Cristo bestẽwani keska wakĩ hiwea bena betsahairawakĩ nuku bestẽwã keska wamiski.

⁵ Nuku naximabu Cristoki dasia nũ habe mawani keska ana Cristo besteni keskairã, hiwea benawẽ nũ hawẽ hiwekũkainaii.

⁶ Ha dukũ nũ hawẽ hiwetxakani sheni Cristobe cruzki netãtã nũ habe mawani keskaki. Nũ haskaya nukũ xinã sheni Deusũ nuku betsa wamakẽ txakabũ nuku beshetã hawẽ tsumawakĩ ana nuku yunutirumaki.

⁷ Hanua tsuara mawakenã, ana haskatã shanẽ ibukĩ txakabũ tsumawatã yunutirumaki.

⁸ Nukuburã, Cristobe nũ ma mawani keskawẽ taea txanima dateama nũ habe ana hiwekuĩkũkaĩshanai nũ unaiĩ.

⁹ Ha inũ, Cristo mawatã ana besteni ana mawatiruma nũ unãriaii. Ha yushĩ parananãmistũ ana tenãkĩ maemakĩ ana binutirumahairaki.

¹⁰ Ha inũ, Cristo bestiwai mawakĩ dasibibũ txakabu betsa betsapa binu keyuniki. Natiã hawẽ hiweawẽ Deus besti duawanũ ika habe hiwekũkainikiki.

¹¹ Haskawẽ taea matũri xinã bena wai mawa keskatã dasibi txakabu henebaini Jesus Cristoki dasitã Deus benimawanũ ika haskakiri besti xinaĩ hiwekubaĩkãwẽ.

¹² Haskakẽ matũ xinã txakabu kemuwẽ hau matu tsumashũ hamapai betsa betsapa txakabuwẽ hau ana matu niniyamanũ nemakubaĩkãwẽ, ana ha uĩ mã kemuai txibãmarã.

¹³ Haska inũ, matũ yura ana txakabu tsumawamayamakãwẽ, ha hamapaiwẽ nukũ yura hawẽ txakabu watimakirã. Eska wakinã, matũ xinã pe mekekĩ matũ yura hirabi Deus inãkĩ mekemariakubaĩkãwẽ. Ha inũ, yurabu mawatã ana besteã keskatã matũ yura pe mekekĩ matũ hiwea Deus inãtã pepashũkubaĩkãwẽ, matũ yura hirabiwẽ Deus duawakinã. Hawa kaneama ha bebũshũ pepakĩ akubaĩkãwẽ.

¹⁴ Mã Cristo ikũwãyã Deusũ matu pepawaiwẽ taeshũ txakabũ matu ana beshetã tsumatirumaki. Haska inũ, Deus duawanũ, iwanã, hawẽ yunuti inũ hawẽ nemati Deusũ Moisés yusĩniwẽ matu ana mekeamaki. Hakia Deus duapatũ matu ma mekeikiki, mã hawẽ daya akaiburã.

Txakabu henebaĩ pepatikiaki, na hãtxarã

¹⁵ Haskai hariri hãtxamisbumẽ? eska yuirã: “Haskakenã, Deusũ nukũ shenipabu hawẽ hãtxa yusĩnitũ nuku ana tsumama hakia hawẽ bake nũ ikũwaĩwẽ taeshũ nuku duawakĩ nukũ txakabu buashanairã, nũ txakabuwairã, hawamaki. Hamapai txakabu betsa betsapa anãkãwẽ”, iki mã yuinamemisrã, haskatimahairaki. Matu yusĩnũ nĩkakãwẽ.

¹⁶ Yura betsã yura betsa tsumawamakĩ inã hanushũ hawẽ shanẽ ibu ha besti hau dayashũkĩ hawẽ yunua besti ashũmisrã, mã unaiĩ. Hakia habiaskari wakĩ matũ txakabũ matu tsumawakẽ haskai ha txakabu txibaĩ mã hawẽ mawa kayabi mã benushanaii. Hakia haska binumakĩ Deus mã nĩkakĩ txibaĩ hawẽ haibuaibu matu wakĩ hiwekuĩmakĩ hawenabu matu washanikiki.

^17-18 Ha dukũ txakabũ matu tsumawakĩ taewaniki. Hanushũ Deusũ matu merabewaya nũ matu yusĩkubaina nĩka pewatã matũ huĩti hirabiwẽ matu yusĩaĩbu mã ikũwãniki. Natiã ana txakabu dayashunama hanua kaĩkaĩ Deus dayashũkĩ pe besti mã ashũkubainaii. Matu mã haskai nĩkai huĩti xinã txãkãkĩ Deus ẽ kẽhairawakubainaii.

¹⁹ Ha inũ, dasibi mã tapĩ keyuriamakẽ matu shabakabi yusĩkĩ hãtxa bikamawẽ matu yusĩnũ nĩkakãwẽ. Hawara txakabu pepama Deusũ danãmis betsa betsapa anũ ika hawẽ kemui matũ yurawẽ txakabu irumai mã atimapakũkainiki. Hakia habiaskari wakĩ matũ yura Deus inãtã pepakĩ Deus dayashũkubaĩkãwẽ, hawẽruai pepakinã. Haska wakĩ matũ txakabu putai tari meribi pashkatã mã pe besti hiwekũkaĩshanaii, Deusunabuirã.

²⁰ Haska inũ, txakabũ matu tsuma wayukenã, Deusũ haska abuai xinãma mã hiwekũkainiki.

²¹ Hawẽ haskati mã ikũkainimamẽ? Ha txakabũ yurabu hatu debuwamis hawẽ benuti bai mã txibãkubainimarã, natiã xinã betsa watã mã hawẽ dakeaii.

²² Hakia txakabũ matu tsuma wapauni mã ma heneima hakia natianã, bai pepa betxitã hawama Deus besti mã dayashũkũkaĩkatsis ikaii. Haskakẽ na haska pepa Deus mã dayashunairã, hiwekuĩa pepa mã itxawaii, natiã mã hawẽ meribi hiwekũkainai inũ atimas hawẽ henekĩ hiwekuĩa hawẽ manakukĩ Deusũ matu inãshanikiki.

²³ Haskakẽ tsuabũra txakabuwakubaĩmisbu hatũ kupitirã, Deusũ meketi hayama mawa kayabi bishãkanikiki. Hakia nukũ Shanẽ Ibu Jesus Cristo nũ ikũwaĩ nũ haki dasikẽ hawẽ taeshũ Deusũ nukũ hiwekuĩti pepa inã nukũ Shanẽ Ibube dasitã nũ habe hiwei ikibi ishanaii.